Ponencianan di CAFT no ta motibo pa preocupacion
ORANJESTAD – Durante conferencia di prensa semanal, prensa a puntra e Prome Minister Evelyn Wever-Croes su opinion tocante e ultimo carta di CAFT, y especialmente e ponencia di CAFT cu “tin espacio ainda” pa reduci e deficit pa 2018.
Riba esaki Prome Minister a contesta cu e ta hopi satisfecho cu su gobierno a cumpli cu palabracion: mantene deficit di 2018 bou esun di 2017, y den cuadro cu locual Parlamento a aproba.
“Parlamento a aproba un deficit di 149 miyon florin y ta mustra cu nos ta mantene e deficit hasta na 147 miyon florin, segun e propio CAFT. Cu esaki mi ta considera cu Aruba, pa prome biaha den hopi aña ta cumpli cu e norma presupuesta, y sin cu a recuri na entradanan incidental, pasobra e crisis tax cu a wordo introduci dia prome di juli 2018 sigur no por wordo considera incidental. Ta decisionnan duro cu nos a tuma, cu a duna resultado”.
Pa locual ta e ponencia di CAFT mes cu lo “tin espacio ainda”, e mandatario tabata hopi cla. “CAFT su ponencia ta basa riba nan ponencia cu nos lo no a gasta placa na e Sociaal Crisisplan y cu pues por uza e placa aki pa baha e deficit. E ponencia sin embargo no ta corecto.
“Talves berdad no a haci tur e pagonan grandi ainda pa cu e Sociaal Crisis Plan, pero a “commit” casi henter e montante presupuesta caba na e Sociaal Crisis Plan, pues e suma aki NO ta liber pa dispone di dje mas, y laga mi ta hopi cla den esaki: ningun hende ta mishi cu e placa ey. E placa ta destina pa alivia e crisis social cu nos ta bibando aden. Awe ta un aña cu nos ta recorda e dos angelitonan cu a wordo mata brutalmente. Nos compromiso ta pa esaki no pasa nunca mas, y p’esey e placa aki ta. No pa baha deficit. Ademas, nos no a aumenta e deficit, pues no tin necesidad pa baha esaki tampoco.
Segun mi a compronde di departamento di Finansas, esaki a wordo bisa na CAFT, pero di un manera of otro esaki no a wordo “registra” cerca nan of talves nan ta pensa cu nos por simplemente “walk away” for di obligacionnan di pago. Esey nos no por. Nos tin responsabilidadnan pa cu proteccion di nos muchanan. Nos lo no “walk away” di nan.
Di otro banda CAFT ta duna como conseho pa baha den un luna gasto di personal cu 14 miyon. Esaki lo por solamente si nos manda mitar di e ambtenaarnan sinta pa un luna cas sin cobra, of nos paga tur hende mitar salario na December. Ningun di dos huridicamente ta posibel. Y CAFT sa cu esaki no por. Pues esaki tampoco lo por ta un manera pa “crea espacio” den 2018. Pakico nan ta duna esaki como conseho, mi no sa”, Prome Minister a duna di conoce.
E mandatario a laga sa cu Minister di Finansa, Xiomara Ruiz-Maduro despues di su biahe di mision economic, lo papia cu CAFT riba esaki y contesta e carta aki tambe debidamente.
Pa resumi Prome Minister a duna di conoce cu no tin espacio pa un otro resultado e aña aki manera CAFT ta sugeri pasobra cumplimento cu obligacionnan existente di Gobierno di Aruba no ta permiti esaki.
“Cualkier espacio ta algo marginal y ta manifesta su mes mas den e aña cu ta bini na momento di cera e cuenta anual. Nan propuesta di baha gasto di personal den un luna cu 14 miyon ta mas halto cu e number cu nan mes a conseha gobierno pa haci over di henter e aña aki y no por wordo considera como algo realistico. Nos ta un gobierno transparente y ta actua a base di proyeccion realistico. Hopi hende mester custuma na esey ainda. Pues mi no ta preocupa cu e ultimo carta di CAFT. Mi ta satisfecho cu e protocol firma cu Hulanda, CAfT tambe por cierto, y esey ta trece trankilidad”, Prome Minister a finalisa bisando.