ORANJESTAD – Diabierna ultimo a tuma luga e di 4 edicion di e Simposio di Crucero, un evento cu Oficina di Turismo Aruba (A.T.A.) a bin ta organisa durante ultimo añanan cu e obhetivo di trece socionan di e industria hunto pa analisa e resultadonan obteni mientras cu, na mesun momento, ta comparti e plannan pa futuro. Ademas di integra e esfuersonan di tur partido envolvi, tambe ta crea conscientisacion di e papel importante cu e sector ta representa. Edicion 2018 di e evento tabatin un toke hopi special, mirando cu Aruba ta celebra su di 60 aniversario di ricibi barconan cu turista.
Turismo Crucero ta un industria cu, durante temporada crucero 2017/2018, a aporta cu $102.8 miyon na e economia di nos isla, esaki ta un aumento di 43% compara cu temporada 2014/2015 ora a conduci e mesun investigacion (fuente: BREA).
Bek na 1958, e industria a inicia cu binida di e barconan Santa Rosa y Santa Paula di e compania The Grace Line. E barconan aki, cu capacidad pa 546 pasahero, tabata bishita Corsou, La Guaira na Venezuela, Aruba, Kingston na Jamaica, Haiti y Port Everglades na Florida. E importancia di e mar Caribe y den esaki turismo crucero su interes den esaki, tabata e mensahe cu Minister di Ensañsa Sr. Armando Lampe a trece dilanti, na nomber Gobierno di Aruba y su colega di Turismo, Sr. Danguillaime Oduber.
CEO di A.T.A., Sra. Ronella Tjin Asjoe-Croes a indica den su discurso di bonbini na e conferencia, cu e barconan cu ta mara na nos waf awendia, ta 900 biaha mas grandi cu esnan na 1958. Danki na inversionnan haci recientemente na waf di Oranjestad, nos por ricibi algun di e cruceronan mas grandi na mundo. Por ehempel, e aña aki a ricibi pa prome biaha un barco crucero di Freedom Class di Royal Caribbean Cruise Lines y dos siman pasa a yega e barco Horizon di Carnival Cruise Lines, cual ta nan barco di mas grandi.
Tjin Asjoe-Croes a indica cu aunke barconan ta keda bira mas y mas grandi, tambe a identifica e tendencia creciente entre usuarionan cu ta scoge barconan mas chikito cu ta brinda un experiencia mas intimo y personalisa. El a sigui pa bisa cu “Mientras cu Caribe ta keda como e lider global cu mas di 35% di e barconan den nos region, si kier garantisa satisfaccion di e bishitantenan y aumenta e entrada di e sector, mester tene na cuenta aspecto di capacidad di carga”. Aki a indica cu ta premira un crecemento stabil pa modera den añanan cu ta sigui, unda e tarea ta entre otro pa mantene e base di bishitante actual, atrae mas di e barconan chikito/upscale y mantene e enfoke riba atraccion den temporada abou (fuera di halto), subi patronchi di gasto y converti bishitantenan crucero den bishitante stay-over.
Orador pa e Cruise Symposium 2018 tabata Sr. Ugo Savino, Director di Deployment & Itinerary Planning pa Carnival Cruise Lines. E ehecutivo halto a comparti cu esnan presente estadisticanan importante con nan cliente ta wak nos isla como destino pa bishita; loke ta traduci den con atractivo y factibel Aruba ta pa e compania di crucero, y tambe a trece dilanti puntonan di atencion.
E mainta di conferencia tabata uno hopi interesante pa e audiencia. Por a tende di e resultadonan di estudio y e Business Research and Economic Advisors (BREA) door di Kareline van der Linden kende ta e Specialista di ‘Research’ pa A.T.A., ademas Cruise Manager na A.T.A. Mario Arends a elabora riba Strategia y Iniciativanan cu e entidad ta ehecutando y obhetivonan pa 2019. Esther Broeksema, como directora di Aruba Excellence Foundation (bou di cual e Aruba Certification Program ta resorta) a ilustra nan vision y mision pa capacita miembronan di sector turistico pa brinda e miho di Aruba su ‘zjeito’. E merdia a sigui un workshop pa operadornan di tour, unda cu entre otro a otorga certificado tambe di e ultimo training otorga pa medio di Aquila y A.T.A.
A.T.A. ta gradici tur esnan cu a participa na e Cruise Symposium 2018. Pabien un biaha mas na ocasion di conmemoracion di 60 aña di turismo crucero, como parti integral di e industria turistico pa Aruba.