Oranjestad – Fin di e siman aki lo tuma luga e di 3 edicion di Aruba Art Fair. Durante e evento aki lo lansa e pelicula cortico ‘Otro Bista’.
Otro Bista ta un pelicula cortico di Mario Gonsalves, y lo hiba bo riba un aventura visual cu ta inspira pa experencia nos isla for di e perspectiva di nos comunidad local. Pues ideal pa nos bishitantenan actual of future bishitante.
Ronella Tjin Asjoe-Croes – CEO di Aruba Tourism Authority ta elabora: “E pelicula aki ta brinda bishitantenan un impresion mas amplio di kico un vacacion na Aruba por nifica pa nan, fuera di Aruba su playanan, clima y amabilidad. E produccion aki lo mustra diferente mercadonan rond mundo (Aruba ta wordo promovi den casi 20 diferente mercado) kico mas Aruba por ofrece. ‘Otro bista di Aruba’, cu ta loke mas y mas di nos bishitantenan kier experencia entre otro di nos destinacion.”
E pelicula cortico ta inclui entre otro musica, wega di domino, piscamento, y exploracion na e parti Noord di nos costa, cual ta djis un paar di e cosnan cu nos localnan gusta haci riba nos isla. E enfoke den e pelicula cortico ta riba nos hendenan, nos cultura , idioma, arte etc.
Marylin Feliciana – Branding Specialist na A.T.A. a nota cu: “Por medio di e pelicula aki por wak un otro banda di nos isla cu no ta e banda turistico, pero e banda autentico di Aruba.”
Mario Gonsalves a conta con el a yega na e inspiracion pa traha ‘Otro bista’: “Creciendo como cualkier otro hoben, explorando e bario cu mi amigonan, hungando futbol riba caya tur atardi cu mi primonan y siendo lanta pa un famia disciplina, a brinda mi un aprecio pa e ambiente cu mi a wordo lanta aden. Semper mi tawata fascina pa arte visual y asina mi a dicidi di conta e storia por medio di un pelicula cortico.”
‘Otro Bista’ lo lansa diabierna, durante apertura official di Aruba Art Fair y esnan interesa por aprecia e pelicula e weekend aki.