Pa November Hospital completo lo traha cu dossier digital pa tur pashent
ORANJESTAD, Aruba – 1 di Juli 2018: Dialuna tabata un dia hopi grandi y sigur un momento historico pa Dr. Horacio E. Oduber Hospital. Cu e meta pa eleva calidad di servicio y cu privacidad di cada pashent den mente Hospital a bay over riba un sistema automatisa pa loke ta dossier medico di tur pashent. E sistema aki a bay LIVE dia 25 di juni y den forma di fase lo bay introduci esaki na diferente policlinica di specialista. Na november 2018 Hospital mes lo bay completamente over riba e sistema digitalisa aki, na unda ya no lo bay haci uzo mas di e tan conoci dossier medico cu ta bin den un map blauw.
E proyecto aki ta uno cu lo ser introduci den diferente fase, di cual dialuna a cuminsa cu e prome tanda cu tabata policlinica Interne geneeskunde, Policlinica MDL, Policlinica di Oncologia y tambe Policlinica di Ginecologia. Charlaine Huntington, manager di comunicacion di hospital, a duna di conoce cu a prepara hopi bon pa e cambio inmenso aki mirando cu antes registracion di tur informacion di e pashent ta wordo skirbi y awo e lo wordo hinca den computer. Loke si a zorg pa haci na momento cu a bay live ta pidi tur pashent cooperacion pa loke ta tardansa di nan afspraak cu lo por a dura mas largo cu normal pero orguyosamente tin di bisa cu esaki a bay miho di loke a premira ya cu tur dokter y secretarianan a logra den tempo record yuda tur pashent cu a bishita nan.
Na momento cu pashent yega specialista, lo puntra su persona pa tur su informacion manera nomber, adres y number di telefon. Di biaha lo pone tur informacion den e sistema, asina Charlaine Huntington a duna di conoce. Loke ta haci esaki mas interesante ta cu lo pone tur medicina cu e pashent ta tuma den e sistema, su alergianan y sigur e plan di cuido cu e ta ricibiendo. Asina poco poco lo bay ta adkiriendo tur informacion di e pashent cu si mester bay otro departamento na e momento ey, e otro dokter ta “log- in” den e sistema y di biaha e tin acceso na e informacionnan di e pashent.
Algun aña pasa hospital a lanta un grupo di proyecto yama IMP@CT cu ta para pa “Improving Patient Care through Technology”. E proyecto aki tabata uno hopi grandi y cu ayudo di e grupo di proyecto, participacion di hopi nurse y specialista por a logra e meta aki di bay live. Tecnologia ta algo cu sigur por ser uza pa brinda e pashent un miho cuido. Hospital tin hopi proceso y esey a pone cu mester a repasa tur esaki, pa por a percura di hinca e procesonan corecto y actual den e sistema digitalisa.
Dentro di algun siman mas policlinica tambe lo bay live y pa november hospital mes lo bay completamente over riba e digitalisacion di dossier medico. Esaki ta un stap grandi den cuido medico na Aruba y sigur merece un “pluimpje” pa tur cu a haci esaki posibel. Cu e digitalisacion di dossier medico aki nos por keda mehora e siguridad y privacidad di nos pashentnan, brinda cuido di calidad y haci esaki den un forma mas eficiente. Asina aki nos Hospital ta miho ekipa pa futuro.”, Charlaine Huntington a termina bisando.