ORANJESTAD, diasabra 9 di Juni ultimo a tuma luga e di 3 edicion di “Aruba Bank Sport Clinic” den e disciplina di tennis di mesa, esta pingpong, cu atletanan Ching Ho Chung y Mikayla Mathilda. E muchanan a pasa un mainta agradabel siñando mas di tennis di mesa.
E mainta a cuminsa cu yegada di e muchanan y despues presidente di Aruba Table Tennis Association (ATTA) Jean Hoek, representantenan di COA y Aruba Bank a hiba palabra. Nan a gradici tur mucha cu tabata presente y a desea nan pa pasa un momento agradabel.
Mikayla Mathilda y Ching Ho Chung tambe a hiba palabra, unda nan a ricibi splicacion di tennis di mesa por media di un presentacion. E muchanan tabata contento di tur instruccion cu nan a ricibi manera con pa wanta e racket y con pa haci “forehand”, “backhand” y “service”. Despues di e presentacion, e muchanan a haya oportunidad di hunga weganan di tennis di mesa.
Na final di e sport clinic e muchanan a ricibi nan certificado, un pin di COA, tambe nan a ricibi un treat saludabel. Tur mucha a gradici e federacion, e atletanan, e representantenan di Comite Olimpico Arubano (COA) y Aruba Bank p’e oportunidad cu nan a ricibi.