ORANJESTAD — Awe nos ta recorda cu 15 aña pasa Papiamento a bira e idioma oficial di Aruba banda di idioma Hulandes. Dia 21 di mei 2003 tawata un dia historico pa Aruba. Parlamento a aproba e ley di idioma oficial despues di añanan di vision pa Aruba tin su propio ortografia oficial di Papiamento. Desde e dia aki, Papiamento ta e lenga nacional di Aruba y nos idioma oficial banda di Hulandes. Ambos idioma tin mesun balor.
Cu e logro aki, Aruba por a cuminsa uza Papiamento den aparato gubernamental y Papiamento y Hulandes a wordo considera como igual. Ciudadanonan por a cuminsa uza Papiamento pa dirigi cartanan na Gobierno.
Na caminda pa e celebracion di 15 aña di Papiamento, Gabinete Wever-Croes a proclama aña 2018 como Aña di Papiamento.
Idioma di un pais ta su base di cultura. E tesoro di mas balioso di cada pais. Idioma ta uni nacionnan. Y cada un di nos mester ta orguyoso di nos idioma. Ban balora y respeta nos idioma nacional. Ban stima nos dushi Papiamento.
Prome Minister Evelyn Wever Croes, den nomber di Gobierno di Aruba ta felicita e pueblo di Aruba awe riba dia di Papiamento. Pabien Aruba!