ORANJESTAD, Aruba – E team di schisis di Nijmegen, Hulanda tabata na Aruba pa di 4 biaha. Desde dialuna e team di Hulanda hunto cu pediatra, dr. Wicha Ponson-Wever a mira tur mucha te cu 18 aña, kendenan a nace cu schisis na Aruba y diaranson a opera 3 di e muchanan aki.
Schisis ta un defecto cu un hende ta nace cun’e, cual e ta un defecto coginental, asina dr. Ponson-Wever a duna di conoce. Esaki ta un defecto cu persona ta nace cune na su lip, kaak y shel’i boca, cual ta un problema pasobra por ehempel ora cu baby nace e no por bebe bon. Tambe lo bin hopi mas problema despues, pero cu operacion y cu bon guia por trata esey aki na Aruba.
Dr. Ponson-Wever a duna di conoce cu e prome aña tin e control frecuente cerca e pediatra. E meta ta p’e schisis team bin Aruba 1 of 2 biaha pa aña y asina aki mira ki operacion adicional lo ta necesario p’e mucha ey na e momento ey.
Pa di 4 biaha Veronique Borstlap, Orthodontist, ta na Aruba cu e team di schisis. El a duna di conoce cu loke nan a ripara ta cu e pashentnan tabata entusiasma cu nan tabata presente. Durante e bishita nan a papia cu AZV y nan tabata contento cu lo pone mas atencion riba e cuido di boca di pashentnan. El a duna di conoce cu nan a traha bon hunto. Tambe el a tuma contact cu un orthodontist, kende lo bay sigui cuida muchanan cu tin schisis, cual ta algo cu mester na Aruba.
Kaakchirurg, Marloes Nienhuijs, a bin Aruba pa prome biaha y e ta forma parti di team di schisis di Nijmegen. Durante su bishita hunto cu dokter Ponson-Wever, nan a mira tur mucha di Aruba cu tin schisis. Diaranson el a haci 3 operacion y tur cos a bay bon. Marloes Nienhuijs a duna di conoce cu el a gusta con e team di sala di operacion tabata bon prepara y a traha bon cu otro.
Pa Marjan Kloen, Verpleegkundig Schisisconsulent, e siman di a atende muchanan cu tin schisis a bay bon y dokter Ponson-Wever a organisa tur cos fantastico. E momento tabata uno agradabel ora cu por a mira e mayornan y muchanan, unda a papia cu nan. E team di schisis tabata contento di por a mira e muchanan y di por a duna conseho.
Un di e muchanan opera tabata Mia Nicholls y su mama Merelyn Nicholls-Arends a duna di conoce cu e operacion a bay hopi bon. Aunke cu e mucha tabatin dolor ainda, e mama a percura pa sigui e instruccionnan unda cu e mucha mester a bebe tiki awa so. E trato prome y despues di operacion di e team di Hulanda y Aruba tabata bon. Esaki ta di dos biaha cu a opera Mia Nicholls, pero e prome biaha tabata den e edificio bieu y awo ta den e New Bed Tower. Mia Nicholls tin 2 aña ta bayendo logopedista, kende a bishita e pashent pa mira con tabata bayendo cun’e. Merelyn Nicholls-Arends a ripara caba cu e zonido ta diferente y tabata feliz di mira esaki.