Home » Jean Pierre condena na 7 aña di prison pa a bati dos homber di edad cu biga y hasta hinca un tres biaha cu cuchiu

Jean Pierre condena na 7 aña di prison pa a bati dos homber di edad cu biga y hasta hinca un tres biaha cu cuchiu

by Admin
0 comment 205 views

ORANJESTAD – Awe mainta Hues di Corte di Husticia a dicta sentencia den e caso penal cu Ministerio Publico a cuminsa contra e homber J.C. (37).

ARUBA NATIVE por a compronde cu Hues a tuma J.C. na malo pa tur loke el a haci y a condena J.C. na 7 aña di prison, igual na e exigencia di Fiscal.

FISCAL

Dia 20 April 2024 tratamento di e caso a tuma lugar caminda Fiscal a bisa cu diferente persona a bira victima di J.C. Na Parkietenbos, Polis a haya 2 victima homber caminda F.S. tabata den e cas hopi herida mientras cu A.C. tabata na un cas eybanda. F.S. a wordo hiba cu ambulance pa hospital. A haya J.C. na ATCO full sunu. Fiscal a bisa cu e comportacion di J.C. tabata pone Polis pensa cu e lo tabata bou influencia.

Fiscal a bisa Hues cu F.S. a sufri hinca na garganta, schouder y pia. El a sufri fractura na craneo, fractura na ripchi. E mester a keda interna den hospital. A.C. tambe a sufri heridanan y fractura y mester a keda interna. Na opinion di Fiscal, por conclui cu J.C. cu un cuchiu y biga a maltrata F.S. Fiscal ta considera esaki intento di mata. Na ATCO tabatin confrontacion entre empleadonan cu J.C., kende kier a horta dos truck. Fiscal a bisa cu psycologo ta haya cu J.C. tin problema mental door di uso di substancianan. Psycologo ta bisa cu J.C. ta menos responsabel pa su actonan. Fiscal a bisa cu e ta pidi pa declara J.C. liber di e acusacion di ladronicia for di un cas. Fiscal a exigi 7 aña di prison pa J.C. Pa loke ta e demanda di daño material, Fiscal ta compronde loke F.S. a pasa aden. Pero e ta pidi pa declara e demanda no admisibel pasobra e no ta specifica. Pa loke ta e demanda di A.C., el a mustra cu recibo di hospital di cobranza di 8500 florin, ta acceptabel.

SENTENCIA

Hues a bisa cu no a keda proba e ladronicia y ta declara J.C. liber di esaki. Hues a bisa cu e ta haya legalmente proba tur e otro acusacionnan. Hues a bisa cu J.C. a dal F.S. cu biga y a hinca cu cuchiu. E victima mester a wordo cosi y a keda cu sicatriz. Esaki ta haci cu mester cualifica esaki maltrato severo. No por papia di ladronicia di dos truck na ATCO. Hues a bisa cu J.C. a bisa cu el a haci esey pa haya atencion.

Pa cu e castigo, Hues a bisa cu e ta tene cuenta cu J.C. a haci su mes culpable di un serie di delitonan serio. A purba mata un homber (63) door di dale cu biga na cabez y e homber (73) cu a bay yuda e homber cu a wordo maltrata severamente. A purba bay cu dos truck di ATCO. E victimanan a keda afecta di e maltrato di J.C. Hues ta haya cu J.C. su forma di actua ta mustra cu e no tin respet pa pertenencia di hende. Hues a tuma J.C. na malo pa tur esaki.

Hues a sigui bisa cu e ta tene cuenta cu raport di psycologo cu J.C. door di uso di droga y alcohol ta bira hopi agresivo. Psycologo ta haya J.C. menos culpable di su actonan. Hues tambe a menciona cu dos aña pasa, J.C. a wordo condena pa tipo di casonan igual.

Hues a bisa cu e demanda di daño di A.C. di 8416 florin, e ta aproba y J.C. mester paga. Hues a bisa cu e ta pone medida di pago cu ta encera cu si J.C. no paga, e lo bay sera. E otro demanda lo wordo declara no admisibel y por cuminsa un caso civil.

Hues a condena J.C. na 7 aña di prison mas, e parti condicional cu tabata colga riba cabez di J.C. pa un delito cu el a haci anterior.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio