Roslin Kock ta comparti un poco di su trayectoria den mundo social

Trabao social mi kier a para keto na algun aspecto di importancia durante mi trayectoria como trahado social.
Despues di mi estudio na Hulanda mi a drenta servicio na Departamento di Asuntonan Social (e tempo ey Departamento di Cuido Social) na aña ’78. Durante 19 aña mi a eherce e funcion di trahado social na dicho departamento y a traha hopi aña como trahado social den e bario di San Nicolas y tambe como guiado di famia pa esunnan cu yiu interna den internado nan.
Como cu esnan di menos recurso y esunnan mas vulnerabel den nos comunidad ta e grupo cu Departamento di Asuntonan Social ta ofrece yudansa mi tambe a traha cu e grupo aki. E problema nan cu cual tawata acudi serca un trahado social tawata varia di necesidad nan basico, p..e. falta di cuminda, lugar di biba, te cu problemanan personal, familiar y den bario. Problema nan financiero y desempleo sigur tawata forma parti di esaki y cu tur su consecuencia nan pa e persona, e famia y otronan cu ta rondona e persona. E consecuencia nan por encera mas problema manera comunicacion desbalansa, violencia domestico, diferente tipo di abuso (di mucha), mal uzo di droga (incluyendo alcohol). Mayoria biaha un combinacion di problema y tambe uno compleho.
Durante mi trayectorio e punto di salida ora di atende cu un problema tawata e necesidad manera cu e hende of hendenan ta trece padilanti. E yudansa ta dirigi pa wak con leu por trece alivio directo pero tambe con pa ofrece un yudansa cu por ta mas duradero y structural. A base di un relacion di confiansa cu e cliente y cu su participacion activo ta busca manera nan pa logra esey. Respet y comprension pa e situacion di e cliente tawata fundamental y hopi esfuerso a wordo haci pa logra esaki. P.e. haci bishita di cas y conoce e ambiente unda e cliente/famia ta biba tawata esencial.
Mayoria biaha e yudansa aki ta exigi un cooperacion estrecho cu otro profesional y instancia nan. E disponibilidad pa traha hunto sigur tawata presente. Falta di posibilidad di trabao, vivienda pagabel, transportacion accesibel, lugar pa cuido di yiu ta djies algun ehempel cu a stroba pa yega na un solucion mas duradero. Pues e cliente nan tawata keda acudi na e trahado social pa haya alivio den nan situacion. Hopi biaha pa e mesun problema.
Fuera di a traha cu cliente y cu famia tambe a ofrece yudansa na otro tipo di necesidad nan den bario. Den preparacion y ehecucion di tur e proyectonan aki a traha hunto cu e hendenan directamente envolvi, otro instancia y profesionalnan.
Pa menciona algun den añanan ’80 y comienso di ‘90:
Proyecto di tienda cu paña y mueble segunda mano pa esunnan di menos recurso. Akinan a apoya y coordina e iniciativa di un grupo di hende den e bario di San Nicolas,
Proyecto na e bario di Esso Heights. Aki a guia cu participacion activo di e habitante nan pa uso efectivo y eficiente di facilidad nan sanitario pa e bario.
Proyecto buki di informacion pa mayornan; hunto cu otro colega a compila y publica informacion nan valioso y practico pa mayornan/educadornan
Centro di informacion na San Nicolas; hunto cu traha documentario di Osticeba a organisa encuentro nan informativo relaciona cu necesidadnan reinante den bario. Alabes a trata pa mas servicio di gobierno bira mas accesibel pa e habitantenan.
Keho di grupo di mayor cu yiunan cu deficiencia fisico interna den exterior. A realisa un biahe pa e instituto hunto cu mayor y otro profesional pa haci investigacion di e kehonan. Resultado di investigacion a bay pa e mandatario responsabel.
Teniendo na cuenta cu mayoria di e problema nan presenta tawata exigi un solucion mas duradero y structural mi persona a forma parti of a participa activamente na hopi iniciativanan den comunidad unda tawata pidi atencion(di gobierno) pa problemanan social reinante. Algo positivo tawata cu na diferente manera y dor di diferente organisacion/agrupacion e situacion social tawata haya atencion. Asina por menciona algun; sindicatonan y nan revista, gruponan di hende muhe, programa radial, teatro pa pueblo (teatroforo), asociacion di trahadonan social, gruponan saliendo na defensa di naturalesa.
Lastimamente e atencion di mandatarionan y esunnan responsabel pa maneho no tawata satisfactorio y no a conduci na un vision y maneho integral y structural riba tereno social.
Reflexionando riba e tema internacional pa e luna di trabao social di 2017 y 2018 mi tin cu bisa cu durante mi trayectoria mayoria trahado social a haci esfuerso serio y dirigi pa por brinda esnan den necesidad un yudansa duradero y sostenibel. No obstante e esfuerso aki por conclui cu e logro no tawata satisfactorio. Pa por a logra esaki esnan encarga cu maneho y cu responsabilidad final pa yudansa na hendenan den necesidad mester a percura e.o. pa lo siguiente:
Disponibilidad di data y uzo di esakinan pa por organisa e yudansa di organisacion nan dirigi riba necesidad cerca e hende, e famia den bario/pueblo,
Un vision y maneho integral riba tereno social,
Un structura di comunicacion permanente cu tur esunnan involvi den e trabao social,
Un sistema di cuido efectivo y structural pa tur e profesionalnan por keda cu e actitud profesional y cu e conocemento necesario den nan funcion,
Un vigilancia di calidad y sin cronisacion di yudansa pa esunnan cu ta acudi serca un profesional riba tereno social.