“Scucha mi palabranan bunita pero no wak mi echonan mahos”, asina mester defini e actitud di e parlamentario di AVP, Richard Arends kende tur dia ta comenta riba e situacion financiero di pais Aruba haciendo como sifuera cu su gobierno di AVP a haci un tremendo trabao pero ta lubida cu e tambe a forma parti di e destruccion di nos finansa publico. Ta parce cu awendia tur cos sr. Arends sa miho cu nos Minister di Finansa actual y ta haci como sifuera cu inteligencia riba e materia financiero a cuminsa cerca dje y ta caba cerca dje. Pero realidad ta cu e mes ta bay den historia como e experto financiero fracasa di Gabinete Eman.
Consehero financiero fracasa
Ta increibel cuanto daño sr. Arends a comete na pais Aruba ya cu siendo e supuesto experto financiero pa partido AVP, el a wordo asigna como e consehero principal di Gabinete Mike Eman desde aña 2010 y pa cu e funcion aki e tabatin un arbeidsovereenkomst desde e aña ey caba. Resultado di tur su consehonan cu el a duna na Minister di Finansa Mike de Meza y despues Minister Juan David Irausquin tabata cu e deficit financiero di pais Aruba a ser aumenta drasticamente den periodo di algun aña: Deficit na 2010: -188.6 miyon florin, 2011: -325.2 miyon, 2012: -443.3 miyon, 2013: -332.8 miyon florin y 2014: -405.8 florin. Un total na deficit di -1695.7 miyon florin (-1.7 Biyon florin!). Pues ta bisto cu tur su consehonan no a yuda na net nada pa frena e desaroyo negativo di nos finansa publico cu a inicia caba desde 2010 en adelante. Sinembargo kico tabata e recompensa pa e trabao mal haci aki di sr. Richard Arends?
Recompensa pa mal trabao
Su recompensa tabata cu den un reunion di Conseho di Ministro di dia 1 di augustus 2014 a ser dicidi cu e arbeidsovereenkomst di sr. Richard Arends ta ser converti den un dienstverleningsovereenkomst cu Horizon Consultancy Group entrante 1 di augustus 2014. Pues sr. Arends a dicidi di kita for di gobierno como empleado pa asina e bay over como consultant. Cu e contracto di consultancy aki sr. Arends na lugar di ricibi un salario como coordinador di mas o menos 8 mil florin pa luna, a cuminsa cobra 25 mil florin pa luna. Pues tres biaha mas den tur e fiestamento cu placa di pueblo.
Anto ta e tipo di politiconan aki manera sr. Arends cu tur dia ta cuestiona e maneho financiero hiba pa e gobierno actual, siendo cu e tabata parti di e fiestamento cu placa di pueblo, sin cu su consehonan como experto financiero a yuda soluciona e debacle financiero cu e mes a yuda crea. Tipo di conseheronan asina ta cay den e categoria di ’12 ambachten en 13 ongelukken’.