ORANJESTAD – Algun luna atras, pa ta exacto, riba 17 di augustus 2017 a drenta na vigor e decreto nacional Proteccion di Flora y Fauna di Aruba. E ley ta brinda proteccion na un cantidad di 69 bestia y 55 mata y ta un ampliacion di e Natuurbeschermingsverordening di 1995. E ampliacion di lista a tuma luga depues cu un comision a revisa e lista di e sortonan cu ya caba ta protegi internacionalmente bou di CITES y SPAW.
Departamento di Naturalesa y Medio Ambiente (Directie Natuur en Milieu – DNM) kier trece algun punto padilanti na unda ta elabora y enfoca riba algun sorto cu ta aparece den ley, y asina conscientisa, tambe educa, e pueblo riba e matanan y bestianan cu ta protegi.
E ley claramente ta describi cu ta prohibi pa mata, y causa daño, na un cantidad di mata y bestianan cu ta aparece den e decreto nacional Proteccion Flora y Fauna. Articulo 1 di e decreto ta ilustra e sortonan den detaye cu e nomber scientifico y e probabel nomber local. Den articulo 1 ta aparece esunan cu ta bou di menasa di extincion mundialmente, y cu nan ta aparece ainda na Aruba of tawata presente un tempo.
For di e lista di flora nos a scoge: 1. Agave Arubensis – Cuco di Indjan; 2. Agave rutenniae/ Rutteniae; 3. Brassavola nodosa – Orkidia (di Mondi); 4. Bursera simaruba – Palisia Cora;
5. Bromelia humilis – Teco.
Nomber scientifico: Agave arubensis
Nomber local: Cuco di indjan
Famia: Asparagaceae
E Agave arubensis, ta hay’e na un un sitio so na Aruba, bo ta hay’e riba calichi pazuid di Fontein, cerca di e drumidera y e ta crece unicamente na Aruba. E sortonan di agave endemico su existencia ta menasa door di construccion di casnan y bendemendo di matanan pa landscaping. E ta un mata endemico cu ta crece den forma di un rozet. E blachinan ta suculento y cu puntanan cu ta hinca (stekels). E ta floria geel.