Un ex agente policial di 28 aña di Rotterdam a wordo condena na seis luna di prizon, despues cu el a pasa informacion confidencial for di sistemanan di polis na personanan den circuito criminal.
Durante un periodo di aproximadamente dos aña, e muhe a usa sistemanan interno di polis pa busca informacion tocante diferente persona y despues pasa e informacion ey na otro persona.
E tabata traha na Zeehavenpolitie di Rotterdam y tambe tabata siguiendo su formacion como agente di polis.
Segun investigacion, el a busca informacion tocante dos homber cu tabata conoci pa polis y tambe nan famia. Entre otro, el a pasa informacion tocante controlnan na waf, investigacionnan policial, number di plachi di auto y numbernan di identificacion personal.
E caso a sali na cla despues cu polis a confisca un telefon den otro investigacion criminal. Den e telefon tabatin potret9¹ di un aplicacion policial cu tabata duna acceso na sistemanan interno di polis.
Investigacion di su actividadnan den e sistemanan y informacion riba su propio telefon a conduci na e agente. El a wordo deteni dia 9 di juli 2025 y a reconoce cu el a comete e hechonan.
Durante e proceso, su abogado a declara cu e muhe tabata wordo amenaza y someti na presion pa pasa e informacion. Sin embargo, hof a considera cu no tabatin suficiente prueba pa confirma e argumentonan.
Hof a conclui cu e agente a haci mal uzo di su posicion y a viola e confianza cu ciudadano mester por tin den polis.
Ademas di e condena di seis luna di prizon, e tribunal a prohibi e muhe di traha como funcionario publico durante cinco aña.
Source: AD, 20 di november 2026.