Home » Minister Sterk ta bishita Aruba pa Consulta Gubernamental di Cuater Pais tocante salubridad publico

Minister Sterk ta bishita Aruba pa Consulta Gubernamental di Cuater Pais tocante salubridad publico

by Admin
0 comments 13 views

 

Minister Mirjam Sterk (Cuido di Largo Plaso, Hubentud y Deporte) lo participa riba diaranson, 19 di november, den e Consulta Gubernamental di Cuater Pais di Salubridad Publico, hunto cu e ministernan di Aruba, Corsou y Sint Maarten. Minister Sterk lo liderá e delegacion di Hulanda Europeo y Hulanda Caribense. E Consulta di Cuater Pais tocante maneho conhunto di salubridad den Reino Hulandes ta tuma luga e aña aki na Aruba.

Boneiro, Saba y Sint Eustatius

Ora e yega na Aruba, e minister lo reuni cu e miembronan di e delegacion di Hulanda Caribense: Diputado di Sint Eustatius Reuben Merkman, Diputado di Saba Eviton Heyliger y Diputado di Boneiro Timoteo Silberie. E reunionnan aki ta pa preparacion pa e Consulta Gubernamental di Cuater Pais tocante Salubridad Publico.

Aruba, Corsou y Sint Maarten

Prome cu e Consulta Gubernamental di Cuater Pais riba diaranson, e minister lo reuni cu Melvin Wyatt-Ras, Minister di Salubridad Publico, Asuntonan Social, Cuido pa Mayornan y Adiccion di Aruba; cu Claret Connor, Minister di Salubridad Publico, Desaroyo Social y Labor di Sint Maarten; y cu Tyron Boekhoudt, Minister di Salubridad, Medio Ambiente y Naturalesa di Corsou.

Bishita na hospitalnan na Aruba

Riba diabierne, e minister lo reuni cu Mike Eman, Minister Presidente di Aruba, y Gerlien Croes, Vice Minister Presidente. Despues di esaki, e lo reuni cu Alfonso Boekhoudt, Gobernador di Aruba. Ademas, e lo bishita e hospitalnan Horacio Oduber Hospitaal (HOH) y Instituto Medico San Nicolas (IMSAN) pa haña un miho bista riba e desaroyonan dentro di e cuido di salud den e di dos liña na Aruba. E bishitanan aki ta tuma luga tambe cu atencion pa e habitantenan di e islanan BES.

Riba diasabra, Minister Sterk lo tin un combersacion cu Frits Goedgedrag, presidente di e Comision di Salud Hulanda Caribense 2025.

You may also like