Home » Bon trabou policial ta cuminsa cu un bon maneho di organisacion

Bon trabou policial ta cuminsa cu un bon maneho di organisacion

by Admin
0 comments 6 views

 

 

Willemstad, 15 di november 2026 – Un bon maneho di organisacion ta indispensabel pa bon trabou policial, pero den organisacionnan policial e no ta ricibi semper e atencion cu e ta merece. Esaki tabata un di e mensahenan central di Conferencia di ‘Bedrijfsvoering’ Operacion di Negoshi’ , cu a tuma luga na Corsou dia 12 y 13 di november.

 

Casi 80 empleado y dirigente di cuerponan di polis di Aruba, Corsou, Sint Maarten y Hulanda Caribense, y di Recherche Samenwerkingsteam (RST), a participa na e conferencia. Tabata di prome biaha cu a organisa un reunion di e tipo aki pa empleadonan di bedrijfsvoering di e organisacionnan aki. E Colegio di Hefe di Polis y Plataforma di Hefenan di Bedrijfsvoering Caribe (PHBC) a organisa e conferencia. E meta tabata pa reuni empleadonan di e diferente organisacionnan y traha hunto riba desaroyo di bedrijfsvoering pa e periodo 2027–2030.

 

E curason di e organisacion

Durante e apertura, Carl John, presidente di e Colegio di Hefe di Polis, a yama bedrijfsvoering e curason di e organisacion policial. Tras di e trabou policial cu hende ta mira tin un cantidad grandi di actividadnan di sosten. Empleadonan di bedrijfsvoering ta percura, entre otro, pa contratacion y formacion di personal, maneho di vehiculonan y edificionan, sistemanan di ICT cu ta funciona bon y uso responsabel di recursonan financiero.

Pa cuerponan di polis den Caribe, esaki no ta semper facil. E departamentonan di bedrijfsvoering ta relativamente chikito y mester cumpli cu hopi tarea cu capacidad limita. Conocemento specialisa no ta semper disponibel y empleadonan hopi biaha ta cumpli cu diferente tarea. P’esey, cooperacion y compartimento di conocemento entre e cuerponan di polis ta importante.

 

Bedrijfsvoering ta merece un posicion completo den e organisacion

Raymond Ellis, hefe di polis di Corsou, a papia durante su sesion di inspiracion tocante e posicion di bedrijfsvoering den polis. El a enfatisa cu mester haci mihor uso di e conocemento di empleadonan di bedrijfsvoering ora ta tuma decisionnan importante. Por ehempel, ampliacion di capacidad di investigacion tin consecuencianan pa planificacion di personal, formacion y facilidadnan di trabou.

 

Ellis a expresa tambe su aprecio pa e empleadonan cu tur dia ta percura pa e organisacionnan policial por funciona. Segun dje, un posicion mas fuerte pa bedrijfsvoering ta exigi tambe atencion pa desaroyo profesional di e empleadonan aki y oportunidad pa nan aporta nan conocemento y experiencia na desaroyo di e cuerponan di polis.

 

Trahando hunto na bedrijfsvoering di 2030

E Plan di Desaroyo di Bedrijfsvoering 2027–2030 tabata central durante e conferencia. Den e plan aki a describi ocho direccion di desaroyo pa sigui profesionalisa bedrijfsvoering, entre otro digitalisacion, personal y capacidad, y compra y maneho di contractnan.

 

Durante sesionnan di trabou, e participantenan a discuti cua mehoracionnan ta necesario y na cua tereno e cuerponan por coopera mas, por ehempel den compartimento di conocemento specialisa, formacion hunto y intercambio di manera di traha. E mesanan tematico a duna empleadonan di e mesun area profesional oportunidad pa comparti experiencianan di nan trabou diario. Pa hopi participante, tabata tambe di prome biaha cu nan a topa personalmente cu nan coleganan di otro isla.

 

Atencion pa desaroyo profesional

Banda di e sesionnan di trabou, e participantenan por a sigui masterclassnan tocante inteligencia artificial (AI), desaroyo personal, bedrijfsvoering den estadonan insular chikito y con pa trata cu interesnan diferente y resistencia na trabou. E masterclassnan tabata dirigi riba asuntonan practico cu empleadonan ta topa den nan trabou. Asina a discuti cua posibilidadnan AI ta ofrece pa bedrijfsvoering y con estadonan insular chikito por trata cu nan escala y capacidad limita.

 

Continuacion

E conferencia a produci ideanan y proposicionnan pa sigui elabora e Plan di Desaroyo di Bedrijfsvoering 2027–2030. For di e conversacionnan a resulta cu e departamentonan di bedrijfsvoering di e diferente cuerponan di polis hopi biaha ta enfrenta e mesun problemanan. P’esey, e participantenan ta mira posibilidadnan pa siña mas di experiencianan di otro y a expresa e deseo pa organisa un reunion di e tipo aki mas frecuentemente. PHBC lo usa e resultadonan di e conferencia pa sigui elabora e plan.

You may also like