Awo ni den bo auto bo no ta sigur mas, grupo di hoben ta maltrata homber y ta baha na awa cu 600 florin y su pickup.
Oranjestad: Diaranson algo pasa di mey anochi, central di polis ta manda un patruya cu urgencia den Hendrikstraat pa un supuesto atraco y maltrato.
Na yegada enberdad nan ta topa cu un homber kende ta declara cu e tabata den su auto den Ranchostraat ora ela yega na final di e caminda ela duna un auto preferencia wardando e auto pasa, di golpi un grupo di 6 mucha homber a cana bin den su direccion. E 6 mucha homber nan aki a dal’e y ela baha for di su pickup pa bay defende su mes, pero mirando cu nan tabata hopi e no por a defende su mes di e 6 mucha homber nan aki.
Ela nota cu nan tabata tin short bisti cu tshirt blanco, ela nota tambe cu nan tabata tin un tas chikito y tur nan cabey tabata manera rasta.
Un di e mucha hombernan a subi den e pickup Isuzu Blanco di e homber y a bay cune for di e sitio. Tambe nan a kita su cartera for di dje y su cellular di marca Samsung J2. E victima a logra haya su cartera bek, pero no e 600 florin cu e tabata tin den e cartera.
Na altura di Taco Bell ela logra haya su auto bek, pero e yabi no tabata den dje. Mientras polis tabata tumando declaracion di e victima, a yega un dama cu e yabi di e pickup den su man. Segun e dama, un mucha homber cabey manera rasta a dune e yabi y a core bay.
Despues cu polis a tuma declaracion di e victima, un testigo a presenta na e sitio y a declara cu ela mira kiko a pasa, cu e pickup a para na final di e caminda pa duna un otro auto preferencia y cu e 6 mucha hombernan a acerca e auto y nan a maltrata e homber. Tambe ela bisa cu e homber a baha for di su pickup pa defende su curpa pero e 6 mucha hombernan tabata di mas pe. Ela mira cu enberdad un di e hobennan aki a coi pickup di e homber y a bay cune.
E victima no kier a entrega un keho oficial y no tabata desea ayudo di polis. E agentenan na e sitio a informa centraal di polis y tambe nan chef di e sucedido.