ORANJESTAD – Luna di september ta luna den cual nos ta dedica atencion na e importancia di conserva nos Monumentonan como herencia cultural fisico pa e generacion cu ta sigui nos. E conservacion di nos herencia cultural no ta un luho, pero un nececidad pa e formacion di e generacion cu ta sigui nos. Den e cuadro aki, Minister di Cultura, sra. mr. Xiomara Ruiz- Maduro ta anuncia cu dia 24 di augustus 2018 su persona a aproba version 2.0 di e Manual di Monumento pa Aruba, e Monumentenhandboek di Aruba.
E promer version ta data di aña 2016 na unda cu colega Minister Otmar Oduber e tempo ey como Minister di Cultura a aproba e promer version. Pero practica y e maneho actual pa conserva nos herencia cultural, a trece cune e nececidad di adapta e Manual di Monumento. E manual ta contene, entre otro, e leynan, e criteria di seleccion di monumento A y B, e lista di monumento proteha, e liña di guia tecnico y e skema di color. Esnan interesa por haya un copia di e manual aki na Monumentenbureau na Schelpstraat 26-38. E formulario pa permiso di monumento ta obtenibel na e forma digital via www.gobierno.aw.
Ta bon pa splika cu e cuido di monumento na Aruba ta den man di tres organisacion. Conseho di Monumento (Monumentenraad) cu ta duna conseho na e Minister di Cultura y ta wordo scucha ora di indica un monumento pa proteccion y ora ta bay duna un permiso. Fundacion Fondo pa Monumento (Monumentenfonds) cu ta encarga cu e parti financiero pa e monumentonan y Monumentenbureau cu ta un departamento di Gobierno encarga cu tur asuntonan general di monumento, maneho, permiso, proteccion y educacion di monumento, restauracion y tur asuntonan tecnico y alabes ta e instituto di conocemento di monumento.
Minister di Cultura ta gradici Monumentenbureau y tur otro instancia y persona cu a haci e Manual di Monumento posibel y ta invita Pueblo en general pa nos dedica luna di september na explora y sera conoci cu nos Monumentonan.