ORANJESTAD, Aruba – E seleccion nacional ta den pleno preparacion pa enfrenta e ekipo nacional di Bermuda den “CONCACAF Nations League” cu lo tuma luga e fin di siman aki na Corsou. Desde April hungadonan selecciona di e teamnan local cu a forma e seleccion nacional a cuminsa train cu otro, wardando riba e resto di hungadonan cu a yega dialuna ultimo.
Tur hungado a haya oportunidad di conoce otro door di cuminsa e dia hunto. Diamars mainta e 22 hungadonan den e seleccion nacional a cuminsa train y e sigui atrobe anochi. Martin Koopman, Head Coach y Marvic Bermudez, Assistent di coach, ta trahando cu e seleccion pa nan prome wega.
E training a cuminsa mainta cu e hungadonan cu por tabata presente pasobra tin algun cu ta traha y studia, asina Martin Koopman a splica. Anochi e team tabata completo pa por a traha cu tur hende p’e wega di dia 9 di September. Den e periodo cortico cu nan tin, e coachnan ta percurando pa crea un team, pero ta haciendo tur cos p’e hungadonan custumbra cu otro. E parti bon ta cu pa haci esaki nan ta kedando hunto na hotel y henter dia ta pasa cu otro.
A papia riba e forma con ta siña conoce otro pero tambe con lo hunga. “Ta buscando pa forma un team”, el a expresa. E seleccion nacional ta entrenando tur dia pa nan wega di CONCACAF Nations League. Diabierna dia 7 di September pa 6’or di atardi nan lo biaha pa Corsou.