Antesala di Play-Off di Division Honor 2017-2018

Play-off di Aruba su futbol maximo a yega finalmente, despues di un campeonato impredicibel competitivo y dramatico. Dies ekiponan tabatin den comienso, awo ta cuater so a keda na pia pa bay bataya den e siguiente fase pa e titulo maximo di nos futbol. E cuater miho ekiponan di Aruba di e campeonato aki cu a cualifica pa e rond aki ta Dakota, Estrella, Nacional, y Britannia.

E etapa di play-off aki ta un competencia “round robin” unda tur cuater ekipo ta bay hunga cu otro dos biaha, na final di e fase e dos ekiponan cu mas punto lo cualifica pa e ‘play-off final’ di dos wega entre nan pa asina dicidi e campeon y sub campeon di Aruba. Opinion nan ta dividi dependiendo ken bo puntra ta cua ekipo lo titula campeon e anja aki, tin hopi factornan cu por afecta e resultado final, e condicion fisico y mental di un ekipo, plantamiento y strategia riba tereno, y otro factor nan.

Ken ta bo favorito pa bay cu e titulo e anja aki? Nos ta purba trece un poco claridad den e asunto aki. Esaki ta nos observacion riba con e play-off por drei e anja aki basa riba prestacion di e oncenanan den e campeonato regular.

Dakota

E ekipo geel cu preto a sabi di caba e campeonato na cabes di e tabla di clasificacion, un honor sin duda, pero e titulo di campeonato regular no ta ni wordo menciona den e seno di e Dakoteronan. Den pasado a yega di termina e  campeonato regular como lider caba pa despues bay perde den play-off, na final di e storia t’esun cu gana play-off lo bay ta e campeon maximo, nan sa esey hopi bon. Dakota tabata e ekipo cu a pasa mas tempo liderando e clasificacion general w campeonato 2017-2018, apesar cu den e di dos mita di e campeonato nan a perde e liderato debi na un racha negativo cortico for di dia cu na a perde e final di ‘Copa Betico’ contra Estrella. Nan puntonan mas abou tabata nan empate sin gol cu La Fama den siman 13 y e derota inespera na man di Riverplate den siman 14. Na nos padece Dakota a haya falta di e presencia y wega di Jesus Peñate despues di su partida pa Hulanda, causando un bahada den nan average di gol di 2.40 den e prome mita di campeonato vs 1.42 den e di dos mita. Na final di campeonato regular parse cu Dakota a recupera nan forma atrobe culminando cu nan victoria contundente riba RCA den e ultimo fecha di campeonato regular pa bay como lider riba e tabla.

Forsa di Dakota ta sin duda nan velocidad den atake y nan defensa cu a permiti solamente 17 gol den nan contra henter temporada (algo cu hopi hende no ta realisa), danki na e presencia di un di e miho defensor central di nos isla den persona di Paul Nickenson. Nan oportunidad ta den e wega mental, nan lo por mantene disciplina riba cancha pa 90 minuut y hunga nan wega di acuerdo cu nan plan? Nan lo por keda sin perde nan beis riba tereno? Si nan hasi esey nan ta un di e favoritonan pa gana e anja aki.

Estrella

E ‘Naranjadanan di Santa Cruz’ tabatin un solido campeonato y ta bek den play-off di Division Honor basa riba hopi consistencia den nan wega cu un “team spirit” envidiabel, ganado di e trofeo ‘Copa Betico’, y tambe a yega na lidera e tabla pa un paar di siman, nan a caba e campanja solido den di dos luga. Si tin un ekipo completo y consistente den e anja aki, esey ta Estrella. Nan ta balansa di patras te dilanti, nan wega di ekipo ta solido y mane a menciona caba nan motivacion colectivo lidera pa nan capitan Francois ‘Pancho’ Croes ta un di e mihonan na Aruba.

Forsa di Estrella ta nan wega colectivo (samenspel) y nan motivacion, cu un solido ofensiva ancra den midveld pa Phaedrick Baromeo, nan defensa tambe ta solido cu un portero sigur. Nan oportunidad por ta den nan delanteronan despues di e perdida di Norvianel Naar nan di dos ‘goalgetter’ despues di Hugo Robert. Tin rumores nan ta core cu Estrella lo por haya ayudo pa play-off den e area aki di parti di Jean Pierre van der Linden, si t’asina, esey lo ta un tremendo noticia pa e ekipo di Santa Cruz y nan aspiracion pa gana e titulo e anja aki.

Deportivo Nacional

E campeon nan di Aruba tabatin un campanja 2017-2018 digno di un campeon. E prome mita di e campeonato no tabata mucho cos cu nos ta custuma di e ekipo nortero, tabatin falta di Devis Oliveros, e ganado di e ultimo ‘Balon D’Or’di Aruba, pero, cu su yegada den e di dos mita di e temporada a sabi di injecta un formula ganado impresionante pa Nacional. Oliveros, cu ta mas importante cu ‘just pa anota gol’ pa Nacional, ta un hungado completo cu por pasa bala y hasta defende si mester, asina mes el a caba e anja cu 13 gol, empata den e di dos luga riba e lista di goleadornan di Divison Honor, e lista lidera pa su mesun companjero di ekipo, e sensacional Kenroy Ranger cu a caba cu 17 tanto. Na tres cuarto di e campeonato Nacional a bay lidera e tabla di clasificacion, pero despues a yega tambe e viahe pa bay hunga den e ‘Caribbean Club Shield’, e torneo regional Caribeño na Santiago, Republica Dominicana, unda nan a logra di cuarto luga, pa despues bolbe bek  Aruba pa liher liher caba nan temporada, un schedule brutal di 8 wega den menos cu tres siman entre e dos torneonan. Nacional asina a keda den di tres luga riba e tabla pa un diferencia minimo realmente. Hecho ta cu Nacional por a wel di caba e campanja na di prome luga si no tabata pa e circumstancianan. Un ekipo solido, disciplina, bon plantea y fisicamente e mas duro di nos futbol. Nan ta bin pa hunga nan wega sea bo ta gusta of no, nan style ta pa impone nan wega a base di forsa, y cu dos goleador di rasa dilanti, e wega den midveld di Valdo Leocadio, nan ta candidato serio pa ripiti como campeon.

Forsa di Nacional ta nan wega fisico, pressing halto, imponiendo nan wega riba e rival cu un mentalidad fuerte, cu un ofensiva relampago pa medio di nan dos goleadornan. Nan oportunidad por ta den nan defensa, si e volantenan di contencion no duna resultado of si e pressing halto faya, e otro factor por ta nan wega duro, si nan no midie bon y asina cumula carchinan.

Britannia

E ekipo di Piedra Plat ta miho cu nan mes ta pensa, esey ta loke nan mester realisa. Nan clasificacion, apesar cu ta como e di cuater ekipo riba tabla, no tabata un accident, nan ta merece di ta den e mihor cuaternan di Division Honor. Nan campanja  tabata solido, cu futbol ofensivo y bistoso cu algun victoria impresionante contra ekiponan grandi, mane esun contra Nacional casi na final di campeonato, pero, tipico di Britannia tambe tabata di gana of duna bataya duro na un ekipo den top y bira perde punto cu un ekipo inferior. Britannia ta un ‘top club’ cu ta den play-off y lo midi forsa cu e grandinan, ta nan chens di briya awo. Nan ofensiva ta bon den pianan di Luis Estrada y Sebastian Montoya, pero ta ken ta bay contene den medio campo pa compensa pa Estrada ora bay den atake pa yuda nan defensa, esey falta pa clarifica, eynan tin trabou pa hasi.

Forsa di Britannia ta definitivamente nan posesion di bala y nan rotacion riba cancha, e pumanan ta purba di hunga e bala pa medio di ‘bal bezit’, nan pase di bala ta hopi bon y velocidad di nan atakantenan tambe ta sobresaliente. Si nan por mantene nan disciplina di ehecucion nan lo por sorprende. Nan oportunidad ta consistencia pa cu nan ehecusion, nan wega ta uno di pasenshi y mester di mantene nan plan di wega, ta ora nan perde esey nan ta laga hopi buraco atras, nan volante di contencion ta hasi falta tin biaha. Toch Britannia mester kere mas den nan mes, esey lo yuda hopi den nan anhelo di sali campeon di Aruba su futbol maximo.

E anja aki tabatin hopi paridad den Division Honor, e campeonato regular a bay te ultimo dia pa dicidi e clasificacion final y e cuponan pa play-off y tambe degradacion. Ta cuater ekipo so a keda pa dicidi ken ta bay final, pero play-off ta un otro storia compara cu campeonato regular, ta manera un mini campeonato ful di nobo, e enfoce ta mas skerpi entre menos ekiponan, cu ya a logra observa hopi di otro den e campeonato regular, dus, awo cu mas conosimento entre e ekiponan nan, ta duna e weganan venidero un dimension hopi diferente, locual nos a wak te cu awo por cambia completamente pa play-off, tuma nota.

Nos deseo ta pa e miho ekipo gana e titulo sin interferencia ajeno na e wega ‘sportief’, pa e ekiponan hunga limpi y honesto p’asina hasi e trabou di e curpa di arbitrahe mas efectivo, claro, niun wega ta perfecto, p’esey mes ta existi regla y arbitrahe. Ban spera cu e organisacion completo di futbol di Aruba, e oficialnan, e clubnan mes y nan fanaticonan, y sin lubida ‘medio di comunicacion, tur por coopera pa hasi e play-off aki e miho di tur tempo, p’asina tambe engrandece nos futbol y e futuro di e deporte rey riba nos dushi isla.