Home » Premio Nacional di Teatro 2024

Premio Nacional di Teatro 2024

Instituto Pedagogico Arubano. (CKV Teatro)

by Admin
0 comment 139 views

 

Den un ambiente masha placentero y familiar mes, na Instituto Pedagogico Arubano, (IPA), Director di Departamento di Cultura Aruba drs. Siegfried Dumfries, a haci anuncio oficial di Premio Nacional di Teatro na drs Marilyn Richardson, kende ta Algemeen directeur di Instituto Pedagogico Arubano.

Riba Dia Mundial di Teatro 27 di maart, den un sala completamente yen cu’n diversidad di expreson y pensamento artistico y creativo; a ser entrega e Premio Nacional di Teatro 2024 na Instituto Pedagogico Arubano. (CKV Teatro) y den e mesun rosea a ser entrega diferente reconocemento special na maestronan di nivel superior di teatro manera: Amy Lasten, Fenke Hooijmaaijers, Gloria Bryce, Olga G van Bochove , Daylan Krozendijk , Emerita Emerencia, Emira Tromp, Cecilia Besselink, Takhai Mohammed, Angelo Luis Angela, Jarmine Medina-Acosta, Madeleine Kelly, Joan Danies, Mario Flores, Daylan Krozendijk, tur esaki como muestra di aprecio y balor pa nan tremendo trabao y aporte pedagogico brinda na bienestar y desaroyo di teatro aki na Aruba.

Tur aña ta ser entrega un obra di arte crea pa e artista Sr. Frank Croes, cu a traha e deseño di tur e reconocementonan entrega den pasado y for di 2019 a cuminsa c’un obra nobo cu su persona a yama: Alma Liber.

Tambe a ser entrega un certificado personalisa di Premio y Reconocemento Special cu Ministerio di cultura Aruba, conhuntamente cu Departamento di Cultura a firma pa haci entrega oficial durante e anochi maraviyoso di celebracion.

Titulo di Obra: Alma Liber. Poema: Habri bo halanan Bula, Bay den tur libertad, Crusa frontera, No laganan gara bo, No laganan silencia bo, Sigui Expresa. Bo ta crea, Bo ta skirbi, Bo ta declama, Bo ta actua, Bo ta balia, Bo ta Alma Liber. Autor: Frank Croes.

RESUMEN DI PASADO DI PREMIO NACIONAL DI TEATRO OTORGA PA DEPARTAMENTO DI CULTURA ARUBA CONHUNTAMENTE CU MINISTERIO DI CULTURA ARUBA FOR DI AÑA 2004 TE CU 2024.  

Na aña 2004, señor Jhon Freddy T. Montoya, a drenta den servicio di Instituto di cultura Aruba y su prome proyecto oficial presenta tabata e Celebracion Nacional di Dia Mundial di Teatro, idea cu a nace despues di a celebra e prome lustro di e exitoso tayernan di formacion teatral brinda na comunidad na ex John F.  Kennedy Scol, na unda mas di 1000 alumno, tanto mucha, Hoben y adulto a forma parti protagonico.

Cada aña ta otorga e Premio Nacional di Teatro na un persona, grupo of fundacion cu a traha y cu a contribui grandemente cu e desaroyo di teatro na Aruba:

Na aña 2005, A tuma luga e prome edicion di Celebracion di Dia Mundial di Teatro y a presenta full un siman teatral, na unda e grupo di teatro local Asociacion MASCARUBA a bay cu e prome Premio Nacional di Teatro, como reconocemento pa nan 44 aña di existencia e aña ey, ademas di e trabou incansabel pa desaroyo di teatro den nos comunidad y representacion na nivel nacional y internacional. Ademas e grupo aki a lanta for di mesun aña cu a tene e celebracion aki, mundialmente.

Na aña 2006, e autor, critico, actor, periodista y director di teatro señor Juby Naar (dfm), a bay cu e reconocemento aki bon mereci pa su valioso aporte y añanan di experiencia den e ramo artístico aki, contribuyendo grandemente den e mundo teatral den nos comunidad.

Na aña 2007, e maestro, directora y actriz señora Amy Lasten a haya e reconocemento aki pa su incansabel aporte y trayectoria trahando specialmente cu hoben y su dedicacion como maestro di teatro. Ademas señora Lasten a traha, durante su funcion di encargado di e Seccion di Teatro na Instituto di Cultura Aruba, diferente tayer y festival, manera FESTESECO cu a crea un impacto exitoso plantando un simiya grandi den curason di diferente hoben cu awendia ta desaroyando nan mes grandemente den e mundo aki.

Na aña 2008, e autor, director, actor y compositora señora Carmen Herrera y grupo teatral Kibrahacha a conkista e logro aki pa su añanan di experencia y representacionnan na nivel nacional e internacional, na unda a registra diferente obra den un forma magistral den un buki cu ilustracion y cantica cu a uza den cada obra.

Na aña 2009, e autor, director y actor, señor Oslin Boekhoudt (dfm)a conkista e logro aki pa tur e añanan di experiencia y dedicacion pa cu teatro na nivel nacional y internacional. Un lista di cantidad di obra a ser dirigi exitosamente pa su persona, ademas di a gana e confiansa y respet di hopi hende cu ta consider’e e Tata di Teatro na Aruba.

Na aña 2009 tambe a ser entrega e “Reconocemento Special di Bida Largo” cu cada lustro lo ser otorga na un persona, cu a dedica henter su bida na servicio di teatro, pa su trabou, sacrificio y aporte den e campo teatral. Pa prome ocacion, e tecniconan di Cas di Cultura Aruba, señor Richard Hopmans y señor Rolande Bryson a bay cu e codiciado y excelente titulo aki.

Na aña 2010, e reconocemento aki a ser duna na un presidente Internacional di Teatro Amateur: señor Leo Tromp (dfm), Kende tambe a fungi pa hopi aña como presidente di IATA y FUNDARTE.

Na aña 2011, e reconocemento aki a ser duna na e comediante sr.Vale Croes, (dfm), kende tambe a celebra su 50 aña como un di e miho comediantenan na Aruba.

Na aña 2012, a keda na nomber di: drs. MIRTO LACLE, GESTOR CULTURAL, “Un homenahe na cultura y cuentanan di Compa Nanzi, 1952 pa 2012” y cu e proyecto y ciclo multidisciplinario presenta na Cas di Cultura den luna di maart 2012 titula: CAS DI CULTURA COMBERTI DEN CUEBA DI COMPA NANZI” cu a encera 4 proyecto den uno, entre otro:

– Festival di conta cuenta cu un total di 14 contado di cuenta di Aruba cu a participa

– Presentacion y investigacion di E Eterno Biahe Cronotopico di e cuentanan di Compa Nanzi, di tradicion oral pa intermediacion (combinacion di video, audio y texto)

– Presentacion di e buki: ‘Lesa, Scucha, Canta, Actua, Baila, Gosa cu e AVENTURANAN DI COMPA NANZI’ cu 4 cuenta adapta pa señora Carmen Maria Herrera, cu cuenta y Disco Compacto

– A traha documentario di nos cuenta di Compa Nanzi pa conserv’e;

– Dramatisacion di cuater cuenta di Compa Nanzi

– Documentario di 2007 di ANANZI MASTERS cu a filma contado di cuentanan di Ghana, Africa, Amsterdam y Rotterdam (Cu contadonan di cuenta di Aruba, Boneiro, Corsou y Isla Riba) pa mustra e origen, desaroyo y cristalisacion di e cuentanan di Compa Nanzi

Na aña 2013, a ser otorga e premio akin a señora Diana Antonette, den su Hubileo di 45 aña di Actriz y 30 aña directora di Teatro di Danza Arubano.

Na aña 2014 te cu 2018, a tene e celebracion y lectura di Mensahe universal di Dia Mundial di teatro declara pa ITI UNESCO y a crea diferente programa y tayer, pero no a entrega premio.

Na aña 2019, Despues di 10 aña lo otorga e Premio Nacional di Teatro “Reconocemento Special di Bida Largo” na señora Faritah Luidens cu su Celebracion di 50 aña den farandula cu su Mega produccion “Ken ta Basha Abou” presenta conhuntamente cu Cas di Cultura na unda lo resalta su personahe Tica Basha Abou cu e ta representa y tambe den e mesun rosea duna 5 Reconocemento Special na 5 grandi veterano di teatro cu lo ta trahando directamente cu Faritah Luidens den su produccion manera ta: Luty Martinez, Yvonne Spellen, Magda Nicolaas, Harold Pereira y Elsa Krosendijk.

Na aña 2020, a otorga e Premio Nacional di Teatro “Reconocemento Special di Bida Largo” na Cas di Cultura Aruba’s Cultural Plataform sice 1958, pa su Celebracion di mas di 60 aña na servicio teatral y tur e congresonan y proyectonan asina balioso den cooperacion pa lanta arte di tarima.

Na aña 2021, a ser otorga e premio aki na e directora, atriz y escritora di teatro, señora Lenie Jeandor, pa su trayectoria y excelente aporte den e mundo teatral y pa plublicacion di su 2 buki: “Manual di Teatro”.

Na aña 2022, a ser entrega e premio na e actor, director, cantante y comediante señor Persey Damiano Jean D’or. Nomina pa Fundacion Bernadina Growell Kock y Fundacion Pro Cultura Arubano.

Na aña 2023, a ser entrega 2 premio na un productor di teatro señor Norman de Palm y tambe un reconocemento Postumo na señora, Burny Every (dfm)

Na aña 2024, a ser entrega e Premio Nacional di Teatro 2024 na Instituto Pedagogico Arubano. (CKV Teatro) y den e mesun rosea a ser entrega diferente reconocemento special na maestronan di nivel superior di teatro manera: Amy Lasten, Fenke Hooijmaaijers, Gloria Bryce, Olga G van Bochove , Daylan Krozendijk , Emerita Emerencia, Emira Tromp, Cecilia Besselink, Takhai Mohammed, Angelo Luis Angela, Jarmine Medina-Acosta, Madeleine Kelly, Joan Danies, Mario Flores, Daylan Krozendijk, tur esaki como muestra di aprecio y balor pa nan tremendo trabao y aporte pedagogico na bienestar y desaroyo di teatro aki na Aruba.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio