Na aña 2022 HIAS Aruba y 131 a uni forsa pa reduci e riesgo di violencia contra hende muher y hende homber y pa promove masculinidad saludabel na scolnan primario na Aruba.
E colaboracion aki ta basa ariba e extenso experiencia cu 131 tin den implementa proyectonan similar na scolnan primario y secundario riba nos isla, tal como e proyecto “Prevencion di Termento na Scol” y hopi otro charla, proyecto y workshop. Danki na fondo propociona door di e Bureau of Population, Refugees, and Migration (BPRM), e dos organisacionan aki a desaroya y start cu implementacion di e proyecto I Stopped It (Ami a pare).
Despues cu na 2022 a desaroya e proyecto I Stopped It, na 2023 131 a start cu implementacion di I Stopped It den 8 scol primario (un den cada districto). E alumnonan di klas 4, 5 y 6 di e 8 scolnan primario a participa na I Stopped It den aña 2023. E proyecto aki ta preventivo di naturaleza, y ta trata di para violencia entre mucha homber y mucha muher. E proyecto ta atende cu e problema di violencia, e trato entre mucha homber y mucha muher, igualdad, y ta promove masculinidad saludabel. I Stopped It ta stimula prevencion di violencia, cu ta un di e puntonan importante di e ‘Beleidsvoornemens’ di Minister di Husticia y Asuntonan Social.
E aña aki un total di cinco scol primario na Aruba lo participa na I Stopped It. E prome di e cinco scolnan cu a participa na I Stopped It e aña aki ta Colegio San Hose. Ariba 13, 15, 20 y 22 di februari 2024 e alumnonan di klas 4, 5 y 6 di Colegio San Hose a participa na I Stopped It. Durante 4 sesion nan a haya informacion tocante Violencia relacional, violencia relaciona cu genero (violencia di hende homber pa hende muher y/ of violencia di hende muher pa hende homber) y masculinidad saludabel. Na Colegio San Hose 132 mucha a participa na I Stopped It.
Pa mas informacion tocante I Stopped It por tuma contacto cu 131 via nos website: 131.aw, facebook: https://www.facebook.com/telefon.hubentud/, email: [email protected] of telefon 5886138/ 5884011.