Home » A.T.A. ta Reconoce Empleadonan cu a Destaca den 2023

A.T.A. ta Reconoce Empleadonan cu a Destaca den 2023

‘Cu voto colectivo di cada empleado a anuncia tres ganador’

by Admin
0 comment 102 views

 

Despues di a honra ex-directornan di turismo siman pasa, a toca turno pa A.T.A. reconoce empleadonan cu a destaca den 2023 atraves di e di cinco edicion di Standing Ovation Awards.

E programa di Standing Ovation ta basa riba coleganan cu ta duna otro High-Fives segun diferente accionan y balornan cu A.T.A. ta para p’e. Esaki ta inclui passion, excelencia, unidad, ta pionero, y integridad. E programa aki ta provee tur empleado e mesun oportunidad pa wordo reconoci door di nan coleganan.

E aña aki e evento di ‘Team Building’ a tuma lugar na Parke Nacional Aruba, caminda cu a cumpli cu diferente ehercicio strategico y alegre, sigui pa un atardi bunita unda cu a reconoce tres empleado pa nan trabou den 2024. CEO di A.T.A., Ronella Croes, a hiba palabra motivante na e team y ganadornan di e programa, y hunto cu e departamento di HR y respectivo Managers a entrega premionan bon mereci.

Na di tres lugar e aña aki a keda den nomber di empleado Ghislaine Croes cu ta fungi como Accounting Assistant a wordo reconoci pa su dedicacion laboral, pa su trabou voluntario na diferente evenemento durante aña, y pa su habilidad di ‘problem-solving’.

Despues a sigui turno pa anuncia e empleado cu e keda na di dos lugar, esta Xayenne Tromp cu ta fungi como Digital Content Specialist a wordo reconoci pa su participacion como voluntario na diferente evenementonan di A.T.A. durante aña, y su trabou excelente como escritor di ‘Xa on the Go’ riba www.aruba.com.

Na promer lugar, e ganador absoluto a keda den nomber di colega Jonathan Boekhoudt cu ta fungi como Trade Relations Liaison. Jonathan a wordo reconoci como un colega cu ta semper dispuesto pa yuda, alabes yuda como voluntario na diferente evenemento durante aña, y a asisti otro departamento na unda cu mester. Sin laga afo, Jonathan ta conoci pa carga un actitud hopi positivo y alegre.

A.T.A. ta gradici tur colega pa nan esfuerso, trabou, y dedicacion cumpli durante 2023 y ta felicita tur tres ganador di e programa Standing Ovation Awards 2024.

Tocante Aruba Tourism Authority (A,T.A.)
Desde 1 di januari 2011, Aruba Tourism Authority ta opera como un entidad ‘Sui Generis’. Un organizacion independiente den e esfera publico. Aruba Tourism Authority ta fungi como ‘Destination Marketing and Management Organization (DMMO)’ y ta responsabel pa uni interes turistico entre socionan local e internacional. A.T.A. ta pone hopi enfasis riba e e modelo di “High Value-Low Impact” cu ta para pa un balans entre aumenta e balor economico di e bishitante, posiciona Aruba como un pais desea y sostenibel, y posiciona Aruba como lider di desaroyo como un destinacion. Cu meta pa sigui mantene esfuerzonan den linea segun e balans menciona, y logra aumenta entrada pa medio di calidad di turismo en bes di e volumen cu nos destinacion ta ricibi. Capacidad di carga ta sigui ricibi atencion di parti di A.T.A.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio