Home » Un ora pa otro por spera caso penal contra periodistanan liga cu ex polis Vos

Un ora pa otro por spera caso penal contra periodistanan liga cu ex polis Vos

Ademas di a apela sentencia di ex agente di Polis Vos

by Admin
0 comment 164 views

ORANJESTAD – Ministerio Publico ta interogando e sospechosonan liga den e caso di scuchamento di radio di Polis, caminda e ex agente di Polis, Vos, a wordo condena. Investigacion haci ta mustra cu ainda tin 5 sospechoso. Ta trata aki di “Speed” Andrade, Koolman, Lacle, Giel y Ponson.

ARUBA NATIVE por a compronde cu e sospechosonan a wordo interoga un biaha mas na Hues Comisario.

Ta asina cu Ministerio Publico a anuncia cu tin 5 sospechoso den caso Vos. Tabatin interogacion di e 5 sospechosonan. Por a compronde cu a bolbe yama e sospechosonan pa interogacion.

LO BAY CUMINSA CASO PENAL

Tin indicacionnan cu e motibo cu Ministerio Publico a laga interoga e 5 sospechosonan un biaha mas na Hues Comisario, ta cu tin pensa dentro di poco cuminsa cu un caso penal. Parce cu ainda e citacionnan pa e caso penal no a sali pero cu e intension ta pa e aña aki ainda e caso wordo trata den Corte den Promer Instancia.

Dia 8 December 2023 tabatin e caso penal cu Ministerio Publico a cuminsa contra Vos, kende a wordo defendi door di abogado mr. de Sousa.

Fiscal a bisa Hues cu tin 6 acusacion contra Vos.

– Entre Maart 2018 y 2023, Vos a malversa radionan di Polis,

– a horta radionan di Polis’

– a viola secreto di trabao door di facilita informacion na cierto media y instala aparatonan na su cas,

– a abusa di su funcion como Polis,

– a laga su mes wordo cumpra,

– a forma parti di un organizacion criminal.

Fiscal a mustra cu desde 2018, tres di e radionan tabata na Vos como Polis di bario. Investigacion a mustra cu Vos tabata suministra informacion na Lacle, Giel y Andrade. Asina a haci investigacion na cas di Vos y a haya tres laptop instala riba 3 radio riba canal 1, cu ta e canal general di Polis. Tabata usa e programa Zelo pa asina manda informacion na cierto media. Ta asina cu 2 di e laptops a wordo desactiva di distancia pa daña investigacion. A logra habri un laptop caminda a haya 9572 informacionnan di Polis manda pa cierto media. A haya un di wifi cu carchi conecta na 24 ora.

Fiscal a bisa cu e ta haya Vos culpabel di tur e acusacionnan.y a exigi 36 luna di prison (3 aña) di cual 8 luna ta condicional cu un tempo di prueba di 3 aña. Fiscal a exigi tambe cu pa 5 aña, Vos no por eherce e trabao di Polis.

VOS LAGA LIBER

Hues a bisa cu e no ta haya legalmente proba cu Vos ta forma parti di un organizacion criminal y a declar’e liber di e acusacion ey. Hues ta haya Vos culpabel di e otro acusacionnan. Hues a condena Vos na 16 luna di prison, di cual 8 luna ta condicional cu un tempo di prueba di 3 aña. Hues a bisa cu e ta prohibi Vos di traha como Polis pa un periodo di 3 aña. E decision aki a haci cu 8 December 2023, Vos a haya su libertad.

APELA SENTENCIA

Ministerio Publico no a keda contento cu e sentencia y a apela. Esey ta nifica cu caso Vos awor lo bay wordo trata pa Corte Superior, caminda 3 Hues cu ta forma Hof lo bay trata e caso.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio