Home » Dia mundial di Turtuganan di lama. Turtuganan di lama ta enfrenta problemanan pa via di demasiado actividad acuatico den nos awanan

Dia mundial di Turtuganan di lama. Turtuganan di lama ta enfrenta problemanan pa via di demasiado actividad acuatico den nos awanan

by Admin
0 comment 90 views

ORANJESTAD – Awe 16 di juni cu ta dia mundial di Turtuganan di lama, Directie Natuur en Milieu (DNM) kier a enfatisa cu tur e 6 especienan di turtuga di lama ta protegi pa e ley local Landsbesluit Bescherming inheemse flora en fauna. Ta trata di e especienan protegi: Caret (Eretmochelys imbricata), Cawama (Caretta caretta), Turtuga Blanco (Chelonian mydas), Drikil (Dermochelys coriacea), Kemp’s Ridley (Lepidochelys kempii) y e Olive Green Turtle (Lepidochelys olivacea). Tur aña tin turtuganan di lama cu ta subi nos beachnan y ta enfrentando hopi reto di actividad di hende. Entre esakinan ta e mashinnan di motor manera boto y ‘waverunner’ cu no ta cauteloso pa cu e turtuganan di lama. Hotelnan tambe no ta cumpli cu e reglanan stipula pa cu ponemento y kitamento di e stulnan di lama cu turistanan ta uza riba beach. Otro factor cu ta hunga un rol den e ultimo temponan aki ta eventonan riba beach cu asina hopi uzo di luz artificial cu ta ilumina y confundi e turtuganan di lama cu ta subi tera. Esaki ta clasifica como contaminsacion di luz. P’esey DNM a publica tambe e regulacion “standard operating procedures (SOP)” pa cu iluminacion cu ta den bon practica cu bida di animalnan- manera e turtuganan di lama. Nos ta invita un y tur pa repasa esaki cu ta obtenibel riba nos website dnmaruba.org.
Ademas di loke a menciona ariba di e actividadnan humano tambe tin e tema cu ta trata polucion di plastic. Esaki ta keda importante ora cu ta cu papia di e consecuencianan di cual turtuganan di lama ta muri. Plastic ta e causante di hopi problema den e bida marino na mundo. Pa via di esaki e bunita turtuganan lo disparce na gran cantidad. Nos tur por a nota cu a publica un potret di un turtuga den nos awanan cu ta demasiado rondo, indicando cu e turtuga di lama aki posiblemente tin problema cu plastic den stoma. E turtuga di lama ainda ta mustra di ta come den profundidad pero pronto, cu un bariga inflama, e lo subi superficie y lo muri. E ta bon pa un y tur refleha ariba e consumo propio. E impacto no solamente mester tuma lugar riba sentimento di hende pero tambe haci impacto riba e patronchi di consumo y para e uzo di productonan di plastic cualifica como desechabel (single-use plastic items).
Aki tin algun echo di turtuganan di lama.
Luznan artificial ta causa desorientacion den turtuganan di lama y ta pone cu nan ta bay den direccion robes ora di pone webonan.
Turtuganan femenino ta bolbe na e mesun beach na unda nan a nace. Nan ta masha sensitivo y tin un habilidad increibel di nabega distancianan largo.
Turtuga NO tin djiente pero nan kaak ta traha di e mesun componente cu huña (keratin) y esaki ta fit riba e craneo mescos cu djiente falso.
Ta calcula cu no mas di 1 den 1000 webo di Turtuga di lama lo sobrevivi y yega na bira un turtuga adulto.
Turtuganan ta parce di prefera cumindanan cu color cora, oranje y geel. Nan ta mas curioso pa investiga e cumindanan cu e colornan ey cual ta haciele peligroso. Pasobra nan lo explora hopi plastic y por ekiboca entre plastic y cuminda.
Awe riba nan dia haci bo contribucion y haci un pida beach limpi, haci esaki liber di plastic of otro sushedad cu lo stroba turtuganan di lama di subi e beachnan. Si bo ta frecuenta beach cu bo famia y a coba buraco den esaki, corda tapa esaki bek cu tera prome cu solo baha y bo bay cas. E organisacion TurtugAruba ta haci un trabou inmenso, no solamente di conscientisacion di e especienan pero tambe accionnan di limpiesa di beachnan. Ta activo den nos comunidad. Bira un boluntario di e organisacion di e manera ey yuda conserva y proteha e turtuganan di lama cu ta bini Aruba. Feliz Dia Mundial di Turtuganan di lama 2024.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio