Matividiri – Diadomingo anochi; pa polisnan locual kizas mester a bira un persona burachi banda di caminda; a tuma un otro buelta. Polis lo a pensa di topa cu un persona burachi, pero a biba topa cu un hende homber sin bida den mondi pariba di caminda.
Na e sitio nos a papia cu e persona cu a haya e curpa. E la conta nos cu e la bay cana cu su cacho, y ora nan ta bin bek e cacho lo a hol’e esaki y a bay direccion di e mondi.
E testigo lo a sigui e cacho, y asina a nota e curpa sin bida di un hende homber. A puntr’e si e tawata tin golpi na su curpa, e la bisa cu tawata mustra asina. Mesora e la opta pa avisa autoridad.
E la sigui conta nos, cu na varios ocasion a yega di manda carta cu ariba e caminda eynan vehiculonan ta core masha masha duro mes, y cu te hasta pa e motibo ey e cu su señora lo bay muda di e area.
Sra. Rasmijn di Cuerpo Policial cu e relato oficial:
“Diadomingo anochi pa mas o menos 7or central di polis ta wordo informa cu lo tin un hende homber benta abao bandi caminda.
Ta despacha un patruya na e sitio y ta notifica ambulance.
Na yeganda di e patruya ta bin topa cu un hende homber cu no ta duna señal di bida. Ambulance tambe a presenta pero no por a haci nada mas.
Ta pone e autoridadnan concerni na altura pa asina cuminsa un investigacion kiko por a pasa cu e persona cu a ser encontra sin bida.
Pa 8:35 dr Texier ta constata morto. No a haya ningun indentificacion.
E caso ta bao investigacion.
Cuerpo Policial ta haci un apelacion pa es cu a sa algo of a mira algo yama e tiplijn di polis 11141.
Si tin un persona cu ta sinti falta di un familiar por tuma contacto cu central di polis na nr 100.”
