Merca a pone den libertad un aliado cercano di presidente di Venezuela, Nicolás Maduro, kende tabata deteni na Miami for di october 2021 pa un acusacion di conspiracion pa labamento di placa, a cambio di pone den libertad 10 mericano deteni pa diferente motibo den e pais suramericano. Esaki, segun un funcionario di e Gobierno di Merca.
Alex Saab, e empresario di origen colombiano, a ricibi un perdon presidencial di Joe Biden. Saab, kende Gobierno di Venezuela ta considera como diplomatico, a wordo deteni na Cabo Verde na Juni 2020 pa un notificacion di alerta cora di Interpol y despues, na october 2021, a extradit’é pa Merca.
Segun Caracas, Saab tabata den un mision special pa haya alimentonan pa importa pa Venezuela. Merca ta alega cu Saab, kende a declara su inocencia, a uza sistema financiero di e pais pa laba placa cu tabata bin di pago di soborno cu tabata tin como meta saca bentaha di e sistema di cambio controla pa e gobierno di Venezuela.