Sheynnis Palacios di Nicaragua ta Miss Universe 2023

SAN SALVADOR: Diasabra 18 di November a tuma luga e di 72 edicion di e certamen di beyeza cu mas historia y prestigio na mundo: Miss Universe.
E certamen a wordo realisa na El Salvador. E representante di Nicaragua, Sheynnis Palacios, di 23 aña a wordo elegi como e reina universal nobo. Thailand a wordo elegi como segundo finalista y Australia como e di tres.
E representante di Colombia, Camila Avella, tabata un di e faboritonan y a drenta den e grupo di 5 finalista entre 84 participante di rond mundo. Su participacion tabata historico, ya cu el a bira e prome aspirante na Miss Universe cu ta mama y cu ta casa den alcansa e etapa aki den e concurso, algo cu nunca antes a sosode. E modelo di 28 aña ta procedente di Yopal, Casanare.
E aspirantenan na e corona di Miss Universe 2023 a competi for di dia 15 di November den e preliminarnan di e certamen, den cual a desfila den shimis di gala y badpak, cu e latinoamericanonan entre esnan mas aplaudi pa publico.