ORANJESTAD – Awe merdia Hof di Corte Superior a duna un sentencia intermedio den e apelacion di tanto Rudy Carti como Ministerio Publico contra e sentencia di 8 October 2021.
ARUBA NATIVE por a compronde cu Hof a tuma un decision intermedio caminda a bisa cu ta habri e investigacion y kier scucha 5 testigo. Otro luna lo sigui cu e caso. Den sala di Corte tabata presente señor Carti, su señora, un di e victimanan cu su casa, abogado mr. H.Lejuez hunto cu Ricardo Croes.
APELA SENTENCIA
Luna pasa12 September 2023, Hof di Corte Superior a trata e apelacion di Carti y Ministerio Publico contra e sentencia di Corte den Promer Instancia. Hues a haya Carti culpabel y a conden’e na 2 aña di prison, di cual 1 aña ta condicional. Ademas a prohibi Carti pa eherce su profesion di psychioterapista pa 4 aña. Ademas a ordena pa Carti paga daño na e victimanan cu a haci demanda.
EXIGENCIA DI PG
Procurador General (PG) a bisa Hof cu e ta haya Carti culpabel y a exigi pa subi e castigo di 2 aña pa 4 aña di prison. Tambe el a bisa cu Carti lo mester paga daño. PG tambe a bisa Hof pa detencion di biaha di Carti despues di e sentencia.
ABOGADO
Mester indica cu e tratamento di e caso riba 12 September a tuma mas o menos 4 ora, caminda abogado mr. H. Lejuez den forma extenso a duna splicacion con Rudy, como psychioterapista mester a trata e damanan, cu a denuncia cu Rudy lo a mishi cu algun y hasta viola otro.
Por a nota cu president di Hof a habri e mapa di indicacionnan di musculonan y tambe informacionnan cu e abogado a presenta. E abogado a conclui cu Carti no ta culpabel.
HOF KIER MAS INVESTIGACION
Awe merdia, un Hues di Curacao a bin Aruba pa lesa e sentencia di Carti. E Hues a bisa cu Hof a tuma un decision intermedio. Hof a dicidi cu ta habri e investigacion di nobo. Hof kier bay scucha 5 testigo. Hof a bisa cu dia 21 November 2023 lo sigui cu e caso via video conference.