ORANJESTAD – Awe mainta Corte di Husticia a trata e caso penal cu Ministerio Publico a cuminsa contra un miembro di Douane, kende ta wordo acusa di a accepta placa pa laga un pasahero pasa cu remedi na aeropuerto.
TUMA REGALO Y ABUSA DI FUNCION
Fiscal ta acusa D. cu riba 25 November 2021, el a haci mal uso di su funcion y a tuma regalo 50 florin y a laga un pasahero drenta cu medicina.
D. a desmenti di a haya placa. El a bisa Hues cu el a bisa e pasahero cu e no por drenta cu e medicina y cu mester bay Inspeccion di Medicina pa controla. Segun B., ora e pasahero a splica cu ta pa dolor, e ora ey di bon curazon, el a lag’e pasa.
Hues a bisa cu director di Douane a haci denuncia cu D. a viola su funcion door di pidi un pasahero placa y laga medicina pasa sin cu esakinan a keda controla door di Inspeccion di Medicina. D. a desmenti categoricamente di a pidi placa.
Hues a bisa cu e dama S. Douanero a declara cu e tabata trahando y a wordo acerca pa un hende kende a bisa, desde ki tempo ta cobra pa remedi pasa sin haya recibo. E hende a bisa cu un pasahero a bis’e. E pasahero a bisa cu el a wordo controla door di Douane y cu Douane a bis’e cu si e paga 50 florin e lo lag’e pasa. E homber a bay pin na e bancomatico den aeropuerto pa paga e Douanero D. Segun D. el a bay pafor pa bay bebe awa y na dado momento el a mira e homber a cana bin riba dje y a dun’e man y el a sinti algo den su man.
Hues a bisa cu e ta haya straño cu e pasahero a sali pafor caba y despues a duna D. algo. Hues a puntr’e si el a mira e placa. Segun D., e no a mira kico e homber a dun’e. Ta despues el a mira cu ta 50 florin dobla chikito. Un rato despues, el a wordo yama den oficina di Douane caminda S. tabata para cu e dos hombernan. Despues di a confront’e cu e pasahero, a kita su badge y a prohibi’e drenta tur oficina di Douane.
FISCAL
Fiscal ta haya legalmente proba cu D. a haya placa pa laga e pasahero pasa cu medicina. El a bisa cu e no ta kere declaracion di D. E ta kere e pasahero cu a bisa cu D. a bis’e cu si e paga e lo lag’e pasa cu e medicina. Na opinion di Fiscal, ora e pasahero a sali, D. a bay su tras pa asina haya su placa. Fiscal ta haya cu D. a mal usa su funcion door di cobra placa pa laga pasahero pasa cu medicina cu mester a wordo controla door di Inspeccion di Medicina. Fiscal a bisa Hues cu comunidad mester por confia riba integridad di Douanero. Esaki ta duna Douane mal nomber. Pa cu e castigo, Fiscal a bisa cu door cu ya a pasa casi 2 aña, e ta exigi 200 ora di trabao pa comunidad y si D. no cumpli cu esaki, e lo mester bay 100 dia sera.
ABOGADO
Mr. Rosenstand a bisa Hues cu D. ta desmenti cu el a pidi placa. Na opinion di e abogado, ta e pasahero a ofrece placa. E abogado ta haya cu e pasahero tambe mester a wordo persigui, pa a cumpra un ambtenaar. El a sigui bisa cu e pasahero no a duna D. placa den e espacio di controla maleta. E pasahero a duna D. 50 florin, despues cu ya e remedinan a keda importa. E abogado a bisa Hues cu no ta e pasahero a bay keha sino e otro persona cu mester a haya e remedinan. E abogado ta haya cu no por prueba aki cu D. a haya placa. Na opinion di abogado, por considera esaki un regalo cu e pasahero latino a duna, pasobra D. a lag’e pasa cu e remedinan. E abogado a bisa Hues cu e unico cos cu D. a haci ta laga e pasahero pasa cu e remedinan door di motibo humanitario. E ta haya cu Hues mester declara cu no ta persigui D. El a pidi adicional pa laga Hues Comisario scucha e dos miembro di Douane y e pasahero. E abogado ta haya cu e declaracion di e testigonan aki ta importante pa e caso di retiro di D. cu a apela.
SENTENCIA
Hues a sera tratamento di e caso y a dicta sentencia. El a bisa cu D. a admiti di a laga e pasahero pasa cu e remedinan. Hues ta haya cu si un empleado di Gobierno haya placa, esaki ta violacion di su trabao y ta wordo considera corupcion. Hues ta haya cu D. a accepta placa pa a traha contra reglanan di su trabao. Hues a confirma e exigencia di Fiscal esta 200 ora di trabao comunitario y si no cumpli lo mester bay 100 dia sera. Hues a rechaza e peticion di abogado pa scucha e testigonan.
Despues di e sentencia, mr. Rosenstand a bisa Hues cu lo apela e sentencia.