LIMA, PERU –
E extradicion di Joran van der Sloot di Peru pa Merca ta coriendo peliger. Abogado di Joran, sr. Maximo Altez, a cuminsa cu un kort geding pa asina trata na evitá cu Joran lo por wordo extradita pa Merca.
Representantenan di Embahada Hulandes a bishitá Joran dialuna ultimo den prison na Lima, caminda cu e ta encarcela for di diadomingo ultimo.
Segun su abogado, nan lo a conseha Joran pa cuminsa cu un kort geding contra su extradicion pa Merca. Van der Sloot a nenga di firma su laissez-passer (un paspoort di emergencia), cu ta hasi e documentu di biaha no valido y asina Joran no por sali di Peru.
Joran a yega Lima despues di un biaha cu hopi obstaculonan, e la sali for di e prisón di Challapalca cu ta keda na un area basta inhabita y bandona di Peru.
E abogado a bisa cu nan ta preparando un kort geding pa evitá cu Van der Sloot wordo extradita pa Merca, unda e lo mester wordo huzga pa extorsion di famia di Natalee Holloway. Dialuna ultimo, autoridad Peruano a anuncia cu e extradicion di Joran ta planea pa diaranson awo. E kort geding lo mester tuma lugar diamars of mas tarda diarason.
Segun vocero di Ministerio di Asuntonan Exterior di Hulanda, ” E ministerio no ta atende cu casonan individual. tambe a sigui bisa cu ” Hulanda no por mete su mes den proceso hudicial di otro pais. Nos ta brinda asistencia consular incluyendo bishita tur Hulandes cu ta deteni den exterior y kier ricibi asistencia di e Embahada of Consulado Hulandes.”