Na Gran Britania, polis a cuminsa cu un investigacion relaciona cu un caso den cual un muher di 72 aña cu a fayece a consecuencia di a wordo ataká y mordí pa un cacho di un rasa prohibi
Bedworth, Coventry, Gran Britania:
E incidente fatal aki a sosode na Bedworth, Coventry, e dama ta e di 15 victima cu a wordo mordi fatalmente pa un cacho den lapso di un aña y mey na e pais aki. Aña pasá, casi 22 mil persona a resultá herída door di a wordo ataca y mordi pa un cacho na Gran Britania.
Despues di e ultimo incidente fatal aki, polis a aresta un homber di 52 aña y un muher di 49 aña. Nan ta wordo sospecha di tin un cacho di cual e rasa ta prohibi na Gran Britania y riba dje e cacho tabata brabo y incontrolabel. E doño di e cacho aki tambe a wordo ataca y mordi pa e cacho. E animal a wordo confisca y hiba na un otro luga.
Na final di 2021, un mucha homber di 10 aña wordo ataca y mata na un forma hopi cruel pa un cacho di un rasa prohibi, Mama di e mucha homber aki actualmente ta hibando un campaña pa e pais bin cu mas ley estricto relaciona cu posesion di cacho.
E casonan asina aki di personanan cu ta wordo ataca cu consecuencianan fatal y tambe e cantidad creciente di persona cu ta wordo mordi of herida pa cachonan ta trece e necesidad pa bin cu leynan mas estricto. Na Gran Britania e pueblo ta pidiendo pa mas medida pa evita e tipo di sucedidonan tragico asina sigui ripiti, nan kier pa garantisa siguridad pa e comunidad.
Polis lo continua cu e investigashon pa asina haya sa kiko exactamente a sosode, cu a yega asina leu cu e cacho a ataca e dama fatalmente, pa asina autoridad por tuma mas medida y pa futuro cu mas caso asina aki sosode, segun polis e ta un situacion basta preocupante cu ainda ta sigui existi.