Parlamentario Tromp-Lee ta bisa cu e ta preocupa mirando cu Gobierno di Aruba y Hulanda no por yega na palabracion cu otro tocante e pago di e fiansa relaciona cu COVID-19 y cu 10 di october venidero mester cuminsa paga esaki bek. Parlamentario Tromp-Lee ta di opinion cu si Hulanda berdaderamente kier yuda Aruba esaki mester wordo demostra tambe door di por ehempel ofrece saneamento (parcial) di e debe. Nacionnan Uni y Union Europeo mes ta accentuando ultimamente cu paisnan grandi mester yuda paisnan chikito sali di e debe enormenan causa door di COVID-19. Minister-President a informa na Parlamento cu no tin sosten politico na Hulanda pa cu e tema aki. Parlamentario Tromp-Lee no por compronde esaki mirando cu e debe aki no a wordo causa door di mal maneho pero pa motibo di un crisis mundial cu tabata inevitabel pa Aruba.
Enberdad Gobierno di Aruba y Hulanda ta na e momentonan aki na mesa tocante e pago di e fiansa relaciona cu COVID-19 pero Parlamentario Tromp-Lee ta hay’e incomprendibel cu Hulanda kier mara Aruba cu RAft pa asina haya un percentahe mas faborabel, sabiendo cu gran mayoria di Parlamento di Aruba ta contra e proceso y e contenido di e ley di consenso di Reino ‘obliga’. Parlamentario Tromp-Lee a kere cu RAft tambe lo bay mesun rumbo cu COHO y lastimamanete esaki no ta e caso.
Parlamentario Tromp-Lee a bolbe recorda den su discurso cu dia 21 di mei 2022 Parlamento di Aruba a manda un relato unda ta cuestiona y haci varios pregunta na Gobierno di Hulanda riba e proceso y stipulacion di entre otro e RAft, pero te cu e dia di awe no a ricibi contestacion riba e preguntanan haci. Na e momentonan aki Gobierno di Hulanda ta papia na mesa di negosacion manera tin un proceso di RAft nobo. Parlamentario Tromp-Lee ta pidi den e plataforma di IPKO pa un bes mas ricibi contesta riba e preguntanan entrega 21 di mei 2022 y asina por sigui cu negosacionnan.
Tromp-Lee ta di opinion cu mester harmonisa e supervision financiero di e Paisnan di Caribe den Reino Hulandes. No por ta asina cu Corsou y Sint-Maarten ta ricibi condicionnan hopi mas faborabel desde 2010 (saneamento di ful e debe, por fia placa na un percentahe hopi abou na Hulanda) y cu awor no ta ofrece e mesun condicionnan na Aruba despues di un crisis mundial. Door di ricibi e condicionnan aki lo contribui cu Aruba lo por yega na saneamento sostenibel di nos finansas publico y debenan internacional. E puntonan aki tambe a wordo señala pa Raad van Advies di Aruba y Raad van State di Hulanda den nan conseho pa cu RAft. Si Aruba ricibi e mesun trato y condicionnan cu paisnan ruman a ricibi, lo pone cu Aruba por cumpli mas lihe cu e condicionnan stipula pa Hulanda, y nos lo por para mas lihe riba nos pianan y asina paga Hulanda bek mas lihe. E lo ta un situacion ‘win-win’ pa Aruba y Hulanda!