Home Sports Salida pa e “XXXV Panamerican Curaçao Championship 2022”

Salida pa e “XXXV Panamerican Curaçao Championship 2022”

SHARE

Oranjestad:

Diadomingo ultimo e team di Aruba Karate Bond (AKB) a sali pa Corsow pa participa na e “XXXV Panamerican Curaçao Championship 2022”, cual ta tuma luga di 23 pa 28 di mei na World Trade Center Curaçao. Directiva di AKB ta sumamente orguyoso cu e salida di e atletanan Alejandro Gonzalez Lujan y Juan David Velasquez. 

Participacion

E atletanan Juan David Velasquez y Alejandro Gonzalez Lujan lo participa den e categoria Senior (18+) tanto den seccion ‘kata’ (tecnica di karate) y ‘kumite’ (pelea/bringamento). Preparacion di e team tabata den man di  coach, “Sensei” Alberto Gonzalez. Ambos atleta na luna di februari a trece seis medaya cas. Cu participacion na e campeonato Panamericano aki, Alejandro Gonzalez Lujan y Juan David Velasquez ta haya e oportunidad pa demostra nan tecnica, resistencia y potencia. Otro miembronan di directiva cu tambe a biaha pa Corsow, ta “Sensei” Felix Tromp y “Sensei” Gustavo Velasquez. Ambos instructor di karate lo participa na diferente curso y examen e.o pa arbitrahe. 

 

Gradicimento

Directiva di AKB ta gradici tur cu a contribui na e biahe aki. Un palabra di gradicimento special  pa Arubabank kende a patrocina e uniform di e team. Tambe nos ta gradici tur karateka miembro di AKB, tur mayor,   Stichting Sport Subsidie Aruba, Aruba Sport Unie, Comite Olimpico di Aruba y tur persona cu di un forma of otro ta apoya karate di Aruba.