ORANJESTAD – Awe mainta Hues a nenga e peticion di abogadonan pa haya e documentonan di Sevinger. Hues awe mainta a dicidi riba e lista di peticionnan di abogadonan den e caso Avestruz. Despues cu siman pasa e abogadonan a presenta nan lista di peticionnan y Diamars Fiscal a reacciona riba e peticionnan aki, awe mainta Hues a tuma su decision.
ARUBA NATIVE por a compronde cu Hues basicamente a confirma e punto di bisa di Fiscal di Ministerio Publico.
Den sala di Corte tabata presente e abogadonan di e 12 sospechosonan. Hues a bisa cu lo manda e caso pa Hues Comisario pa scucha tur e testigonan cu a keda aproba. Hasta e testigonan cu abogadonan lo tabata kier pa wordo interoga den Corte, Hues a bisa cu tur testigo lo wordo scucha door di Hues Comisario.
Hues a bisa cu tur esnan cu Fiscal a aproba lo keda. E otronan cu Fiscal no ta haya relevante lo no wordo aproba. Ta asina cu varios di 12 sospechosonan den caso Avestruz, lo wordo scucha como testigo.
Pa loke ta e peticion di varios abogado pa e documentonan cu Sevinger a duna Landsrecherche relaciona cu dunamento di tereno, Hues a bisa cu e ta mantene su decision manera el a bisa na Februari 2022. Den su decision di Februari 2022, Hues a bisa cu e documentonan ta importante pa e caso y Fiscal ta dicidi riba esakinan. Esey ta nifica cu ningun documento cu Sevinger a duna Landsrecherche, abogadonan lo haya. Hues a bisa cu e documentonan lo wordo inclui den e documentonan di e caso penal Avestruz
Hues a bisa tambe cu e lo kita e prohibicion di contacto di e sospechosonan cu ainda tin esaki.
Hues a palabra cu 14 Juni 2022 pa 11’or di mainta, lo topa den sala di Corte pa mira con leu a yega cu e interogacionnan y asina planea kico lo bay sosode cu tratamento di e caso Avestruz.