Home » A. Groeneveld a haya 750 florin boet y trabao pa comunidad pa a laga cacho sufri pa tempo largo y muri

A. Groeneveld a haya 750 florin boet y trabao pa comunidad pa a laga cacho sufri pa tempo largo y muri

by Admin
0 comment 172 views

ORANJESTAD – Awe mainta, Corte di Husticia a trata e caso Ministerio Publico a cuminsa contra Alberto Groenenveld (G.), kende ta wordo acusa di a laga su cacho Khaless sufri durante un periodo largo cu a causa cu e cacho a muri.

ARUBA NATIVE por a compronde cu G. a bisa cu e ta lamenta loke a sosode. Fiscal a hala su atencion cu e ta purba tira culpa riba otro pero e ta responsabel.

Por a mira miembronan di e fundacion di cacho, Fundacion Luna, miembronan di Polis di Bario, presente den sala di Corte pa e caso.

E acusacion cu Fiscal a presente den Corte ta cu entre 1 Januari 2024 te 26 di Maart 2024, varios biaha a haci un cacho Khalees dolor of causa e cacho herida cu a causa su morto. Tambe Fiscal ta acusa G. di a viola e ley di cacho dor di no duna e cacho atencion. G. a wordo representa pa abogado mr. D.Croes.

ACUSADO TA LAMENTA

G. a bisa Hues cu e ta lamenta hopi loke a pasa y cu ainda e ta den shock. El a bisa cu e ta traha duro y tabatin palabracionnan na cas pa cuida e cacho. Hues a puntra cu kende G. a palabra. G. a bisa cu na cas ta su yiu homber di crianza (25) cu el a adopta, ihanan, jardinero y esnan cu ta haci cas limpi. Segun G. e ta stima bestia y a kere cu esnan na cas lo tabata cuida e cacho. Ta duel’e hopi loke a pasa. El a bisa cu e sa cu e ta responsabel. Hues a bisa pa G. splica con e por tin mas cacho y puppies y tin indicacion cu pa un periodo largo e cacho tabata falta di cuido. El a bisa cu e no por splica cu su cacho no a haya atencion. El a bisa cu ainda e no por compronde cu su cacho a muri.

MAL CUIDO DI CACHO A CAUSA SU MORTO

Hues a bisa cu a haya e cacho mara cu cadena bou di un mata. G. a splica cu e ta huur e cas pero no por traha cura. El a bisa cu e no ta gusta mara cacho. El a bisa cu e no sa ta ken a mara e cacho cu cadena. El a splica Hues cu el a busca un cabel di waya special pa mara e 3 cachonan separa. Segun G. e no sa mara cacho pero door cu bisiñanan ta keha cu e cachonan ta core bay riba hende, e mester a mara nan. Hues a puntra G. con e cacho tabata mara cu cadena. G. a bisa Hues cu e no por compronde ken lo a mara e cacho cu cadena. Segun G. 23 Maart 2024 el a duna e cachonan cuminda y e cacho no tabatin e cadena ey bisti. Hues a puntra G. pakico, mirando e situacion reinando di hopi trabao y bisiñanan ta reclama, no a hiba e cachonan na instancianan. Segun G. for di Januari 2024 el a pidi instancianan pa tuma e bestianan, pero ningun reaccion. El a bisa cu bisiña a bisa pa yama abattoir pa laga mata e bestianan. G. a nenga di laga mata e cachonan. El a bisa Hues cu un bisiña a tuma un puppy. G. a bisa cu e situacion a bay for di man.

Hues a mustra cu un bisiña a whatsapp G. pa haci algo cu e cachonan na Maart 2024 pero G. no tabata reacciona. Segun G. el a haya dos mensahe di bisiña cu a bisa cu atrobe e cachonan ta los y e otro bisiña a bisa cu e no kier pa e cachonan ta bay den su cura.

CACHO CU HERIDANAN SERIO NA GARGANTA

Hues a puntra G. cu e no a mira e cacho cu heridanan serio rond di garganta y su cabez tabata hincha. Hues a bisa cu e potretnan ta basta cruel y dos cos cu ta hala atencion. A haya e cacho cu puppies ta bebe lechi y e cabez di e cacho tabata hopi hincha. E garganta di e cacho tabatin hopi herida di cadena cu tabata rascal na dje. Veterinario a traha raport di loke a diagnostica na e cacho durante autopcia. Hues a lesa cu tabatin heridanan severo na garganta y falta di cuido pa tempo largo a casua cu e cacho a muri. Mas ainda Hues a mustra cu e musculonan di garganta a wordo corta door di e cadena y hasta e cuero di garganta a cuminsa putri. Hues a remarca cu loke G. a declara di ta cuida e cacho, no ta cuadra cu e raport di Veterinario. Segun G., 24 Maart 2024 el a haya whatsapp di bisiña di e cacho cu puppies y bisa cu e kier un puppy. Segun G., riba e potret cu e bisiña a manda, e no a mira ningun herida na e garganta di e cacho y tampoco cabez hincha.

Hues a mustra cu e cacho tabatin carpata y door cu e herida na garganta a sera e circulacion di sanger di nanishi pa bay bek, esey a pone e cabez di e cacho a hincha. Tambe cu e cacho tabata hopi seco door di puppies y falta di awa.

ACUSADO A PERDE TRABAONAN

Segun G., despues cu e incidente aki a sali den media, tur trabao a caba. E doño di e cas cu e ta huur, a dun’e 3 luna pa bay for di e cas. G. a bisa Hues cu e no tin entrada awor y ta depende di famia. Segun G. e no ta sinti’e sigur mas pasobra hopi hende tin rabia riba dje. El a bisa cu di un dia pa otro el a perde tur cos. Como politico el a tuma su retiro di partido MAS.

FISCAL A EXIGI BOET Y TRABAO PA COMUNIDAD

Fiscal a bisa cu ora el a lesa e documentonan y mira e potretnan, el a realiza cu e cacho tabatin un tempo largo ta sufri y seca. Fiscal a bisa cu e ta sinti cu G. ta purba kita su culpa, pero e no ta logra. Fiscal den un tono fuerte a bisa G. cu e tin bestia pa cria na cas, G. ta responsabel pa esaki.

Fiscal a bisa cu, si bo tin cacho, mester percura cu e ta haya cuido. Na Aruba tin hopi molester cu cachonan cu ta cana los. Na opinon di Fisca, ta responsabilidad di G. pa paga tino riba su cachonan. Fiscal a bisa cu e no por compronde cu G. no a mira cu e cacho tabata sufriendo. E cuero rond di e heridanan a cuminsa putri. Esaki ta indicacion cu pa tempo largo e cacho tabata sufri. Fiscal ta haya cu G. no tabata duna cuido na e cacho. Fiscal a bisa cu intencional sin sa, G. a keda sin duna e cacho e cuido necesario.

Pa cu e castigo, Fiscal a mustra cu G. ta promer biaha cu e ta cay den man di husticia. Na opinion di Fiscal, e hecho cu G. ta wordo rechaza den comunidad, esey ta consecuencia di loke a sosode. Fiscal a remarca cu G. ta tira culpa riba otro y e no mester a busca cacho pa cria si e ta asina ocupa cu trabaonan.

Fiscal a exigi un boet di 750 florin y 60 ora di trabao pa comunidad di cual 20 ora ta condicional cu un tempo di prueba di 2 aña. Si G. no haci trabao pa comunidad, e lo mester bay 30 dia sera den KIA.

ABOGADO

Mr. Croes a bisa Hues cu Fiscal ta acusa cu intencional G. a mal cuida e cacho. Segun Croes, G. ningun momento a desea morto di su cacho. No ta asina cu tabatin accion di G. cu consecuencia cu e cacho a muri. E tabata stima su cacho y puppies. Na opinion di abogado mr. Croes, por conclui cu e periodo ta hopi mas cortico cu loke Fiscal ta pretende cu e cacho tabata sufri. E abogado a mustra cu cinco dia promer e cacho tabata pafor na cas di bisiña. Mr. Croes a bisa Hues cu nan ta kere cu e jardinero lo a mara e cacho na cadena pisa, pasobra e cacho lo tabata stroba pa e haci su trabao. El a mustra cu for di 17 Januari 2024, G. a actua y tabata busca hende pa tuma e cachonan. Di17 Januari te 24 Maart, e Fundacion Luna a dicidi di yuda. 25 Maart, G. no a bay wak e cachonan y a resulta cu e cacho tabata hopi malo. E abogado a bisa Hues cu ta pensa cu e cacho lo a bira nervioso y a lora su mes den e waya y cadena. G. ta lamenta hopi loke a pasa cu su cacho. E consecuencia tabata hopi fuerte pa G. Hopi reaccionnan fuerte riba Face book. El a retira di partido. El a perde tur su trabaonan na cierto hotelnan y hasta ta prohibi di subi riba tereno di e hotel. Doño di e cas tambe a sak’e for di e cas. Mas cu 100 mil persona a mira riba you tube y hasta NOS na Hulanda a duna atencion na esaki.

FUNDACION LUNA TA MIDI CU DOS MIDI

Abogado mr. Croes a señala cu tin otro cacho a muri door di falta di cuido, auto a dal mata pitbull y core bay. No a mira ningun reaccion y accion di Fundacion Luna. E abogado a mustra cu e fundacion a publica cu cadena a crece den garganta di un cacho.

E abogado ta haya cu ta ta bisto cu ta midi cu dos midi. E abogado ta haya cu no tabatin maltrato di cacho. El a pidi Hues tene cuenta cu e castigo cu G. a haya for di pueblo.

Fiscal a reacciona cu tin problema cu cacho na Aruba. Hendenan mester percura pa nan cacho ta den nan cura y no riba caya.

SENTENCIA

Hues a sera tratamento di e caso y a dicta sentencia di biaha. Hues a bisa cu e caso aki a causa hopi conmocion na Aruba y otro lugarnan. E caso aki a afecta G. hopi. El a haya menaza y perde trabao. Na opinion di Hues, esey ta mustra cu na Aruba ta tuma na serio cuido di cachonan. E manera cu ta cuida cacho ta mustra con mester trata otro. Cu respet y dedicates. Loke por prueba contra G. ta cu varios biaha entre Januari 2024 y 26 Maart 2024, a laga e cacho sufri pa tempo largo, sin duna atencion necesario na e cacho. Hues ta haya cu G. a tuma riesgo cu door di su dejado a causa morto di e cacho. Tambe Hues ta haya cu G. a viola e ley di cacho esta di no a duna atencion adecuado na e cacho. Tur dos acusacion ta legalmente proba. Hues a confirma e exigencia di Fiscal y a condena G. na un boet di 750 florin, 60 ora di trabao pa comunidad di cual 20 ora ta condicional cu un tempo di prueba di 2 aña. Si G. no haci e 40 ora di trabao pa comunidad, e mester bay 30 dia sera den KIA.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio