ORANJESTAD – Awe mainta Hues di Corte di Husticia a dicta sentencia den e caso penal contra e hombernan R.v.d.B., N.B. y G.M.
Via video conference e sentencia a tuma lugar caminda Hues a haya e trio aki culpable di a atraca cu violencia e hombernan W. y B. di 71 aña y bay cu tur nan pertencianan esta joyas, placa y cellular.
ARUBA NATIVE por a compronde cu Hues a condena totalmente e atraco cu violencia aki. El a mustra cu un di e victimanan mester a wordo hospitaliza y opera.
Luna pasa tratamento di e caso aki a tuma lugar caminda Fiscal den Corte a mustra via video di seguridad, con e trio aki tabata den un auto para dilanti China Town ta vigila e hombernan B. y W. cu a bay bebe den e bar. Despues ora nan a sali, e tres acusadonan a sigui nan y ora nan a yega nan cas, nan a atraca nan cu hopi violencia.
Fiscal a exigi 7 aña di prison pa R.v.d.B. y N.B. mientras cu pa G.M. kende e tempo ey tabatin 17 aña el a exigi 18 luna di prison di cual 6 luna ta condicional cu 2 aña di prueba y bou guia di Reclasering.
Hues den su sentencia a mustra cu e ta haya legalmente proba cu e trio R.v.d.B., N.B. y G.M. a haci e atraco cu violencia riba e dos hombernan di edad. Hues a bisa cu e ta haya hopi cruel cu e trio a bay maltrata dos homber di edad y bay cu tur nan pertenencianan. El a bisa cu un di nan mester a wordo hospitaliza. Ta asina cu e hombernan B. y W. a demanda placa pa nan joyas cu a wordo horta. Hues a mustra cu e cellular di B. a wordo haya na cas di R.v.d.B. El a rechaza e demanda di e hombernan B. y W. pasobra e ta haya cu no a hustifica suficiente e demanda. El a bisa cu tanto B. como W. por cuminsa un caso civil.
Huez a condena G.M. na 15 luna di prison di cual 6 luna ta condicional cu un tempo di prueba di 3 aña. Hues a pone como condicion cu G.M. lo mester cay bao guia di Reclasering. Ademas Hues a ordena pa G.M. haci 120 ora di enseñanza bou guia di Reclasering sino e lo mester bay 60 dia sera. cond.
Pa loke ta N.B, Hues a bisa cu ademas di e atraco, N.B. ta culpable pa 2 ladronicia na cas di hende. Hues a confirma e exigencia di Fiscal y a condena N.B. na 7 aña di prison.
Pa loke ta R.v.d.B., Hues ta hay’e culpable di e atraco cu violencia y incubrimento di un cantidad di joyas cu ta procedente di ladronicia. Ta asina cu a haya R.v.d.B. cu marihuana y Hues a ordena pa destrui e droga y tur articulo cu tin di haci cu droga. Mayoria di e joyas y holoshi cu a confisca na cas di R.v.d.B., ta bay bek pa nan doño. Hues a bisa cu e mas di 2 mil florin, cadenanan di oro y algun cellular cu tambe a confisca, ta bay bek pa R.v.d.B. Hues a condena R.v.d.B. na 6 aña y 4 luna di prison.