Un komishon formá pa algun trahadó femenino di Kuerpo Polisial Kòrsou e aña aki a skohe na selebrá dia di hende muhe ku damanan kliente di algun instituto den nos komunidat.
A bishitá kuater instansia, di kua Sentro di Detenshon i Korekshon Kòrsou (S.D.K.K.), antes Jean D’arc College, J.J.I.C. (antes G.O.G.) i Huize Zorg en Herstel.
E programa a konsistí di palabra di enkurashamentu di algun orador, kanto i alabansa, orashon i finalmente a duna e klientenan di e diferente institutonan aki un regalo.
Presidente di Parlamento señora Charetti America-Francisca tambe a honra e damanan aki ku su presensia, dunando nan palabra di motivashon i resa ku nan.
Di e manera aki, Kuerpo Polisial kier a mustra e damanan aki, ku no opstante nan situashon of kondishon ku nan ta aden, nan ta di gran balor, un piesa importante di nos komunidat i ku nan por ta di testimonio bibu i inspirashon pa otro hendenan muhe den nos komunidat.
