Home History of Aruba Historia di Aruba: Pasion, amor, obsesion y jaloezie a caba den un...

Historia di Aruba: Pasion, amor, obsesion y jaloezie a caba den un tristo asesinato

SHARE

Te con leu nos por yama un relacion stimacion/amor? y ki ora e ta bira obsesion?

Den pasado Aruba a yega di conoce varios crimen pasional, ora amor bira obsesion, jaloezie cuminsa domina e relacion amoroso, ta traha caminda pa violencia y esaki por caba fatal.

Un biaha mas nos lo dedica historia di Aruba na un crimen pasional cu a sacudi henter e comunidad di Aruba. Un homber cu a laga jaloersheid domin’e, su pasion di amor a bira odio y a caba den un tristo asesinato.

Ambos persona cu tabata den e relacion amoroso aki, no ta na e mundo aki mas, pero si nan a laga atras un les importante pa tur persona cu ta bibando actualmente den un relacion amoroso cu ta wordo domina pa obsesion, jaloersheid y abuso. Relacionnan asina aki, mayoria di bes por tin un final devastador. Niun persona no ta pertenencia di otro, cada persona ta unico, tin su mentalidad, su caracter, su pensamento y su ideanan, esakinan mester wordo respeta.

Nos lo usa nombernan fictioso, e dama nos lo yam’e Brenda y e homber nos lo yame Robert.

Na Corsou na aña 1958 a nace for di un famia un baby mucha muher cu no tabata sa kiko destino tabata tin prepara pa su persona. Hunto cu su famia nan a bin biba na Aruba.

Amor di su bida
Na un edad hoben Brenda a fall in love, cu un homber cu nos lo yama Robert, segun nos a compronde e homber tabata un homber casa. Ambos tabata locamente enamora di otro, te cu Robert a laga su casa y a bay biba cu Brenda, e amor di su bida.

E vlam di e candela amoroso a cuminsa baha
E amor tabata mustra asina bunita, pero despues di un tempo e vlam di e candela amoroso a cuminsa baha, obsesion y jaloersheid a tuma over. E pareha a cuminsa ta pleita y discuti masha hopi mes, Robert tabata manera obsesiona cu Brenda.

 


E problemanan den e relacion a keda escala y riba 10 di maart 1979, e situacion a bay completamente for di man.

Odio y rabia a domina
Diasabra 10 di maart 1979, Brenda tabata den su auto den Dr. Henriquezstraat, na momento cu un auto mericano blanco grandi a cer’e y a dal contra su auto. Brenda a spanta y a dal para, den e otro auto e por a mira Robert full hostina, e auto no ta di Robert, pero lo a fia esaki for di un comerciante cu tin su negoshi den Havenstraat.

Den Dr. Henriquezstraat

Bou menasa di un cuchiu
Brenda a vries y bou menasa di un cuchiu grandi, Brenda a haye obliga di drenta den auto cu Robert. Djie Robert a cuminsa core rond riba camindanan di Aruba, durante e coremento un interogacion, pleito y hopi discussion tabata tumando luga.

Ponton destino final di Brenda
Na dado momento na Ponton, banda di e antene di Voz di Aruba Robert a dicidi di hinca e auto den un mondi, bou matanan di kwihi. Aki ta caminda Robert den su rabia a cuminsa hinca  Brenda cu e cuchiu cu e tabata tin den su poder. Brenda den su ansha a trata na habri e porta di e auto pa asina huy for di Robert, pero e hincanan tabata tabata hopi serio, e la logra baha for di e auto, e la dal algun stap alehando un poco for di e auto, pero a cay abou cu e cuchiu ainda pega den su lomba.

Auto hinca den mondi na Ponton

Robert a cambia di idea y a bay cas
Robert a baha for di e auto y spanta pa locual e la caba di haci. E la hisa Brenda den su brasa y a carg’e pone bek den auto, cu e intencion di bay warda di polis. Pero na caminda e la cambia di idea, e la bay su cas.

Ruman di Robert a bay polis
Robert a yega cas y a topa cu su ruman homber, e la conta su ruman locual e la caba di haci y a bis’e cu Brenda ta herida y ainda ta den e auto. Esaki tabata den careda di 3’or y mey di atardi cu e ruman homber di Robert a presenta na Warda di Polis na Oranjestad. E la yega cu e auto y cu Brenda seriamente herida den e auto. E ruman a conta polis kiko Robert a caba di haci y cu e victima ainda ta den e auto.

Brenda a fayece y Robert no kier a biba mas
Polis mesora a pidi pa un ambulance, Brenda a wordo transporta cu hopi urgencia pa hospital, pero lamentabelmente tabata hopi laat caba. Na yegada na hospital dokter a constata morto di Brenda di apenas 20 aña.

Warda di polis Oranjestad

Mientras cu e ruman di Robert a bay warda di polis, Robert a pasa man pa alcohol, e dal varios bitter y a guli un cantidad di pildo. Despues cu e la realisa kiko e la haci, e no kier a biba mas.

Robert deteni
Un rato despues cu e ruman a bay warda di polis, Polis a bay na e cas y a detene Robert. E la wordo hiba warda di polis, pero door cu e tabata bou influencia di alcohol y pildo, e la bay den un shock y a wordo transporta cu urgencia pa hospital. Autoridad mester a warda algun dia pa por cuminsa cu e investigacion.

Robert hiba cu urgencia pa hospitaal

Reconstrucion di e asesinato
Diahuebs 15 di maart 1979, a tuma lugar e reconstrucion di e asesinato, den presencia di algun recherche y Fiscal Arps. Durante e reconstruccion e recherche Fransisca a hunga e papel di e victima. Un linial a wordo usa como e cuchiu cu Robert a hinca Brenda cu ne.


Reconstruccion di e asesinato

Hunto pa eternidad
Segun informacion di e tempo ey, Brenda ta dera na Santana Catolico den Caya Ernesto Petronia, despues di 4 aña y 7 luna Robert a fayece. Robert a wordo dera hunto cu Brenda.

Na final por bisa e amor tabata mas grandi cu dolor, cu tristesa y morto. E asesino y e victima ta sosega hunto den e mesun graf pa eternidad.