Dia 16 di februari ta exactamente ochenta aña pasa cu Aruba a keda envolvi den e Segunda Guera Mundial. Teniendo dos refineria riba e isla sigur nos a hunga un rol importante como un di e productornan grandi di combustibel pa e aliadonan. Un di e areanan cu a hunga un rol importante den esaki tabata e area di Eagle.
Locual hopi persona awendia no sa ta e historia rico cu tin den e area aki. No solamente pa e envolvimiento den guera pero tambe pa e refineria cu tabata ubica den e area aki y cual a duna e bario di Eagle e nomber cu nos ta conoce te awendia. Pa Stichting Monumentenfonds Aruba (SMFA) sigur ta hopi importante pa trece e historianan aki bek y conscientisa tocante e rol importante cu e bario di Eagle a hunga den historia di Aruba. Pa cu esaki den cooperacion cu varios organisacionnan a yega na e proyecto di Ruta di Luz Historico pa Eagle.
Cooperacion
Riba iniciativa di Stichting Cultuurgeneratie di Hulanda, cu a acerca SMFA cu e idea pa haci un proyecto hunto cu lo pone atencion na e Segunda Guerra Mundial y e tema di libertad, SMFA a sugeri como parti di e proyecto aki pa pone atencion na e area di Eagle y inclui un ruta di luz crea pa studiantenan di Hogeschool Rotterdam na 2018.
Hunto cu Stichting Cultuurgeneratie, SMFA a busca fondonan na Hulanda pa por realisa e proyecto aki cual lo a inclui un ruta di luz. SMFA a ricibi di Veteranen Fonds di Hulanda ( Vfonds) e grato noticia cu a pone nobentinuebe mil euro disponible pa asina por traha riba e plannan pa e proyecto aki y ehecuta un parti di esaki.
Proyecto
Despues cu un grupo di studiante a bin Aruba pa nan minor na 2018 nan a bin cu e idea pa crea un ruta di luz pa e area di Eagle. E ruta aki lo mester duna informacion, ilumina y asina resalta e historia di e partinan mas importante di Eagle cu a forma parti di e Refineria. E studiantenan a parti esaki den seis diferente punto. E oficina principal di e refineria (cual tey te awe ainda y ta un monumento proteha), e taratata werf, e pier principal y pier secundario, e area caminda e torpedo a keda lansa y e compound cual ta e parti di e bario di Eagle cu e keda construi specialmente pa e trahadornan di e refineria cu tabata bin di exterior y di cual ainda tin casnan original di mas cu ochenta aña.
Actualmente tin un grupo di tres studiante di Hogeschool Rotterdam y SUS Ateliers, cu ta finalisando nan stage na Monumentenfonds caminda cu nan a haya como tarea pa detaya e plannan di e minor y una bes esaki ta finalisa SMFA lo sigui cu e siguiente fase cual lo ta evalua cual ta e partinan di e plan cu lo por ehecuta a corto plaso.
E meta principal di e proyecto ta pa duna honor na e historia di Eagle y crea un atractivo tanto pa turista como local cu ta conta e historia di Eagle.
De Arend Petroleum Company
Na 1928 un di dos refineria a keda construi na Aruba pa e Royal Dutch Shell. E refineria aki a keda na Aruba te aña 1953. Mescos cu tabata e caso na Colony cu e refineria di Lago e Arend Petroleum Company tabata tin su mes un bario cu casnan construi specialmente pa e trahadornan cu tabata bin di exterior, su propio hospital y areanan di recreacion pa e trahadornan y nan famianan. Banda di esaki a construi piernan pa transporte di materialnan y e petroleo pa procesa.
Durante Segunda Guera Mundial hunto cu e refineria di Lago, De Arend Petroleum Company a hunga un rol importante produciendo combustibel pa e aliadonan. Pa e motibo aki tabata tambe un blanco di atake y nos por wak cu un di e torpedonan cu a ser lansa pa ataka Aruba a termina den e area di Eagle Beach, lamentablemente costando bida di cuater marinier Hulandes. Despues di guera e refineria no a dura mucho mas y a cera su portanan na 1953. Mayoria di e trahadornan a bay traha na Curaçao. Te cu añanan setenta por a mira parti di e piernan como recordatorio di e Refineria na Eagle, pero despues cu e a kita esaki lamentablemente no a keda hopi mas pa recorda nos awendia e historia di e refineria De Arend. Tambe pa nos keda consciente di e libertad cu nos ta disfruta te awe.
Pa e motibo aki SMFA ta considera e proyecto aki di suma importancia pa asina por preserva e pasado y historia di Eagle pa futuro generacionnan.
