Home History of Aruba Historia di Aruba: Accidentenan aereo na Aruba di 1966 pa 1968 (...

Historia di Aruba: Accidentenan aereo na Aruba di 1966 pa 1968 ( part 2)

SHARE

1967, un accidente tragico aereo na Aruba den cual dos persona local a fayece

Diasabra 14 di October 1967, den oranan di mainta durante un Torneo Internacional di Pesca organisa pa Aruba Nautical Club, un tristo noticia a sucumbi henter Aruba.

Algo prome cu 12’or di merdia, e noticia a cuminsa circula cu un sportplane di Aruba Flying Club (AFC) cu 4 persona a bordo a cay, tambe cu esaki a sosode mas o menos 1 kilometer pariba di e final di e pista di De Vuyst Vliegveld.

Sportplane a crash y Jose Benoit Croes a fayece
Durante cu e sportplane a lanta, pa un of otro motibo a crash y a pega candela. E homber arubiano Jose Benoit Croes di 34 aña no por a sali na tempo for di e avion y e la ricibi hopi kemaduranan serio y a fayece mesora na e sitio.  Jose Benoit Croes(dfm) tabata waarnemend hoofd di Arubaanse Voorlichtingsdienst. E tres otro ocupantenan a keda herida, di cual un su situacion tabata hopi critico.

Diasbra merdia un comision investigativo a cuminsa cu un investigacion na e sitio di e crash. E area a wordo completamete cera pa Mariniers.

Sportplane a crash cu 4 persona abordo
E diasabra mainta aki, un grupo consisti di miembronan di prensa a dicidi cu nan lo ta desea di haya algun foto di e torneo pero for di halto, asina a dicidi di haci uso di e sportplane di AFC. Aruba Flying Club. E Periodistanan tabata di diferente medionan di comunicacion. Clement Celaire kende tabata presentado di noticia na e radio di e tempo ey, Voz di Aruba, Telearuba y e tabata e representante di Aruba pa Associated Press. Jose Benoit (Joy) Croes tabata hefe di Voorlichtingsdienst. Tambe Stanley Arends di Voz di Aruba, kende tabata yiu di Albertico Arends, kende tabata e tempo ey tabata miembro di Staten di Antiyas. E piloto tabata Eddy Ruiz un piloto cu bon experiencia y tabata sa bon di sportplane. E Avioneta cu nan a aborda tabata yama Mooney Mark 21, PJ-ASN, cu a wordo cumpra 3 aña prome pa Aruba Flying Club, e tabata carga e nomber di e fayecido mecanico di e club, A.S.Nichols dfm.

E avioneta Mooney Mark 21, e avioneta envolvi den e accidente

Aparentemente durante cu e avion a lanta buelo algo lo a bay robes. Na prome instante e avioneta cuminsa subi y despues di a dal riba e pista, e avion no tabata tin suficiente forsa mas pa tuma suficiente altura, e la crash y a pega candela, esaki a sosode un kilometer pariba di e pista di De Vuyst.

E mecanico Jan Staat mesora a bati alarma
E mecanico di Aruba Flying Club di e tempo ey, Sr. Jan Staat, a trata mesora na haya contacto cu toren via telefon, pero no por a logra pa motibo cu e telefon tabata hopi largo ocupa. Jan Staat a dicidi di subi den un avioneta y lanta buelo pa mira kiko a sosode y alabes via e radio di e avioneta a cuminsa trata na manda e mensahe, cu un avioneta a crash. E mensahe aki a wordo capta mesora pa Sr. Wiederholt di Bonaire Flying Club, kende tabata bulando e momento ey cu su avion riba e torneo di pesca. Sr. Wiederholt na su turno a pasa e informacion aki pa toren di control.

Mesora toren a bati alarma grandi, tur e instancianan di rescate y autoridadnan competente a bay cu hopi urgencia na e sitio di e crash. Na un stacion di Radio, un locutor a cuminsa grita cu un avion a cay, esaki a pone cu un cantidad di mirones a cuminsa bay direccion pariba, dus unda e avion a crash. Asina obstaculisando cu autoridad y e instancianan di rescate por a yega lihe na e sitio.

Brandweer, autoridad competente a bay na e sitio
Na e sitio tabata presente, deputado di airport di tempo ey Sr. Max Croes, kende alabes tabata presidente di Aruba Flying Club di e tempo ey. Luchthavenmeester E.G.Vos, chef Luchtbeveiligingsdienst A.Th. van Herwaarden y comisario di polis di e tempo ey G.H. Mol y hopi otro mas.

Na yegada e personal di brandweer a uza foam pa spuit e avion cu tabata completamente na candela. Despues cu logra paga e candela, algun boluntario na e sitio a logra saca e curpa di Joy Croes for di e avion. Joy tabata sinta banda di e piloto. Na momento cu e avion a bin abou e lo a dal su cabes y lo a bay for di tino, e la keda pega den e avion.
Mariniersnan tabata tin e area hermeticamente cera y tabata tene e pueblo riba un distancia.

Tres persona transporta cu urgencia pa Hospital di LAGO
E piloto Eddy Ruiz, Stanley Arends y Clem Celaire despues di e crash mesora riba nan propio forsa a logra sali for di e avion. Nan tur tres a wordo transporta cu urgencia pa hospital di LAGO.
Sr. Stanley Arends a ricibi kemadura na man y cara, cu su man herida, e la logra kibra e bentana di e avion pa asina por a sali for di e avion na candela. Stanley cu su pia a pusha Clement Celaire, un poco mas leu, na momento cu e la ripara cu Clem tabata drumi banda di e avioneta cu tabata kimando, e fuel cu tabata kimando, tabata hopi cerca di Clem su pia.

Clem Celaire a ricibi kemaduranan hopi serio na full su curpa, su situacion tabata hopi critico.

E piloto Eddy Ruiz, a keda herida pero su situacion no tabata dje serio ey, asina mes e la keda interna na Hospital di LAGO. Eddy  tabata traha na e hospital di LAGO.

Den careda di 3’or di merdia Stanley Arends a wordo transporta pa San Pedro Hospital pa motibo cu su situacion tabata stabiel.

Esaki ta prome biaha despues di 26 aña di existencia di A.F.C. cu un acidente di e magnitud aki a sosode cu un avion di Aruba Flying Club. Prome cu esaki enberdad a yega di sosode accidentenan pero chikito y insignificante.

Famianan di e victimanan via un stacion di radio a scucha di e crash
Stacionnan di radio despues di e accidente a cuminsa menciona e nombernan di e victimanan, famia di Joy Croes, cu no tabata na altura ainda cu Joy a fayece den e crash, mester a scucha e noticia tristo aki via radio. Pa motibo cu autoridad a tarda pa informa e famianan.  Na stacionnan di radio, por a sucha varios nomber di hendenan, te hasta di hendenan cu no tabata ni abordo.

Entiero di Joy Croes,
Savanta: Diadomingo, 15 di october 1967, den oranan di mainta, famia di Joy Croes, acompaña pa un cantidad di persona a hiba e restonan mortal di Joy Croes, na su ultimo lugar di sosiego. Joy a laga tras su señora y tres yiu chikito.

Na e entiero por a mira hopi interes di parti e partido politico AVP, como cu e defunto tabata un lider activo di AVP.
Na e entiero por a mira un delegacion grandi di AVP,  consistie di Sr. Max Croes, Dominico G. Croes, Efraim de Kort. Den e stoet por a mira tambe e deputadonan di e tempo ey, Caspar Lacle, Tommy Leest, y Betico Croes. Eilandssecretaris di e tempo ey A.J. Booi jr. y e miembro di statennan di e tempo ey pa AVP,Sr. Albertico Arends y Sr. Casimiro Yarzagaray.  Ex minister F.J. Eman, hefe di voorlichtingsdienst Julio Maduro y presidente di partido PRO Wijkie Maduro tambe a compaña e famia pa hiba Joy na su ultimo lugar di sosiego.

Na Misa sagrado Curason na Savaneta, Pastoor Vismans a haci e santo sacrificio di misa y despues a hiba Joy Croes na su ultimo luga di sosiega na Santana di Savaneta. Henter e bestuur di Aruba Nautical Club, tambe a mustra nan respet. Diasabra despues di e sucedido, Aruba Nautical Club como muestra di respet, a dicidi mesora di paga e musica.

Accionnan pa yuda famia Celaire
Dialuna 16 di october 1967, e situacion di Clem Celaire ainda tabata mescos, Clem tabata luchando pa su bida. Mientras tanto e coleganan di Sr. Celaire a tene un accion pa yuda e famia Clement Celaire, cual tabata un famia grandi di 12 yiu. Diadomingo den oranan di merdia, e directiva di Aruba Nautical Club a regala e famia di Clem Celaire, un gran parti di e piscanan di e torneo, e cantidad di pisca tabata asina hopi cu algun amigo di Clem mester a yuda warda e piscanan den nan freezer.

Dia 2 di November 1967, Sr. Robby Schouten a organiza un telethon pa asina yuda famia Celaire, den algun ora nan a logra recauda e tempo ey 21 mil florin. Un pareha turista cu tabata di honeymoon na Aruba tambe a scucha di e recaudamento di fondo pa famia Celaire, mesora e señora a bisa su casa pa nan haci un donacion di 250 dollar. Un compania local tambe a haci entrega di un suma basta grandi di placa, pero a prefera di a keda anonimo.

Señora di Clem Celaire via prensa local a gradici e comunidad di Aruba pa e ayudo cu nan a ricibi despues di e accidente aereo den cual su casa tabata envolvi. E ta sigur cu e ayudo aki a wordo brinda pa motibo cu Clement tabata ocupa un luga special den e comunidad di Aruba.

11 di November 1967 ainda tur tres tabata hospitalisa
Comienso di November tur cos tabata mustra cu Clem Celaire su estado di salud poco poco tabata mehorando, pero no suficiente bon pa por a sali for di hospital.  Dia 11 di november  1967 ainda  Stanley Arends y Eddy Ruiz tabata interna den hospital.

Clement Celaire a fayece.
Diadomingo dia 3 di december 1967 den careda di 10’or y 15 di anochi, a drenta e tristo noticia cu Sr. Clement Celaire a fayece.
Maske cu den e ultimo simannan, Clement tabata progresando y e doctornan tabata carga speransa cu e lo recupera, pero diasabra 2 di december 1967, e la haya un pulmonia basta pisa. Esaki tabata di mas pa e curpa debil di Celaire. Diadomingo su situacion a empeora, e la bira hopi critico y a fayece.

Medionan di Comunicacion di Luto, despues cu Clement Celaire a fayece
Clement Celaire tabata traha na Telearuba, e tabata e presentado di noticia na Ingles di Telearuba. Na e mesun momento cu e noticia a sali cu Clement Celaire a fayece, Telearuba, a para su transmission. Tambe e station di radio Voz di Aruba caminda Clem Celaire tabata traha for di aña 1954, e la wordo recorda y Voz di Aruba tambe a dicidi di para nan transmission. Dialuna 4 di December den oranan di mainta e stacion di radio a cuminsa toca musica suave. Na Corsou Telecuracao a bay for di aire, despues cu a keda conoci cu Celaire a fayece.

Clement Celaire (48) a laga su señora y su 12 yiunan atras
Clement “Clem” Celaire a fayece na edad di 48 aña, e la laga su señora y 12 yiu atras. Clem Celaire a yega Aruba na aña 1944, e la bin for di Dominica. Clem a traha den e laboratorio di LAGO. Despues di a wordo retira for di Lago, e la inicia su carera den e mundo di radio difussion, e la haya un chens na Voz di Aruba, cu recientemente a cuminsa cu nan transmission. Despues di e apertura di Tele Aruba e la expande su carera como presentador di noticia na Ingles. Clem tabata un colaborador di e revista semanal “The Local” y tambe tabata representa Associated Press na Aruba. Door di su noticiero, e tabata haci hopi trabou free-lance.

Aruba a despedi di Clement Celaire
Diamars 5 di december 1967, na un forma hopi impresionante Aruba a despedi di Clem Celaire.  Centenares di personanan a bay despedi di e defunto, canto di caminda por a mira un cantidad di hende para pa mustra nan respet na Clem Celaire. Un stoet grandi a sali for di San Pedro Hospital, direccion di misa San Fransisco na Playa. E parti dilanti di e stoet tabata consisti di e verkennernan di grupo Santanero, cu tabata e grupo cu Clem Celair a yega di forma parti di dje. Por a scucha di leu e zonidonan di e trommelnan di e banda di e padvinders, sigui pa un cantidad di mucha muhe, padvinders y welpnan  tur tabata carga kransnan y otro areglonan floral.
Na banda di e Cherche tabata cana coleganan di prensa, cu a bin demostra nan ultimo respet na nan colega den prensa.

Na misa San Fransisco, Pastor Erkamp y Reverente John Stewart,  a tene un sacrificio di misa ecumenico. Esaki pa motibo cu e famia un parti tabata catolico y e otro parti tabata metodista.

Patras den e stoet por a nota deputado di e tempo ey, Sr. Max Croes, miembro di Staten di e tempo ey Sr. Albertico Arends y tambe e directora di TeleAruba Sra. Audrey Maduro y henter e personal di Telearuba. Tambe henter e personal di Voz di Aruba, caminda e defunto a traha pa 13 aña. Un delegacion di Aruba Flying Club, representantenan di varios otro organisacionnan y clubnan cu tabata conoce e defunto a bin despedi di dje. Te hasta for di Corsou a bin un amigo personal di e defunto cu ta Dominee John Gumbs.

Durante e sacrificio di misa, Pastoor erkamp y Reverente Stewart  a recorda Clement Celaire como un persona cu semper tabata haci su trabou na bienestar di e comunidad di Aruba. Despues di e Sacrificio di Misa e la wordo hiba na su ultimo lugar di sosiego.

Licencia di Eddy Ruiz a wordo revoca pa un periodo di 5 aña
Na mei 1968, for di Corsou a yega e informe, cu e comision cu ta mantene y supervisa aviacion na Antillas, despues di algun luna di investigacion, a publica e motibo di e accidente den cual dos persona a fayece dia 14 di Oktober 1967, e raport aki  lo a pone cu e Minister di Trafico y Transporte di e tempo ey, a tuma e decision di trek in e licencia di e piloto Eddy Ruiz pa un periodo di 5 aña.

Cas den Maria Christinastraat a bira oficialmente propiedad di Sra.Vda. Clem Celaire
Dia 9 di april 1968, na oficina di Notario mr. C.W.J. Heufke, e notario suplente Mr. Meertens a pasa un acto cu e cas den Maria Christinastraat a bira propiedad di Sra. Vda. di Clem Celaire.
E compra di e cas a wordo haci posibel cu e fondonan cu Friends of Clem Celaire a recauda, despues di e accidente di 14 di October 1967. Un telethon den cual a recauda casi 22 mil florin e tempo ey. E stichting Clem Celaire a wordo funda dia 29 di November 1967, e stichting a maneha e fondo aki. E bestuur tabata consisti di mr. J. Stenfert-Kroeze, penningmeester mr. H.w. Bunschoten, miembro Cohen Manuel Viana y Sra. Audry Maduro Leon.