Home » PARTIDO MEP: PARTIDO AVP UN BIAHA MAS AUSENTE NA REUNIONNAN DEN PARLAMENTO NA ARUBA

PARTIDO MEP: PARTIDO AVP UN BIAHA MAS AUSENTE NA REUNIONNAN DEN PARLAMENTO NA ARUBA

by Admin
0 comment 84 views

Mientras cu si nan ta biaha pa atende reunionnan den exterior
Mike Eman un biaha mas ta mustra un liderazgo swak y sin control riba su parlamentarionan

Dia 8 di juli 2021, a tuma luga e huramentacion di Parlamentarionan di Aruba cu lo mester representa pueblo pa e siguiente 4 añanan. Pa Partido MEP a huramenta 9 Parlamentario. Pa Partido AVP a huramenta 7 Parlamentario. Partido Raiz, dos Parlamentario. MAS, dos Parlamentario y pa Accion 21 a huramenta 1 Parlamentario. 21 Parlamentario cu a huramenta y a haci e promesa di sirbi nos pais. Cu esaki kiermeen traha pa e pais aki. Sali na vanguardia di e pais aki. Bay trabou pa e pais aki.

Partido MEP ta lamenta cu Partido AVP no ta cumpli cu e promesa cu nan a haci dia 8 di juli. Pero ta di mas lamenta ainda cu e Lider di e Partido berde no ta duna bon ehempel tampoco mustrando cu su liderazgo ta swak y sin control y ta sigui faya. Mientras cu Mike Eman mester sirbi como ehempel y ocupa su stoel den reunionnan di Parlamento, e lider ta encurasha demas parlamentario di su Partido pa nan tambe keda sin presenta na trabou.

Esaki un biaha mas, por a mira durante e reunionnan ultimo den Parlamento pa trata e ley importante di combatimento di terorismo y labamento di placa. E pregunta ta keda, dicon Partido AVP tawata ausente na e reunion aki? Acaso nan ta sinti cu e sapato lo pas nan?

Nos ta ripara cu politiconan nobo di AVP, entre nan Gerlien Croes y Ryçon Do Nascimento tampoco tawata presente den e reunionnan aki na Aruba mes. Pero si a adopta e mal costumber di Parlamentarionan anterior di AVP y a prefera di subi avion y biaha pa bay ocupa un stoel den IPKO te na Bonaire. Partido MEP ta di opinion cu si na bo mes pais bo no ta presenta na reunionnan, bo no por representa pueblo na reunionnan pafo di Aruba tampoco. Tin hopi topiconan cu lo wordo trata den Parlamento na Aruba.

Partido MEP ta condena e hecho cu Parlamentarionan di AVP ta sigui cu nan mal costumber y ora ta conbini nan so pa show off, nan ta ocupa un stoel den reunionnan importante pero no aki den sala di Parlamento na Aruba. Ta tempo berdad cu ‘No work No pay’ bin na vigur pa asina tur parlamentario cu kier sirbi nos pais, cuminsa tuma e trabou aki na serio.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio