Home Politics Pa falta di leynan cu nunca a wordo cambia, Gobernador lo huramenta...

Pa falta di leynan cu nunca a wordo cambia, Gobernador lo huramenta Sr. Benny Sevinger, sospechoso principal di Caso Avestruz

SHARE

Oranjestad: Diabierna, 6 di augustus 2021, lo keda un dia marca y scur den historia di politica no solamente di Aruba, pero di henter Reino Hulandes. Pa prome biaha den historia di Reino, un sospechoso principal di un caso grandi di corupcion cu terenonan, lo huramenta como Parlamentario.

Esaki por a wordo evita, si a logra cambia e leynan vigente na tempo, pa por a scapa cara di parlamento di Aruba y evita mas berguensa pa Reino. Sr. Sevinger a haya suficiente voto, e la saca su mes, pa por bira parlamentario, esaki a dune su derecho di ta un representante di pueblo den parlamento di Aruba. No tin un ley actualmente cu lo por stroba Gobernador di huramenta un sospechoso di un of mas crimen.

Parlamento lo mester traha mas liher cu ta posibel pa cambia e ley aki, pa asina evita mas berguensa pa Aruba y Reino Hulandes.
Al contrario di Aruba, na Hulanda y mayoria di paisnan civiliza, asina cu un parlamentario of un Ministro ta wordo sospecha di algo y ta bou investigacion, e parlamentario of ministro sospechoso mes ta bin dilanti, e ta tuma su retiro, pa laga e investigacion cana su caminda.

Na Aruba nos por mira cu ta net contrario, un parlamentario sospechoso principal di actonan di corupcion, di falsificacion di documento, di labamento di placa etc. Un cantidad di acusacionnan basta serio den su contra, ta insisti pa bira un parlamentario.

Segun Ministerio Publico Sr. Sevinger a wordo laga den libertad bou varios condicionnan. Sr. Sevinger lo keda e sospechoso principal den libertad, wardando dia cu e mester presenta den corte y ricibi su sentencia.

Caso Avestruz ta un caso hopi grandi di corupcion cu terenonan di land Aruba, e parlamentario Sevinger ta e sospechoso principal, tambe tin varios sospechoso mas, tur ta amigonan y hendenan yega na Sr. Sevinger.

Sevinger tabata ministro entre 2009-2017, na 2009 y na 2013, 2017 e la huramenta tambe y no a cumpli cu locual e la priminti durante su huramentacionnan, pesey actualmente e ta e sospechoso principal den Caso Avestruz. Diabierna awo cu mixed feelings 1’or y mey di merdia Gobernador lo bolbe huramente.