Home Dutch Kingdom Vruminga di Hulanda Karibense

Vruminga di Hulanda Karibense

SHARE
?????????????????????????????????????????

Entre 2015 i 2020, investigadónan di e Naturalis Biodiversity Center a adaptá e lista di espesie di vruminganan lokal di Hulanda Karibense. A dokumentá un kantidat grandi di espesienan nobo, inkluso 40 espesie nobo na Saba i 32 espesienan nobo na Aruba. Komprondiendo e poblashon di vruminga di e islanan akí, ta pone nos un stap mas serka di habri e kompleksidat di e ekosistemanan úniko di Hulanda Karibense.

 

Vruminga ta sorto di animal sosial eksepshonalmente kompleho, ku apesar ku nos ta topa nan kasi tur dia, mayoria di biaha nan ta pasa nos atenshon bai. E animalnan akí ta forma un sosiedat kompliká ku ta kana paralelo na esun di ser humano. Kolonianan ta funshoná a base di un divishon di trabou i nan tin e abilidat di resolvé problemanan kompleho pa medio di komunikashon i trabou huntu den grupo. Tin mas ku 14.000 tipo di espesie konosí mundialmente, pero te ainda tin hopi di siña tokante e habitante chikitunan akí.

 

Resientemente, investigadónan di e Sentro di Bio-Diversidat di Naturalis a traha riba adaptashon di e lista di espesienan di vruminga di Hulanda Karibense. A base di investigashon previo kondusí durante 1930 i 1970 dor di H.J. Mac Gilavry, P. Wagenaar Hummelinck i R.H. Cobben, a adaptá e listanan akí pa di e forma akí inkorporá e kambionan den e poblashon lokal di vruminga.
Pa medio di kolekshon manual di e espesienan, a kolektá i surti e vruminganan pa por determiná kada espesie eksaktamente.

ISLARIBA

Promé ku inisio di e investigashon biológiko mas resien, a dokumentá solamente dos espesie di vruminga konosí na Saba. Pa medio di nan investigashon, Peter Boer & Marijn, J.A. Boer a dokumentá aktualmente un total di 42 tipo di vruminga. Adishonalmente, pa medio di e mesun estudio, a dokumentá un konteo provishonal di 24 i 56 espesie di vruminga na St. Maarten i Statia respektivamente.

Interesante pa menshoná ta ku a kondusí e investigashonnan na Saba despues di e orkan Irma, ora ku palunan ku a kai a opstakulisá e abilidat di e investigadornan pa por haña akseso na sierto parti di e rutanan i áwaseru pisá a kondusí sierto tipo di vruminga na buska skondementu den profundidat di suela fuera di bista. Pa e motibu ei, e posibilidat ta eksistí ku por haña ainda un kantidat di espesie di vruminga na Saba pero ku no a konta den e estudio akí.

 

Islanan ABC 

A krea tambe un yabi di identifikashon pa kubri e espesienan deskubrí riba e islanan Aruba, Boneiru i Kòrsou. E yabi aki ta basá riba e mesun base di estudio di 1930 i 1970 i a suplementá esaki aktualmente ku un investigashon di 2020 tokante e espesienan na Aruba. Interesante ta ku a adaptá e lista di espesie ku anteriormente tabata na 12 espesie konosí te na 44.

Di mas Importansia

Komprondiendo e habitantenan lokal, tantu grandi komo chikitu, ta krusial pa diseñá i implementá plannan di konservashon holístiko. Dokumentashon di presensia di espesie spesífiko di vruminga por yuda identifiká si i ki ora kualke tipo di espesie invasivo a yega. Vruminga ta hunga un papel vital den e ekosistema lokal i katalogando espesie lokal ta simplemente e promé stap den komprendementu di nan importansia den mantenshon di un medioambiente sano i bon balansá.

E investigashon di e founa di vruminga di Hulanda Karibense ta ketu bai den progreso.

Pa siña konosé mas tokante diferente tipo di vruminga na Hulanda Karibense, bo por haña e lista di espesie na e siguiente sitenan:

Lista di espesie pa SABA di total 42

Lista di espesie pa Kòrsou di 59 espesie, di kua a registrá 6 na Klein Kòrsou.

Lista di espesie pa Aruba di 44 espesie total

Ademas un Yabi di identifikashon, di espesie di vruminga riba e islanan ABC.

 

Foto’s

  1. Mier (Leptogenys pubiceps) Foto credit © Zach Lieberman/California Academy of Sciences- all rights reserved
  2. Mier (Odontomachus bauri) Foto credit © Michele Esposito/California Academy of Sciences– all rights reserved