Home Sports Tres medaya di oro pa Aruba den Campeonato ‘ABC’

Tres medaya di oro pa Aruba den Campeonato ‘ABC’

SHARE

 

 

Oranjestad:

Tres medaya di oro pa Aruba ta loke seleccion di Aruba Karate Bond a trece despues di a participa na e campeonato ‘ABC’ (Aruba- Boneiro- Corsow) cu a tuma luga na Corsow diasabra 3 di juli ultimo. E campeonato a conta cu participacion di 80 karateka en total, tanto den categoria ‘kata’ (combate imaginario cu e meta pa evalua e habilidadnan tecnico) y ‘kumite’ (combate real unda ta evalua e aplicacion di tecnica igual cu e habilidadnan tecnico entre e karatekanan). 

Alejandro Gonzalez Lujan a participa den categoria Junior, 16-17 aña. Den categoria di ‘kata’ el a competi contra dos karateka di Corsow y a finalisa como e vencedor. Pa loke ta ‘kumite’ (combate) Alejandro Gonzalez Lujan a bringa en total tres biaha contra Boneiro y Corsow pa finalmente gana cu medaya di oro. Publico presente a haya un tremendo presentacion y a goza di e peleanan. Un bon dominio di tecnica a keda demostra pa medio di Juan David Velasquez kende a laga e arbitro y publico impresiona ora el a presenta su kata ‘kanku-sho’. Aki ta unda e publico presente a emociona asina tanto cu aplauso fuerte y largo a cay. 

Aruba Karate Bond ta felicita ambos atleta incluyendo nan coach Alberto Gonzalez. Na mes momento, ta felicita e directiva (specialmente ‘sensei’ Felix Tromp kende a acompaña e seleccion), e mayornan y e scolnan miembro di Aruba Karate Bond. Un gradicimento pa e apoyo ricibi di Stichting Sportsubsidie Aruba, Fundacion Lotto pa Deporte y Comite Olimpico Aruba. Awor e trabounan ta sigui pa e proximo compromiso. Ta topa otro riba diasabra 10 di juli pa 10or di mainta na Centro Deportivo Frans Figaroa pa e “Aruba Summer Karate Championship 2021”.