Pa medio di carta aki Directiva di Arubaanse Voetbal Bond ta informa na tur Club Miembro cu desde 9 Juli 2024, nos tin un Women’s Football Coordinator, den nomber di Sra. Gina Chirino.
Sra. Gina Chirino a nace na Aruba y despues di biba 13 aña na Boneiro e ta regresa cas bek y ta cla pa un reto nobo. Sra. Gina tin experencia amplio den mundo di futbol internacional, mirando cu su persona a fungi como Match Commissioner, Match/Venue Coordinator na diferente torneonan grandi di Concacaf e.o. W Champions como tambe na e prome W Gold Cup 2024. Alabez Sra. Gina a traha na e ultimo CFU Girls Challenge Series na Antigua. Pronto nos host e torneo di Concacaf Girls U15 pa prome biaha den historia di cual lo bai tin 12 pais cu lo competi aki na Aruba y sigur cu su experticio den mundo internacional lo brinda un sosten enorme na nos Federacion y su rol nobo.
Sra. Gina a fungi un tempo como Club Licensing Manager na Federacion di Futbol di Boneiro, sigur un area cu tambe lo por traha riba esaki localmente.
Sra. Gina ta comparti su pensamento cu Futbol Femenino mester mas concientisacion y cu futbol ta mas cu e 90 minuut nan di wega. Futbol tin varios otro oportunidad nan y den su rol nobo e lo sa di uza lo maximo di su experiencia internacional pa sigi engradece futbol femenino.
Ban brinda Sra. Gina un caluroso bon bini, si tin cualkier pregunta, por tuma contacto cu su persona na [email protected]