Home History of Aruba Historia di Aruba: Accidentenan aereo na Aruba di 1966 pa 1968 (...

Historia di Aruba: Accidentenan aereo na Aruba di 1966 pa 1968 ( part 1)

SHARE

Historia di Aruba dedica na sucedidonan aereo na Aruba entre 1966 y 1968. Varios accidente y desaster aereo a tuma luga, na Vliegveld of cerca di e vliegveld, e tempo ey na Aruba tabata tin dos vliegveld, Prinses Beatrix y De Vuyst. Den e prome parti nos lo dedica e historia aki na dos accidente. Despues di algun dia nos lo publica e di dos parti y lo dedica e historia aki na e accidentenan aereo cu a pasa na 1967 y e ultimo parti na e accidentenan aereo cu a sosode na 1968. 

1966

* E prome Avioneta priva a cay panort di pista di vliegveld      Prinses Beatrix.
* E di dos tabata un Avion di Guerra, cu a cay riba un tereno na Simeon Antonio y tres persona a perde nan bida

30 di juni 1966
Aeropuerto Beatrix: Diahuebs den careda di 11’or y 50 di mainta, un avioneta di dos motor D18S Beechcraft matricula N-44583, despues cu toren a dune permiso, e piloto Harold Parker a lanta buelo.

Na momento cu e avion a cuminsa lanta, e piloto a sinti cu un di e motornan a perde forsa y e no por a controla e avion mas. E avion a bay cay poco panort di e pista di aeropuerto. E avioneta a pega candela, pero e piloto a logra sali for di e avion y no a keda herida.

E piloto Harold Parker a haya permiso di toren pa lanta buelo for di Aruba cu destino Panama.
Un rato despues alarma grandi a wordo bati na aeropuerto, pa motibo cu e avioneta N-44582 durante cu e tabata lantando buelo a cay bandi panort di e pista. E motor drechi a kita for e avioneta y a bay cay un 15 meter mas leu. E piloto a logra sali na tempo for di e avioneta.

E avioneta despues di a cay a pega candela
E avioneta a pega candela, hopi lihe brandweer cu materiaalwagen a sali bay na e sitio. Como ocho auto di brandweer y opperbrandmeester N.A.G. Vermeer tambe tabata na e sitio. E candela hopi lihe a wordo domina y paga. Segun Vermeer, e puiro nobo cu nan a haya ta traha tremendo ora di paga candela.

Un cantidad di dignitario y Autoridad na e sitio
Despues di e sucedido, autoridadnan concerni a presenta na aeropuerto. Pa casualidad e hefe di Luchtvaartdienst di Antiyas tabata na Aruba C.O. Irausquin, Luchthavenmeester C. Heemskerk, deputado I.S. de Cuba y C. Mathew, Officier van Justitie S.H. Tjon a Jong, Alto Comisario J. Schouwe, Waarnemend Procurado General mr. J.R. Bouwer cu tambe tabata na Aruba y presidente di e comission di investigacion di aviacion, tur a presenta na e sitio di e accident.

Diahuebs den careda di 5’or di atardi e Inspector di aviacion di Antiyas Hulandes a yega Aruba pa sigui cu mas investigacion, tanten cu e investigacionnan no caba, no sa kiko exactamente lo por a sosode.

E la bin Aruba pa bende e avion, pero esaki no a bay door
E piloto a yega Aruba cu e avioneta, algun dia prome, e intencion tabata pa bende e avioneta cu un persona na Aruba. Pero despues a resulta cu e persona na Aruba no tabata interesa mas pa cumpra e avioneta aki. E piloto a dicidi di buela bay Panama caminda e mes ta biba y despues e la keda di hiba e avioneta bek na Mobile Alabama, caminda cu e avioneta ta registra.

E piloto nunca antes a yega di bishita Aruba, e la comenta  cu prome cu e la lanta buelo, e motor a tarda pa start. E piloto Harold Parker tabata tin 27 aña ta bula avion y nunca a yega di hay’e den un of otro accidente aereo.

Avion di Marina Real a cay na Aruba.
26 di augustus 1966
Simeon Antonio, riba diabierna 26 di augustus 1966, den careda di 8’or y 30 di mainta, na Aruba a sosode e prome desaster aereo mas grandi den historia di Aruba. Un avion di guerra di Servicio Aereo di Marina Real di Antiyas, un tracker mesora despues di a lanta buelo a cay riba un tereno habri hopi cerca di un cas den e bario di Simeon Antonio. E avion mesora despues di e caida a pega candela. Dos occupante a muri na e sitio, mientras dos otro a wordo hiba cu hopi urgencia pa hospital, ambos tabata seriamente herida. Na prome instante no por a divulga e nombernan pa motibo cu mester avisa famia prome.

E avion a cay algun meter leu di e ultimo cas den Alablancastraat, na Simeon Antonio

Tragedia aereo mas grandi den historia di Aruba, tres persona a perde nan bida.


Tracker di MLD

Diabierna trempan e avion di guerra di marina real a yega Aruba for di Corsou, abordo dos piloto y dos matroos, nan a bin baha e dos matroosnan aki pa hiba dos otro matroos pa Corsou.

Na momento cu e avion a lanta buela, e lo a haye den problema, pasobra e avion no tabata por a coy haltura. Diripiente e la subi y a tuma un bocht na su man drechi y a cuminsa bin abou. Esaki a sosode net ora cu e avion tabata pazuid di e pista di vliegveld, riba  algun cas na Simeon Antonio. E la cuminsa perde altura y ora un di e halanan a dal riba un cuarto di palo, e la destrui e cuarto di palo completamente.

Cuarto di palo a keda completamente destrui ora e hala di e avion a dal riba dje y a kita for di e avion.

E hala a kita for di e avion y a keda tras.  E avion a bolbe trata na coy altura, pero riba un distancia di 50 meter leu for di e cuarto e avion a crash. E la crash riba un tereno habri di mas o menos 20 meter di distancia di e ultimo cas den Alablancastraat.

E parti memey di e avion na candela, e la cay den e mondi net pariba di e ultimo cas den Alablancastraat 

E avion a cay y a pega candela
Despues di e zonido fuerte ocasiona pa e caida di e avion e habitante di e casnan ey banda a core sali pafo pa mira kiko a sosode, nan a mira un candela cu vlamnan grandi. E parti memey di e avion so a keda henter y  tabata completamente na candela.

Mesora a bati alarm, un di e polisnan cu a yega prome na e sitio, tabata agente Brugman, e la cuminsa combati e candela cu “foam-Mite”, pero e biento a bula e foam den su direccion y e la resulta herida y mester a bay hospital pa tratamento.

Na prome instante Gezaghebber Henriques a tuma encargo di e trabounan di rescate
Gezaghebber di e tempo ey Sr. O. Henriquez a yega hopi lihe na e sitio, hunto cu e inspector di polis J.E. de Wijs, nan a tuma encargo di e trabounan di rescate.


Brandweer combatiendo e candela

Habitantenan di Alablancastraat a sali pafo y a topa cu e avion na candela y un chaos completo den e caya
Segun e habitantenan, nan lo tabata scucha gritamente biniendo for di direccion di e avion. E avion a saca un di e militarnan bente banda di e tempo ey “Simeon Antonio Grocery”. Dos otro a wordo saca benta cerca di e avion y un militar a keda pega den e avion.

Segun e habitantenan, Truck di brandweer tabata yega un tras di otro, hopi lihe nan a cuminsa na combati e candela. Mientras cu brandweer tabata spuit e avion e hoofdagent De Boer a risca su bida, core drenta den e avion, corta e safety belt y a saca e militar cu tabata pega den e avion.

Un di e militarnan cu a fayece mesora na e sitio

E militar cu tabata den e avion ya no tabata duna señal di bida mas. E lo a muri mas bien di e impacto fuerte, durante e crash. Segun e dokternan na e sitio e no tabata tin kemadura na su curpa. Un di e otro militarnan cu a cay pafo di e avion tambe a muri y hunto cu e otro banda di dje, nan a wordo carga y poni un poco mas leu. Mientras tabata wardando riba ambulance pa transportanan.

Un di e heridonan riba brancard

E candela tabata asina feros cu e mondi cerca di unda e avion a cay a pega candela. Tras di otro e Ambulancenan di gobierno y di Mariniers kazerne tabata presenta na e sitio pa yuda. Den e ambulancenan a yega varios dokter y verpleegster pa trata na duna e prome auxilio. Pader Van Veen di San Nicolaas tambe a presenta y na rudia a duna e victimanan nan ultimo sacramento. Un total di 60 polis a asisti na e tragedia aereo mas grandi den historia di Aruba.

Verpleegsternan y dokternan dunando asistencia medico

Polisnan mester a dirigi e trafico cu tabata un chaos completo,  pega cu auto cu mironesnan cu tabata yega for di tur parti di Aruba, pa presencia e desaster aereo aki cu nan mesun wowo. Deputado di e tempo ey Sr. Mathew tabata riba e caminda banda di e pista, e la conta cu e la mira e avion lanta y con e avion a tuma un bocht y a bin abou, un rato despues e la mira con e avion a pega candela.

Segun toren, despues cu e Tracker di Marine Luchtvaartdienst, cu 4 persona abordo a lanta buelo, a pidi permiso pa nan haci un bocht na rechts y aki  ta caminda cu e avion a cuminsa perde altura y a bin abou. Na e sitio di e desaster tabata un chaos completo,  un di e motornan a cay den cura di un cas y e radio abordo di e avion a wordo haya hunto cu un di e wielnan den Alablancastraat.

Un di e wielnan di e avion cu a cay den Alablancastraat

E otro wiel a keda colga na halto den un mata. E parti memey di e avion a keda hente, pero a kima completamente. E propeller a cay riba caminda y algun pieza y panjanan tabata gespart rond riba e tereno unda cu e parti memey a cay.

Resto di e avion y pertenencianan di e militarnan a keda benta riba e tereno pariba di Alablancastraat

Mientras e vlamnan tabata keda bira mas grandi y e candela tabata expande, un gran parti di e mondi a kima. E ekipo di brandweer na e sitio tabata tin basta dificultad pa paga e candela, esaki pa motibo cu e fuel di e avion a basha tur caminda. Brandweer a uza foam pa paga e candela. E parti memey di e avion a wordo completamente gespuit cu foam. Un tremendo trabou di e ekipo di brandweer di e tempo ey.

Brandweer combatiendo e candela feros

Brandweer na aeropuerto e tempo ey tabata bou encargo di Opperbrandmeester Vermeer, kende a yega na e sitio y mesora a cuminsa cu e trabounan necesario pa combati e candela feros, mientras mas truck di brandweer tabata yegando.

varios persona na e sitio, dunando un man

Varios dignitarionan di Aruba, autoridad y hefenan di aviacion tabata na e sitio. Gezaghebber Henriquez kende na prome instante a tuma e tarea di guia e rescate. Hefe di Aeropuerto di e tempo ey  C. Heemskerk, hefe interino di control di trafico aereo A.A.T van Heerwaarden, Comisario interino J.E. Wijs, Inspector H.D. Van den Griendt, Officier van Justitie, S.H.Tjon Ajong, Hues Mr. Wijnholt y autoridad di Marina Real tur a presenta na e sitio di e desaster. Savaneta Kemp a manda un team di mariniers pa yuda tene e publico na un distancia.

Personal di ambulance cargando un herido riba e brancard

E avion di Marine Luchtvaart Dienst, e Tracker, tabata tin 4 persona abordo, dos piloto y dos matroos cu tabata riba e barco di guerra ‘De Bitter” y nan a bin pasa algun dia di vacacion na Aruba y tabata bayendo bek Corsou.  Pa dos di e cuaternan ayudo a yega laat. E otro dosnan a wordo transporta cu urgencia pa San Pedro Hospital.

 

E bapor di guerra Hr. ms ” De Bitter”

Despues cu e famianan di e victimanan a wordo poni na altura di e tragedia, e nombernan a bira conoci, e dos victimanan cu a fayece na e sitio a keda identifica como Ltz.IIoc E. Ypma, cu tabata manehando e avion y e matroos 1ste klas .G. Folkerts.
Ltz. Ypma tabata biba na Corsou y a laga su casa cu dos yiu atras.
E matroos eerste Klas G. Folkerts tabata abordo di e bapor di guerra” De Bitter” kende tabata bayendo Corsou, Folkerts tabata casa y su señora tabata biba na Den Helder.

E dos nan cu a wordo transporta cu urgencia pa hospital tabata Ltz. Vlieger Mantel kende su situacion tabata hopi critico y e matroos I.K. Kuik, kende tabata herida, pero su situacion no tabata grave.

Diasabra den oranan di marduga, Ltz. Mantel a fayece na San Pedro Hospital, debi na e heridanan serio cu e la ricibi durante e accidente.  Ltz. Mantel tabata casa, y un ora despues di e accidente, su señora y su dos yiu muhenan a yega Aruba. Famia Mantel tabata biba na Corsou.

E unico sobreviviente den e tragedia aki tabata e Matroos Eerste Klas Kuyck di e bapor di Guerra ” De Bitter” e tabata herida pero su situacion no tabata grave. Matroos 1ste Klas tabata biba na Enschede y tabata soltero. Su mayornan a yega Aruba diasabra anochi y diadomingo 28 di augustus den oranan di mainta nan a bishita nan yiu na Hospital, un momento hopi emocionante, danki na Savaneta Kemp cu a haci e bishita aki posibel. E mayornan di Kuyck tabata hopi contento cu nan yiu tabata for di peliger. Nan ta hopi agradicido cu nan por a haya e oportunidad di yega asina lihe na Aruba y tambe di a mira nan yiu homber bibo, e unico sobreviviente den e tragedia aki.

Mayornan di Matroos Kucyk a yega for di Hulanda y a bishita nan yiu na hospital

Riba e mesun dia di e desaster a institui un comission tecnico pa investiga e motibo di e accidente cu e Tracker di MLD.
Segun toren, e piloto a pidi permiso pa dal un buelta mas riba aeropuerto, pero despues di esaki nan no a tende nada mas di e avion y algun seconde despues e avion a cay. E desaster a tuma lugar algo despues di 8’or y mey di mainta.

Un grupo di Militar Hulandes di Mariniers Kazerne di Aruba, riba diasabra a cuminsa cu e trabounan di ruim op e restonan di e avion, nan a wordo hiba Savaneta Kemp y cu boto nan a wordo transporta pa Corsou.  Curpa di e victimanan a wordo hiba prome pa Corsou, caminda a tene un ceremonia y dia 31 di augustus 1966 nan a wordo manda Hulanda pa asina nan a wordo hiba na nan ultimo lugar di sosiego.

Cermonia di despedia pa e tres militarnan cu a fayece den e tragedia

E ceremonia na Corsou den hangar III di MLD na aeropuerto Dr. Albert Plesman

Dia 30 di augustus den Hangar III di e Marine Luchtvaart Dienst na aeropuerto Dr. Albert Plesman na Corsou, den oranan di mainta a tene un Ceremonia di despedida pa e tres militarnan hulandes cu a fayece den e accidente aereo na Aruba. E sacrificio di misa tabata na honor di e dos pilotonan E. Ypma y J. Mantel y e matroos I.G. Folkerts.

Durante e sacrificio di misa por a mira un cantidad di persona presente, e viudanan di ambos piloto cu a fayece, Gobernado di antiyas di e tempo ey mr. N. Debrot, e comandante di Marina Real  A.j. de Graaff, e comandante di mariniernan na Antiyas A.F. van Velzen, comandante di e barconanan, tambe un cantidad grandi di militar y civil cu a wordo invita. E sacrificio di misa a wordo dirigi pa e predicante di e flota L. Kwakkelstein, A.L. van Melle y .J.W.B. Smit.

E parti tristo tabata cu Luitenant Ypma a fayece riba e mesun dia cu e la cumpli 30 aña. Matroos Folkerts tabata tin algun luna so casa, e la casa na mei 1966 via handschoen, su señora tabata na Hulanda. Casamento via handschoen antes tabata wordo haci hopi biaha pa e mariniersnan.

E tres militarnan a wordo dera cu honor na Hulanda
Diaranson 31 di augustus 1966, curpa di e victimanan a wordo hiba cu KLM pa Hulanda, caminda nan a wordo dera cu honor. Militar Ypma a wordo dera dia 2 di september na e santana di Nieuwe Oosterbegraafplaats na Amsterdam.
Luitenant Mantel a wordo dera riba 5 di september na Noorderbegraafplaats na Hilversum y e matroos Folkerts a wordo dera riba 2 di september na e santana na Jan Verfailleweg na Den Helder.

Gezaghebber personalmente a gradici e team di rescate y a pone su mes na altura di con tur cos a bay durante e rescate

Gezaghebber di e tempo ey Sr. Henriquez gradiciendo personalmente e personal di brandweer pa e bon trabou durante e desaster di dia 26 di augustus.

Gezaghebber a elogia e polisnan y personal di brandweer cu a demostra cu nan ta capacita. Diamars 30 di augustus 1966, den oranan di mainta, Gezaghebber di Aruba, Sr. Henriquez, a haci un bishita na e garashi di Brandweer pa personalmente gradici e bomberonan pa e forma con nan a atende cu e accidente aereo aki. For di e sucedido aki, a sali na cla cu e ambulancenan cu e tempo ey tabata tin na Aruba sigur no tabata suficiente.

“Kiko a Aruba ta bay haci?”
Gezaghebber Henriquez: “Dios spaar Aruba di un tragedia mas grandi”. ‘E unico cos cu e ambulancenan tin ta espacio pa transporta dos herido den un solo ambulance pero esaki so no ta suficiente”. Diabierna mainta den e ansha y pura e personal di ambulance a lubida di a hinca e segundo brancard den e ambulance y pa e motibo aki un di e ambulancenan no por a transporta dos persona, si no un so.  Segun e Gezaghebber un otro problema cu e team di rescate a haye confronta cu ne, tabata cu hopi mirones a core bay na e sitio di e tragedia y a tabata stroba e team di rescate pa yega mas lihe ne sitio.

Segun e gezaghebber di e tempo ey, “tur hende sa cu e personal di ambulance ta traha 24 ora pa dia. Personal di ambulance sa su trabou, pero no mester lubida cu e cantidad di bishitantenan cu lo bishita Aruba na 1966 ta 150 mil pasahero y a pronostica cu na 1970 e lo por bira dobel”. Door di e tragedia aki, gobierno a realisa cu mester bin un cambio y mesora a manda busca un ambulance mas cu por transporta 4 pashent. Segun e gezaghebber maske esey so no ta suficiente, tambe a wordo conseha pa staciona un ambulance na aeropuerto, esaki ta pa cualke eventualidad y pa asina por transporta un victima hopi mas lihe pa hospital. Un otro remarke di gezaghebber tabata, cu e stacionnan di radio mester bira mas cauteloso den duna noticia. Na momento cu e avion a cay, mesora locutornan a cuminsa grita na radio cu avion a cay y esaki a causa un consternacion ariba Aruba. Aeropuerto y Airlinesnan tabata wordo bombardea cu preguntanan y por ultimo e gezaghebber a bisa cu e publico por a duna miho cooperacion door di no blokea e camindanan y ta spera den futuro cu nan lo laga e camindanan liber pa e team di rescate.

Lt. ter zee der 1ste klas A. Krijger a ofrece e brigada di brandweer na airport un wapenschildje di e bapor hr. ms. De Bitter


E Wapenschildje di e bapor di Marina Real mr. hr. De Bitter

Riba 13 di september Voorlichtingsdienst di Marina Real a informa cu durante e bishita di e pabor hr. ms De Bitter na Oranjestad. E luitenant ter zee der 1ste klas A.Krijger, a ofrece un escudo di “De Bitter” na e brigada di Brandweer staciona na Airport. Esaki como reconocimento y graditud pa e ayudo y asistencia ricibi despues di e accidente aereo cu e avion Tracker di MLD riba 26 di augustus 1966.