Home History of Aruba Historia di Aruba: Un baby recien naci haya den lama

Historia di Aruba: Un baby recien naci haya den lama

SHARE

E biaha aki nos lo dedica un articulo cu a lanta hopi pregunta y causa un consternacion grandi na Aruba.

Un criatura cu a nace prematuro, e mama no tabata kier e baby y a paga un homber pa benta esaki na lama, aparentemente sin sa cu e criatura ainda tabata bibo.

Hopi biaha nos tin e tendencia di pensa, cu ta na paisnan bisiña actonan tristo asina aki ta pasa, pero lastimamente na Aruba tambe e la yega di sosode no un, pero varios biaha, cu mamanan a haya un baby, por bisa indesea. E ta un situacion hopi tristo y incomprendibel pa nos.  E criatura no a pidi pa bin na mundo, pero di otro banda nos no ta den sapato di e mama tampoco. Algun caso similar cu a yega di pasa na Aruba, un baby cu a wordo tira den lama na costa norte, un otro mama a laga su baby den mondi, un otro a laga su baby dilanti di un cas.

Compara cu prome, e mentalidad di e generacion di awendia ta diferente, tin hopi mas conocimento via internet. Muhenan na estado ta wordo guia durante nan embaraso y si ta necesario facilmente por haya ayudo, social of psychiatrico.

Cuarenta y cuater aña pasa e tabata diferente, nan forma di pensa, e forma di biba, etc. Tata tabata bay traha y un gran mayoria di mama, mester keda cas, pa percura pa yiunan, cas y casa. E rato liber nan tabata tin, nan tabata pase hopi biaha ta bishita bisiña, famia of sinta dilanti  television, especialmente  pa mira novela.

Riba 15 di Februari 1977, e homber J.d.C. a ricibi for di e muhe M.G.L., un saco y e lo a wordo pidi pa e benta esaki den lama.

Oranjestad: Diamars 15 di February 1977 e homber J.d.C. (47) tabata canando den Wilhelminastraat na momento cu e dama M.G.L. (26) a acerk’e. E dama a duna J.d.C. un saco y un biyete di 25 florin, pa haci’e un fabor. MGL a conoce JdC. via un otro persona cu a yega di cera nan conoci cu otro.

JdC. tabata un persona alcoholico y tabata tin un strafblad masha largo, mas di 120 biaha e la hay’e den problema cu husticia, esaki tur pa motibo di su bicio, cu e no por a laga alcohol den botter.

JdC. a puntra MGL kiko tin den e saco, MGL. a contest’e cu den e saco tin un baby y a splica JdC. cu ela caba di haci abortus cerca un Dokter di cas y a hinca e baby den e saco. JdC. na su turno a conteste “awel e baby ta morto, bo kier mi der’e pa bo”. JdC. a lo a haci locual e muhe MGL a bise, pa tira e saco den lama. JdC. a cana bay zuid y na e lama banda di Wilhelmina Park e la tira e saco cu e baby den lama.

Den careda di 3’or di atardi, un bewaker di Wilhelmina Park a mira un saco sospechoso ta drief den lama. Mesora e la bay mira ta kiko e por tin den e saco y a bin topa cu un baby recien naci.

Mesora e la yama polis y un of mas persona na e sitio hopi lihe a cuminsa practica respiracion di boca a boca cu e baby, e baby tabata dunando señal di bida. Un agente a crusa caminda bay na cas di Dr. Ho kan You pero e no tabata na cas y asina a dicidi di hiba e baby cu tabata na bida pa Hospital .

Na hospital a haci tur cos cu ta posibel pa tene e baby na bida, pero lamentabelmente den careda di 2’or di marduga e baby a fayece.

Despues cu e baby a fayece, autoridad a cuminsa cu un investigacion pa haya sa dicon y ken por a benta e baby recien naci den lama. Tambe a haci autopsia cu e baby y a bin resulta cu e criatura a fayece pa motibo di a haya fracturanan serioy tambe e baby a guli hopi awa di lama na momento cu e la wordo tira den lama.

Durante investigacion e recherchenan a bin topa na e sitio cu un broekie y un paar di sapato di homber, mesora nan a haya un fuerte sospecho cu probablemente lo por ta trata di un abortus.

Diabierna 25 di februari, 1977, e recherchenan cu tabata trahando riba e caso aki a bin haya sa cu na Hospital tin un muhe interna cu a bira hopi malo, cu supuestamente lo a duna lus 10 dia prome, su baby a muri y e muhe a bira hopi malo.  Mesora nan a bay hospital y e muhe aki a bin admiti cu ta e mes a duna lus na e baby cu un siman prome a wordo benta den lama y a fayece. E muhe di 26 aña M.G.L. tabata biba na Oranjestad. Riba e poco indicacion cu e muhe por a duna e recherchenan, nan a logra detene su complice J.d.C. kende tabata e persona cu a hiba e baby di e luga caminda cu e lo a nace pa Wilhelmina Park.

E recherchenan a detene J.d.C. y e la keda cera.  Na momento di su detencion e tabata basta bou influencia y autoridad no por a saca mucho informacion for di su persona. Ni tampoco for di e mama pa motibo cu su situacion di salud cu tabata hopi serio.

Diabierna 30 di September e caso a bin dilanti y den corte di prome instancia J.d.C. a bisa cu e ta inocente, e la desmenti di a benta e baby den lama y tambe a bisa hues cu durante interogacion e la wordo maltrata pa e recherchenan. Segun su persona nan lo a scop’e y lo a maltrat’e cu klop. E fiscal di e tempo ey fiscal Arps a nenga rotundamente cu esaki no ta berdad. Fiscal a bisa hues cu simpelmente e tentacion di placa a pone haci esaki, e acusado a haci esaki mirando cu e baby den e saco tabata cabes ariba.

Fiscal a pidi un aña di castigo di prison kitando e tempo cu e tabata cera caba. Abogado Croes a defende e acusado den e caso aki, e la haci e pregunta si en berdad e homber aki a haci e acto aki, su so of den cooperacion cu e mama? Como cu no tin suficiente prueba ariba esaki.

J.d.C. mes a declara cu e conoce e mama di e baby. Den e defensa abogado a  menciona cu e mama den su declaracion haci na Recherche a menciona cierto cosnan cu no tabata berdad. E mama a den conversacion cu un trahado di e dokter e lo a bay den baño y a duna lus. E mama a usa e argumento cu simplemente e la duna e acusado e baby pasobra ya e tabata tin  dos yiu mas na cas, cu tabata  wardando riba dje, pa e lidia cu nan,e mama mas sigur lo tabata considera aborto como algo gewoon.

E abogado a sigui bisa cu su cliente e dia aki tabata bebi, pero no a bebe burachi pa haci e acto aki,a base di tur e argumentonan cu e abogado defensor a usa.  E la pidi hues pa laga su cliente den libertad, pa motibo cu no tin suficiente prueba.  Fiscal na su turno a bisa cu na e momento cu e mama a entrega e baby na e acusado JdC, e ta bira responsabel pa su hechonan.

Croes a trece dilanti cu e mama di e baby durante tur e dianan eu cu e asunto aki a sosode a keda masha leu Abogado un mas a bisa cu su cliente ta inocente.

Fiscal na su turno a splica cu na momento cu e baby a wordo haya den lama ainda e tabata na bida. E baby a fayece di golpinan cu e la ricibi na su cabes y tambe cu a nace prematuro y no a haya cuidonan necesario.

Fiscal a haya cu ta mas cu logica cu den e comunidad Arubano e sucedido aki a causa un consternacion grandi.

Fiscal a baha pisa riba e JdC, paso e tabata sa cu e mucha no lo sobrevivi y a lag’e atras den lama pa simplemente deshaci di dje. E acusado ta un conoci di polis cu tin ya caba 120 sentencia pa motibo di su bicio di alcohol.

Oficier a exigi 1 aña di castigo di prison y mientras e abogado defensor a keda para ariba cu no tin prueba suficiente cu su cliente ta culpabel y a pidi pa declara e dagvaarding nulo. Segun e abogado No ta conoci con e mama a atende cu e dunamento di lus, na otro hende e la declara cu ta un miskraam e la haya, pero e por a pasa den un otro forma tambe.

E ta algo cu a sosode 41 aña pasa, mas sigur e homber JdC lo a no ta na bida mas y e mama nos  no sa ken e ta of si e ta na Aruba y si e ta na bida. Un sucedido hopi tristo. Pero bida di un baby prematuro tabata bal solamente 1 aña di castigo so y e mama?