Home Politics En conexion cu celebracion 45 aña di Himno y Bandera: PROME...

En conexion cu celebracion 45 aña di Himno y Bandera: PROME MINISTER TA BISHITA GRAF VAN ZINZENDORF SCHOOL

SHARE

Scolnan na Aruba den e siman di Himno y Bandera ta tuma hopi tempo pa siña nos muchanan di e dia importante aki. Pa Prome Minister Evelyn Wever-Croes semper ta un placer pa bishita nos scolnan pa asina e convivi cu nos muchanan e ocasion aki y alabes admira e esfuersonan di tur docente y alumnonan pa prepara pa nos Dia di Himno y Bandera, e aña aki celebrando 45 aña. 

 

Prome Minister hunto cu Minister Xiomara Maduro a bishita Graf van Zinzendorf School Aruba y a keda hopi impresiona cu e conocemento cu e muchanan tin pa loke ta trata e historia di nos simbolonan di identidad.  

 

Na yegada di Graf van Zinzendorf School, e mandatarionan a wordo ricibi pa e cabesante di scol, Juffrouw Edith Geerman cu a guianan pa klas 5 di Juffrouw Cita Acosta, na unda nan por a intercambia cu e studiantenan riba e celebracion di 45 aña di Himno y Bandera. Prome Minister tabata sumamente impreciona pa wak con na haltura e studiantenan aki ta pa cu Aruba su himno, bandera y escudo. Loke a resalta mas pa e mandatarionan ta e amabilidad, cordialidad y empeño cu e muchanan ta pone pa por siña lo mas posibel di nan isla. 

 

Por ultimo, Prome Minister a gradici e cabesante, docente y alumnonan pa e bunita ricibimento y pa e amor grandi cu nan tin pa cu nos dushi isla. Na mes un momento, e mandatario a felicitanan pa cu e celebracion di 65 aña di existencia di e scol aki.