Home » Historia di Aruba: Asesinatonan cruel na comienso di 80 (part 2)

Historia di Aruba: Asesinatonan cruel na comienso di 80 (part 2)

by Admin
0 comment 229 views

Den e segundo parti nos lo dedica na dos otro asesinato hopi tristo y cruel, cu ta:

Na Februari 1982, “Carnavalsmoord,” manera e la wordo yama, un caso hopi tristo y cruel 
&
Na November 1982, Jaloersheid a pone un homber yega asina leu di mata un muher na Montaña

Carnavalsmoord, esaki tabata e nomber cu a wordo poni pa e caso tristo aki den cual 3 hoben a mata un otro hoben cruelmente y a laga su curpa benta den mondi pabou di actual Don Elias Mansur Ball Park.

Oranjestad/Dakota: Diadomingo 21 di februari 1982, despues di a pasa henter un dia celebrando y gozando di e parada grandi di Aruba su Carnaval 28, den oranan di anochi ainda por a scucha varios caminda e cancion “Hiep Hiep Hoera” di Ito Dania, e Rey di Tumba di 1982, tambe despues di a tende henter dia brass band, Roadmarch di Mighty Cliffy, “Jamming” y hopi mas. Poco poco e hendenan tabata bandonanan e cayanan di Oranjestad, buscando caminda di cas.

Ricky a bay pasa e dama L. te su cas na Tarabana
E hoben Enrique Bermudez, cariñosamente yama Ricky, un hoben di 19 aña, tabata un di e miles y miles di hendenan cu a bay mira e parada grandi, despues di henter un dia gosando di e celebracion di Carnaval, te cu a bira anochi. Ricky como un hoben, cu a haya un bon educacion di cas, no kier a laga un dama cana bay su so den oranan di anochi te Tarabana. Nos no sa si tabata trata di su enamorada of djis un amiga. Ricky como un cabayero a dicidi di pasa e dama pa  su cas, sin sa kiko destino tabata tin wardando pe na Tarabana.

Ricky a mira e tres personanan ta horta den Centro di Bario Dakota y nan lo a invite pa drenta paden y bebe cu nan

Ricky Bermudez canando cu e mucha muhe, pa yega na cas di unda e dama tabata biba mester a pasa dilanti di Centro di Bario Dakota, e la mira tres persona den e edificio e oranan ey. Ricky a sigui cana y a hiba e dama su cas. Ora di bin bek e la bolbe pasa e mesun caminda. E la bolbe mira tres personanan den Centro di Bario Dakota, pero e tres personanan tambe a mira Ricky bolbe pasa y a nota cu Ricky a mira nan.( tin un version cu ta bisa cu Ricky a para na e schuifdeur y a miranan bezig ta horta paden.

E tres ladronnan den Centro di Bario Dakota tabata Nicojan Jansen, R. Dirksz y N. Albertsz. Ora cu e tres ladronnan a mira cu Ricky a miranan ta horta, aparentemente Nicojan Jansen lo a invita Ricky pa e drenta paden.

E tresnan aki a trata na coi confiansa cu Bermudez y a cuminsa dun’e bebe alcohol, cu nan tabata hortando for di e bar di Centro di Bario. Aparentemente nan lo a duna Ricky un 7 pa 8 cerbes bebe, tur esaki pa gana su confiansa pa e no bay bisa cu nan tabata hortando den Centro di Bario Dakota. Na momento cu nan tabata den Centro di Bario.

Nan a bay dilanti e panaderia den Guyabastraat

Nan no por a keda hopi mas den Centro di Bario y a dicidi di cana bay direccion di Guyabastraat, carga cu varios botter di alcohol y algun cos mas nan a bay sinta dilanti Panaderia Dakota y a sigui bebe. Dje un a cuminsa puntra otro kiko ta bay haci cu Ricky. Ricky a cuminsa bisanan cu e ta bay, aki nan pensamento a bay  pa likid’e, paso nan a pensa cu mas sigur e lo bay reda nan.

Nan a bay cu ne banda di Marlboro Ball park y aki ta unda Ricky a wordo cruelmente asesina 


Nan a dicidi di cuminsa cana cu ne, nan a pasa Fergusonstraat, Stadionweg y a bay banda di e tempo ey Marlboro Baseball Park, na e momento ey Ricky a bisanan cu e ta bay. Aki ta caminda cu Dirksz a dicidi pusha Ricky y despues a hink’e como tres biaha den su nek, mientras Nicojan a wanta su pia. Despues Nicojan y Dirksz a sigui na un forma hopi cruel hinca e curpa di Ricky. Un total di 81 hinka. E dosnan aki a hink’e, despues a pasa N. Albertsz e cuchiu yen miedo di nan, mientras nan tabata oblig’e pa e tambe hinka, pero pa scapa su mes un bida, e la gaña hinca e curpa cu ya tabata sin bida.  Despues nan a lastra e curpa bente den mondi pabou di Don Elias Mansur Ball Park.

Tata di Ricky hopi preocupa a bay haci un denuncia na Warda di Polis


Dialuna 22 di Februari 1982, Un meneer Bermudez ta yega Warda di Polis, hopi preocupa y ta haci un denuncia cu su yiu homber Enrique Bermudez a bay Carnaval y te na e momentonan aki no a yega cas. Mesora polis a tuma tur detayes y a cuminsa cu un buskeda pa Enrique Bermudez di 19 aña.

Curpa di Ricky a wordo haya

Dia 24 di Februari 1982, den oranan di mainta dos señora, un tabata di fam Bergrok, e otro no conoci pa nos, nan tabata pasando den e area di Mansur Ballpark, na dado momento nan a bin topa cu un curpa ya den un estado di decomposicion den e mondi benta. Mesora nan a yama polis y asina a bin topa cu e curpa, tabata trata di e curpa sin bida di Enrique Bermudez. E curpa a keda confisca y despues di merdia a wordo duna liber na famia pa asina e famia por a dera nan ser keri, e mesun atardi aki.

Investigacion a start y 7 persona a keda deteni pa interogacion
Un team di recherche a cuminsa cu un investigacion y a hopi lihe detencion a cuminsa cay, como 7 persona a keda deteni pa interogacion, pero niun di e personanan aki tabata envolvi den e asesinato.  Muy probablemente, segun nos a compronde un of mas persona cu a mira e Nicojan y R. Dirksz na sanger of  otro hendenan cu a pasa y a miranan den oranan di anochi den compania di e hoben Bermudez a tip polis.

Carnavalsmoord a keda soluciona, tres asesinonan a admiti di a mata Ricky
Dia 25 di Februari 1982, e Carnavalsmoord a keda soluciona, mientras e 7 personanan cu tabata deteni a wordo laga den libertad. Polis a logra detene e trio envolvi den e asesinato di Bermudez. Tur tres a admiti di a asesina Bermudez. N. Jansen di 21 aña, N. Albertsz di apenas 18 aña y R. Dirksz di 25 aña, tur tabata biba den Dakota.

Declaracion di e tres personanna cu a admiti cu nan a asesina Ricky
Nan tur tres a admiti lo siguiente; Cu enberdad diadomingo pa dialuna den careda di mey anochi, nan a bay na Centro di Bario Dakota, pa horta, nan a drenta via e porta banda di e bar. Nan a bebe alcohol y na dado momento nan a mira e victima pasa bay, nan no conoce e victima y e victima tabata den compania di un dama L. Segun declaracion nan a mira e pareha ta mira nan. Un rato despues e victima a regresa su so y lo a bolbe mira paden. Jansen a habri e porta y a invit’e pa bin dal un drinks cu nan, locual e victima lo a haci tambe. Nan mester a haci poco esfuerso pa gana su confiansa, pa evita cu e lo bay papia.

Na momento cu nan tabata bebiendo nan a cuminsa puntra otro kiko nan lo haci cu e victima, entrenan sin cu Bermudez a scucha nan lo a palabra algo . Despues nan a sali for di Centro di bario y a bay cu algun bebida y algun cos cu nan a caba di horta for di Centro di bario direccion di Panaderia Dakota den Guyabastraat. AKi ta caminda nan a palabra con nan lo likida e victima, paso nan no tabata confi’e cu e lo bay reda nan, mirando cu e victima tabata kier a cana bay.

Manera cu nan a yega na Marlboro tennispark, nan a pushe y a bente abou. E la wordo hinka tres biaha den su nek y despues tur parti di su curpa como 81 hinka, nan a lastr’e bente pabou di actualmente Don Elias Ballpark, den e mondi.

Mesora despues di interogacion tur tres a keda deteni y hiba Huis van Bewaring. Jansen tabata wordo busca caba pa motibo cu e la horta den un trailer di carnaval.

Desde e dia aki a cuminsa un serie di casonan den corte relaciona cu e Carnavalsmoord, cu a caba te dia 7 di juni 1983

Jansen a huy for di Huis van Bewaring Dakota.
Diasabra 20 di November 1982, Nicojan Jansen a huy for di Huis van Bewaring Dakota. Esaki a sosode den careda di 1’or y mey di merdia. Jansen (22) a haya un chens pa huy for di e werkplaats di huis van bewaring, cual e no a laga pasa. Mesora a cuminsa un buskeda rigoroso pa e fugitivo Jansen, tur esaki pa motibo cu e tabata wordo considera como un criminal peligroso, un acusado di Carnavalsmoord.

Buskeda rigoroso pa e fugitivo asesino peligroso Nicojan
E Comisario di Polis a haci un peticion pa e polisnan bay cu cautela mirando cu Jansen ta hopi peligroso y agresivo. Un buskeda rigoroso a wordo haci pa haya e fugitivo Nicojan Jansen. Dialuna 22 di November 1982, den careda di 9’or y 45 di mainta,  den area di Boca Druif, autoridad a logra pone man riba Jansen. Desde cu Jansen a huy for di prison, polis a haya varios tips, cu nan a mir’e na Bringamosa, un buskeda den e area aki sin resultado, un rato despues a drenta un otro tip cu e ta na Boca Druif y aki SI polis a logra pone man riba dje y a hibe cera bek na Huis van Bewaring.

“Een Beestachtige moord” esaki ta con Fiscal a yama e asesinato aki durante tratamento di e caso aki den corte
Segun investigacionnan haci en total e victima a wordo hinka como 81 biaha. E Fiscal di e tempo ey a yam’e “een beestachtige moord”. Durante tratamento di e caso, e tres acusadonan a bin cu tur sorto di storia y officier van justitie a bisa nan cu nan ta rico na fantasia, paso dilanti di Rechtercommissaris y polis nan a duna diferente declaracion. Fiscal a bisa den corte cu e tres acusadonan aki merece di haya un straf cu ta na e nivel y seriedad di e delito cruel cu nan a comete.

Fiscal a exigi pa Jansen y Dirksz 20 aña y pa Albertsz 15 aña. Maske Albertsz su envolvimento tabata menos, pero segun Fiscal na niun momento e la bay sconde of a trata na yuda Bermudez.

Defensa di abogado di e acusado Jansen
Abogado Flanders, a representa Jansen y kier a bin cu un defensa cu no ta Jansen so a faya, pero e comunidad completo cu nunca a dune un chens pa bira un bon civil. Esun cu a duna Jansen marihuana cu su 12 aña tambe ta forma parti di e comunidad.   Segun Flanders no ta nada straño, cu e mucha di 12 aña aki a crece bira un homber cu awe tin cu para dilanti mesa berde pa un delito asina aki.

Defensa di abogado di e acusado Dirksz
Abogado Sint Jago-Francis a bin cu un defensa cu Dirksz for di 20 di februari a cuminsa bebe alchol y tabata riba droga. Dirksz no tabata drumi mas cu 3 ora pa dia y pa tene cuenta cu e no lo por para responsabel pa su hechonan mirando cu e no tabata na su sano huicio durante e sucedido y a pidi vrijspraak pa su cliente. Segun e abogado e raport psykiatrico no tabata duidelijk y a pidi pa traha un di dos raport cu un otro psykiatra. E la haci un apelacion na Hues pa declara e dagvaarding nulo.

Abogado Hans Sjiem Fat, tabata abogado di e acusado N.Albertsz.
E abogado a dirigi su mes na e famia di e victima cu tabata presente den sala, e la cuminsa na condoleernan. Despues e la trece dilanti cu su cliente no a menasa e victima , no a ten’e, no a strob’e di huy, no a fors’e bebe y niun momento a hinca e victima y ni a push’e riba vloer. Niun momento e no a participa activamente na e asesinato di Bermudez. E Abogado a pidi hues pa dune un castigo cu ta igual na e tempo cu e ta den voorarrest.

E caso a tarda pa motibo di e raportnan psykiatrico cu a wordo traha na spaño y mester a keda traduci na Hulandes.

Sentencia den e caso Carnavalsmoord a cay
Diamars 7 di juni 1983, Despues di casi un aña y mey, porfin e dia a yega cu Hues a dicta sentencia: Dos biaha 20 aña pa Nicojan Jansen y R.Dirksz, N.Albertsz a haya 2 aña y mey. Na final esaki ta loke hof a dicta Procureur General a exigi levenslang pa Nicojan y Dirksz, anto 15 aña pa Albertzs.

Corte den prome instancia a duna Nicojan y Dirksz levenslang y pa Albertsz 1 aña y mey, pero Jansen y Dirksz no tabata di acuerdo y apela, mientras cu Fiscal tampoco no tabata di acuerdo cu e castigo cu Hues a duna Albertsz y fiscal a bay den beroep, paso e no tabata di acuerdo cu e sentencia cu N. Albertsz a haya.

Na final Hof a yega na e conclusion cu Albertsz no por wordo huzga pa e asesinato of pa ta medeplichtig di dje, pero si pa ladronicia y e la haya 2 aña y mey di castigo. Mientras na final Nicojan Jansen y Dirksz, no a haya levenslang pero nan tur dos a haya 20 aña.

E tres asesinonan aki tabata bou influencia pisa di droga y alcohol
Hendenan yega na e personanan aki a duna nos un informacion no oficial cu e dia di e asesinato tur tres tabata riba un sorto di droga pisa y nan niun no tabata por a funciona normal. E tempo ey nan, esnan cu no tabata tin placa, lo tabata uza un sorto di pildo cu ta un trankilisante pa cabay. Aparentemente tur tres tabata bou infuencia di e pildo aki y riba dje nan tabata bou influencia di alcohol tambe. E pildo tabata wordo considera como un droga hopi peligroso pa ser humano.

Tipsnan valioso polis lo a ricibi cu hopi lihe por a detene e tres personanan aki
Tambe nan a informa nos cu e tres nan aki a yega nan cas cu nan paña tur na sanger y cu na ora e efectonan di e droga a cuminsa sali for di nan curpa y nan a bin bek na nan tino, un di nan tabata yora manera alma malo. Esaki lo a confia un ruman di kiko tur nan a caba di haci y no ta conoci si ta e ruman mes lo por a bati alarma.

Den Dakota tabata tin rumornan fuerte, cu ora Jansen a yega su cas, un persona cu tabata biba den un apartamento den su cura di cas, a nota cu Jansen a yega tur na sanger, mesora e la pensa algo hopi malo e lo a caba di haci. Den bario a wordo conta cu e homber aki na momento cu e la haya sa di e asesinato, lo a bay informa polis di locual e la mira e dialuna marduga. Tambe un of mas hende lo a pasa y a miranan dilanti panaderia den compania di Bermudez. En todo caso tabata tin suficiente testigo pa por a detenenan y despues nan mes a admiti di a mata e hoben Bermudez.

Carnavalsmoord tabata un caso cu hopi hende nunca mas lo lubida, un asesinato hopi cruel, cu den e bario di Dakota te awe ta papia over di dje. No lo tabata mas miho pa nan a laga e Ricky bay y si e la redanan mes ta solamente un periodo cortico nan lo a haya cera. SI Enrique Bermudez miho conoci como Ricky tabata na bida e lo tabata un homber di 58 aña.

 

“Jaloersheid”, e motibo principal di un crimen passional den cual un homber a hinca Solange Blaire, e supuesto amor di su bida.   

Montaña: Dialuna 8 di november 1982,`na un cas na Montaña nan a bin topa cu un curpa sin bida di un dama Haitiana, di 33 aña di edad.

Curpa haya sin bida na un cas na Montaña

Den careda di 5’or di atardi  a drenta un informacion na polis cu den un cas na Montaña tin un curpa sin bida di un hende muhe. Manera ta e proceduranan normal, mesora a manda un patruya na e cas. Na yegada enberdad nan a bin topa cu un curpa sin bida di un dama Haitiana yama Solange Blaire di 33 aña. Solange tabata cuida un anciana na e cas aki. Dr. Lin a constata morto, e curpa a wordo confisca y hiba na e mortuario di hospital.

Na prome instante a wordo bisa cu e dama a wordo hinca cu un obheto scerpi den su pecho. Mesora autoridad a cuminsa cu un investigacion y hopi lihe a yega na un pista di un sospechoso, cu lo por a comete e asesinato aki, cu ta e homber Z.F.B.(53).  E homber aki tabata tin un relacion amoroso cu Solange.

Detencion a cay
Z.F.B. tabata biba na un cas na Matividiri, polis a bay na e cas y Z.F.B. no kier a sali bin pafo pa topa cu e agentenan y mucho menos kier a papia cu nan. Na momento cu polis a drenta den e cas, nan a bin topa cu ne scondi bou cama. Mesora e la keda deteni como e sospechoso principal di a hinca Solange fatalmente. Durante interogacionnan enberdad e la admiti di a hinca Solange pa motibo di jaloersheid y no tabata kier pa Solange a kibra e relacion amoroso cu ne.

Fiscal a exigi 5 aña di castigo di prison pa Z.F.B.
Riba 27 augustus 1983 Z.F.B. mester a presenta den corte. Segun Fiscal, riba e anochi di 7 pa 8 di november 1982, Z.F.B. a asesina e cria Haitiano Solange, kende ta e persona cu Z.F.B. tabata supuestamente stima. Ela hink’e y a mat’e. Fiscal a exigi 5 aña di castigo di prison pa Z.F.B.

Z.F.B. no tabata kier pa nan relacion amoroso caba
Segun declaracion di Z.F.B., nunca tabata su intencion di a mata  Solange. Nan tabata bay bon cu otro y e tabata yud’e cu placa pa cria su yiunan na Haiti. Solange na varios ocasion a pidi e homber pa stop di bebe.

Riba e anochi aki Z.F.B. tabata bou influencia y hunto cu dos otro amigo nan a bay bishita Solange. Despues cu nan tres a bay for di e cas, Z.F.B. a bin bek na e cas, paso e lo tabata desea di tene relacion cu Solange, pero no kier a puntra Solange dilanti di e dos amigonan.

Solange no kier a tende nada di tene relacion cu Z.F.B. y a bis’e pa e bay for di su cas. E homber a declara cu e victima na dado momento a bay den cushina y a pasa man pa un cuchiu, mesora e la pensa cu e muhe ta bay hink’e y e la kita e cuchiu for di e muhe. Segun Z.F.B. for di e momento ey, e no ta corda cu si ta zwaai e la zwaai cu e cuchiu, pero un cos cu si e ta corda, tabata ora cu Solange a cay riba vloer y cu e la cuminsa mira sanger, aki ta caminda cu e la spanta.

Fiscal a sigui exigi 5 aña di castigo di prison pa Z.F.B.
Durante tratamento di e caso den corte, Fiscal a splica cu for di e investigacionnan haci a resulta cu e victima a wordo hinca profundamente na su cintura, cu un cuchiu di 20cm largo. Fiscal a keda para ariba, cu kita bida di un otro ser humano ta un delito hopi serio, pio ora cu e victima no a haci nada robes. E unico cos cu e victima tabata kier, tabata caba e relacion amoroso cu Z.F.B. y pa esaki Fiscal a pidi 5 aña di castigo di prison.

Varios raportnan a keda traha
For di e raportnan psikiatrico a sali na cla cu Z.F.B. tbt un persona cu tabata bebe masha hopi mes. Den e raport a wordo conseha pa e bira miembro di A.A. y tambe lo ta un miho opcion pa e bay sinta su castigo na Corsou caminda su famianan ta biba. E raport di psycologo a splica cu Z.F.B. ta un persona hopi keto, pero e bebemento di alcohol ta sak’e hopi lihe for di su cashi.
Pa loke ta trata su strafkaart, ta un biaha so e la hay’e envolvi cu algo cu tin di haber cu husticia.

Hues a dicta sentencia, 4 aña di castigo di prison
Diaranson 9 di november 1983, net un aña despues di e asesinato, Hues a dicta sentencia den e caso aki. Z.F.B. a wordo sentencia cu 4 aña di castigo di prison. Hues a haya cu no por a sentenci’e pa asesinato, paso Hues ta haya cu den e caso aki, principalmente no tin prueba di asesinato y pa esaki e la wordo declara liber. Pero si a keda sentencia pa maltrato cu morto como consecuencia. Hues a mustra cu e acusado tabata bou influencia y cu e mes a declara cu e no sa con e por a yega asina leu, pa a mata e persona cu e tabata stima. Maske Fiscal a pidi 5 aña pa Z.F.B. algun siman prome, durante e ultimo tratamento di e caso, Hues a duna Z.F.B. 4 aña di castigo di prison.

No ta conoci si e la wordo manda Corsou pa sinta su castigo of e la sint’e na Aruba mes

Si bo sa mas di e casonan aki y ta desea di papia cu nos por contact nos libremente na nos email [email protected]

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio