Home Dutch Kingdom ” 30 mil euro” pa tip di oro riba cabes di e...

” 30 mil euro” pa tip di oro riba cabes di e hitman Gerel Palm (37)

SHARE

Noordeloos, Zuid Holland: Riba 10 di december 2016, un persona cu tabata canando a bin topa cu dos homber seriamente herida riba un tereno. E victimanan a wordo varios biaha tira.  Polis a cuminsa mesora cu un investigacion grandi relaciona cu e dobbel intento di likidacion. For di e investigacion a sali na cla cu e sospechoso principal ta Gerel Palm di 37 aña

Un par di dia despues di e tiramento aki, Palm a huy y a bay Surnam. Na momento cu su pareha a dicidi di subi avion  y tambe bay Surnam. Mesora un lus a cende y husticia na Hulanda a bin compronde cu Gerel a huy bay Surnam. Autorida Hulandes a tuma contacto cu autoridad na Paramaribo Surnam. Riba 1 di maart 2017 autoridad Surnameo a logra pone man riba Gerel Palm. E la keda deteni y cera den prison na Paramaribo, pero no a dura hopi, dia 12 di maart 2017, na un forma hopi violento Gerel Palm a logra huy for di e prison y desde e dia aki e ta un fugitivo.

Segun officier van Justitie, ta un milagro cu e dos victimanan a sobrevivi e intento di asesinato y esun  cu tin e riba su consenshi ainda ta fugitivo. Segun e officier no por ta asina cu e no por wordo huzga y ni castiga pa e intento di asesinato aki. Pa e delito serio aki, e lo por haya un castigo di prison di 20 aña. Esaki e officier van justitie a bisa durante e zitting

Mientrastanto for di investigacionnan haci pa polis, a bin sali na cla cu Palm ta un persona cu tabata traha pa e dos criminalnan mas grandi di hulanda, cu ta  Ridouan T.  y Saïd R.  Autoridad tin un sospecho hopi fuerte cu e intento di asesinato di 10 di december 2016 ta un trabou cu e mester a ehecuta pa e criminalnan aki. Tambe Palm ta wordo sospecha di a likida un trahado di un Spyshop,  Ronald Bakker, riba 9 di september 2015. Ronald Bakker a wordo likida cerca di su cas na Huizen. E likidacion aki tambe a sosode riba ordo di Ridouan T. .

No ta descarta e posibilidad cu Palm tabata envolvi den mas caso di likidacion y pa e motibo aki, desde juni 2017, Gerel Palm a wordo poni riba e Nationale Opsporingslijst y desde 31 di Maart 2020 Ministerio Publico na Hulanda a aumenta e recompensa di 15 mil euro pa 30 mil euro pa e tip di oro cu lo por yudanan yega na e fugitivo Gerel Palm.

Ministerio Publico hulandes a describi Gerel como un persona  posibelmente cu por ta cana arma y ta hopi peligroso, nan ta pidi tur hende cu por sa algo di e persona aki, pa nan tuma contacto di biaha cu autoridad.