Home International Resultadonan di vacuna por hiba nos mas cerca di e fin di...

Resultadonan di vacuna por hiba nos mas cerca di e fin di Covid-19, segun cientifico di Oxford

SHARE

E fin di e pandemia ta acercando, asina e cientifico encarga cu desaroyo di e vacuna Britanico a declara.
Prome Minister Boris Johnson ta bisa cu e tin speransa cu pa Pasco Grandi 2020 mayoria di esnan den grupo di riesgo lo a ricibi e vacuna.
Resultadonan exitoso di e pruebanan di e vacuna di Oxford University/AstraZeneca, ta sugeri cu e lo por proteha casi 90% di e poblacion. Prome cu e aña aki, nunca tawata existi un vacuna pa coronavirus.
E desaroyo aki a bin como un alivio pa e gobierno di Reino Unido, kende a inverti bastante y a cumpra 100 miyon di dosis, suficiente pa henter e poblacion adulto.
Matt Hancock, secretario general di salud, a bisa pendiente e aprobacion oficial, cu despues di cambio di aña e mayoria di e vacunanan lo ta disponibel pa suministro.
Locual tambe ta un bon noticia pa e resto di mundo, specialmente paisnan di poco recurso, ta cu e vacuna aki no ta costa hopi. £3 pa dosis compara cu mas di £20 pa e vacunanan di Pfizer/BioNTech y Moderna.
Otro beneficio ta, cu e vacuna di Oxford no mester wordo warda den freezernan super friu, locual ta resolve un problema logistico grandi, mientras tin suficiente evidencia cu e lo traha tanto pa esnan di edad como esnan mas jong.
E anuncio di awe ta hiba nos un paso mas cerca di e momento cu e vacunanan lo pone un fin na e situacion devastador causa pa Covid-19,” segun Profesora Sarah Gilbert di Universidad di Oxford, kende a dirigi e investigacion. “Nos lo sigui traha pa duna informacion detaya na reguladornan.Tawata un privilegio pa forma parti di e esfuerso multinacional aki, cu lo beneficia munto henter.”
Oxford/AstraZeneca ta bisa cu nan ta confia cu nan vacuna por stop transmision y plamamento di Covid-19, como tambe preveni cu hende ta bira malo. Contrario na otro vacunanan, nan a studia testnan semanal ariba voluntarionan, kendenan a ricibi test kits pa usa na cas. E informacion aki, cu ainda no a wordo publica, ta sugeri un reduccion di infeccion asintomatico entre esnan vacuna.
Pa cumpli cu e meta di vacuna henter e grupo di riesgo rond di mundo den e siguiente aña lo mester produci por lo menos 2 biyon dosis di e vacuna.